Yɔb 41
41
1Ne àmè ɖe susu be yèa ɖù èlã-jiŋɔa jia, e blè ye ɖokoe.
Nyàwoa, ne e va ze kpòa,
àmèwo kpata jènà ànyi kuna bòbò.
2Àmè ɖe mu kãsè la ji ènyà lè e ŋuti ò.
Eŋuã àmè kɛ ye la teŋu nɔ̀tè lè ŋùkɔ̀ na mù ò?
3Àmè kɛ ye do ègà na mù eye mù ɖo la trɔ ɛ̀ sɔ na ɛ̀ ò?
Ènu sia ènu kè lè xixea mèa, nyi tɔ̀ nyè!
*
4Mù la gblɔ̃ èlã-jiŋɔa cã be ŋutinuwo be ènyà,
yebe ŋusɛ̃ mànyagblɔ̃ kudo yebe àzɔ̃lì nyakpɔkpɔ.
5Àmè kɛ ye la teŋu zɛ̃ yebe àwùa lè ŋùkɔ̀ na ɛ̀ ò?
Àmè kɛ ye la teŋu to yebe àkɔtakpoxɔ̀nua mè dò ò?
6Àmè kɛ la teŋu fɛ̃ àglã na ɛ̀ ò?
Àmè sia àmè hũhũna tìtìtì lè yebe àɖu gbogbowo be ŋùkɔ̀.
7Ècro sùgbɔ ye cɔ̃ yebe ŋùgbedòmè lè ɖoɖonu.
Wo lè sìgbè àkpoxɔ̀nu kèwo tɛ ɖo woa nɔ̀nɔwo ŋuti kpãmia nène.
8Wo tɛ ɖo woa nɔ̀nɔwo ŋuti kaka ye
àya tètè mu teŋu kpɔ èmɔ̃ la yì ò.
9Ècroawo tɛ ɖo woa nɔ̀nɔwo ŋuti eye wo wɔ̀ ɖèka.
Àmè ɖe mu la teŋu ma woa dòmè ò.
*
10Ne èlã-jiŋɔa nyìa, funua klɛ̃na kpe è,
yebe ŋùkuwo kɔ̀nà sìgbè fɔ̃fɔ̃mè kè gbãnàa nène.
11Èzò be àɖewo tona lè ènu mè na ɛ̀,
e nana èzòklɛ̃nyɛ to àfi sia àfi.
12Àzìzɔ tona lè yebe ŋɔ̀tiwo mè
sìgbè ènu kè le fìɔ lè èze mèa nène,
sìgbè àŋùja be àve kè le bìzòa nène.
13Yebe àya-gbɔ̃gbɔ̃a teŋu na èzò kè le cia la gbà le,
eye èzò tona lè ènu mè na ɛ̀.
14Yebe ŋusɛ̃ lè èkɔ̀ mè na ɛ̀.
Àmè sia àmè ye sina lè ŋùkɔ̀ na ɛ̀.
*
15Wo tɔ̃ yebe àgbàze be ŋɔŋlɔ̃wo ɖodu.
Yebe ŋuti be tèpe fàflawo lè sìgbè gàkpo nène.
16Yebe èjì sɛ̃ŋu likè sìgbè àkpã nène,
e sɛ̃ŋu sìgbè èkpe kè wo sɔ tùnà èlùa nène.
17Ne èlã-jiŋɔa sitèa, àmè kèwo wɔ̀nà
kãlìawo ŋutɔ cã vɔ̃na eye wo sina.
18Ne èwui jè e ŋutia, mu sìnà ɛ̀ ò.
Nène a ke be nyi na èhuã kudo àŋùtiwo cã.
19Gàkpo lè na ɛ̀ sìgbè ègbe pupu nène,
gàjɛ̃ ya nyi àti kè nyìnyɔ̀a kpò.
20Àŋùtiwo mu wɔ̀nà ènu ɖekpe na ɛ̀ ò,
eye rɔbàtukpewo cã lè na ɛ̀ sìgbè ègbe pupuwo nène.
21Èkpò gã ŋutɔ cã lè na ɛ̀ sìgbè èbèyɔɛ nène,
èhuã be èhà jìji ɖìnà kòkoe na ɛ̀.
*
22Èkpe ènu piɖoewo ye cɔ̃na èlã-jiŋɔa be pòdo ji;
E lè sìgbè èmɔ̃ kè gùdùnà ànyigbã ye be le dɔ̃ to bàba ji nène.
23Ne e ɖo èsì mè lekea, e fìɔnà sìgbè èsì ye wo ɖo èzò ji nène,
e nana futukpɛ va na àpùa be ŋùmè.
24Fikè be toa, ɖènà èmɔ̃ kɔ̀kɔ̀ɛ ɖe ɖo ànyi.
Eye èsì wɔ̀ ègũa be ŋùmè kpata ɣena tìi
sìgbè àmè sĩsĩ be èɖà nène.
25Àmè ɖekpe mu lè kè sɔ̀ ku èlã-jiŋɔa lè ànyigbã ji ò.
Mù wɔ̀ ɛ̀ ne mu gbà vɔ̃ gbèɖe ò.
26E kpãnà ŋùkɔ̀ yebe kɛ̃tɔ gãgãwo,
e nyi èlãwɔ̀adãwo kpata be èfìɔ.
Currently Selected:
Yɔb 41: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
