Yɔb 6
6
Yɔb be ènyà ɖoŋuti
1Yɔb ɖo e ŋuti gblɔ̃ be:
2Oò! Mù ji be woa dà vevesèse nyèa kpɔ,
ne wo la teŋu dà gbledo nyèa kpɔa, e la nyɔ!
3Ɛ̃ɛ, e kpɛ̃ wu àpùta-kɔ,
ènu kèa ŋuti ye mù le gblɔ̃ ènyà kè mu jè òa.
4Ŋusɛ̃kpatatɔa ŋɔ mù kudo yebe àŋùtiwo,
eye woabe àɖia ɖɔ mù keŋu.
Mawu be ŋusɛ̃ jiŋɔwo sitè ɖo ŋuti nyè.
5Èsɔ àkɛtɛ dona àpa lè ègbe mumu gbɔa?
Ènyì mu trɔna ŋùgbe do ègbe ò.
6Wo la teŋu ɖù ènu kè mu vivi òa, èjè màdoa?
Àzì mumu be ɣe cã vivinaa?
7Nyè mu le ji la ɖù ènuɖùɖu ŋua ò.
Àyàɖùɖu nyèa ye nyi ènuɖùɖu kè tìkɔ̀ na mù a.
*
8Mù jro be àmè ɖe ne ɖo biɔbiɔ nyèa ŋuti,
Mawu ne na mù ènu kè mù le jia.
9Ne e jro fifìa be yèa tùkù mù a,
eŋuã ne kɔ yebe àbɔ sɛ̃ŋua yì ji, ne bèa crɔ̃ mù!
10Mù la ɖuwè lè vevesèse sɛ̃sɛ̃wo be dòdòmè,
ɖo mù ɖo àsiɖoàkɔ-nya ɖe:
Nyè mu ŋlɔ̀ Mawu kɔ̀kɔ̀ɛa be ènyàwo be ò.
11Vɔ̀, ŋusɛ̃ mu gbà lè ŋuti nyè ne ma dojì ò:
àlè kɛ ye gbà lè àgbèa mè ò?
Ŋùɖo mu gbà lè àsi nyè ò.
12Èkpe ye mù nyi ne ma dojì lè ènu ɖekpekpe be ŋùkɔ̀a?
Gàjɛ̃ ye nyi àmèti nyèa?
13Ènu ɖekpe mu gbà lè ènyè mè la do mù àlɔ̀ ò,
àlɔ̀do vitukuia cã hùe do mù.
*
14Àmè kè gbɔjɔa, hiã ŋusɛ̃ dodo so ye havi gbɔ,
ne mu gbà ɖo bùbu na Ŋusɛ̃kpatatɔa cã òa.
15Èxlɔ̃ nyèwo be ènu to lè ŋùmè na mù kpakpla
sìgbè ètɔ̀ sàsra kè pua nène,
sìgbè ètɔ̀ kè mu ɖo èsì òa nène.
16Ne fàfa hùenu be vɔ̀vɔnu ɖo, èsìkpewo srènà
eye ètɔ̀ sàsrawo ɖɔna kaka gbãnàgo.
17Vɔ̀, lè èkuɖìɖi hùenua, wo puna kpakpla.
Zòzo hùenua, èsì mu gbà nɔ̀nà woa mè ò.
18Èmɔzɔ̃tɔwo mu gbà va tona e gbɔ tètè ò,
wo jina èmɔ̃ lè zògbèa ji kaka yì kuna.
19Temà kudo Sebà be èmɔ̃zɔ̃tɔwo le ji èsì sàsra ŋuawo,
wo sɔ woabe ŋùɖo dà ɖo woa ji.
20Wo xɔ̀sè be èsì lè woa mè,
vɔ̀ e yomè a, wo sè vève:
kè wo va ɖo funua, e wɔ̀ wo bàɖàa.
21Nène a ye mì lè na mìa xlɔ̃a.
Kè mì kpɔ gbledo nyèa, vɔ̃vɔ̃ ɖo mì.
22Mù biɔ mì ènu ɖe a? Mù gblɔ̃ na mì be:
mì yì sɔ mìabe àdɔ̀kùnuwo be àkpa ɖe va na mù a?
23Mì hlùɛ̃ mù lè kɛ̃tɔa sia?
Mì xɔ̀ mù plè lè àmè vuɛ̃ a sia?
24Mì kɔ̀ susu mè na mù eye mù la bɔ̀nu,
mì ɖè àgɔ̀jèje nyèwo mè na mù.
25Nyàwototo gbɔ̀nà àgbè àmè.
Vɔ̀, ènu kɛ be ènyà mì le hɛ̃ kudo mù ò?
26Ènyà kèwo mù gblɔ̃awo ye à?
Vɔ̀, àmè kè bu ŋùɖoa be ènyà vàvlà ɖo àya mè ye!
27Mì le ji la dà àkɔ̀ na cɔɛvi ye à!
Mì le ji la yì sà mìa xlɔ̃a cã a!
28E nyɔ̃, mì kpɔ mù nyuɛ̃ ɖe: mù le ɖà àjè a?
29Mì trɔ va, mì mu gbà wɔ̀ màjɔ̀ màjɔ ò.
Mì kpɔ ɛ̀ be nyè mu nya èɖe lè e mè ò.
30Àgɔ̀jèje ɖe mu lè ènyè mè ò.
Eye nyè mu teŋu do jèsi èvuɛ̃a?
Currently Selected:
Yɔb 6: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
