Yɔb 40
40
Yɔb ye la ɖo ènyàa ŋuti!
1Tɔhonɔ̀ pò nupo na Yɔb. E gblɔ̃ na ɛ̀ be:
2Kè wò le sitè ɖo Ŋusɛ̃kpatatɔa ŋutia ɖe,
wò la teŋu hɛ̃ ènyà kudo èa?
Kè wò le dɔ̃ ènyà kudo Mawu a,
wò la teŋu ɖo ènyà ŋutia?
3Nène a ye Yɔb ɖo e ŋuti na Tɔhonɔ̀ gblɔ̃ be:
4“Nyè mu sù na ènu ɖekpe ò.
Nukɛ mù la teŋu sɔ ɖo e ŋuti ò?
Mù le ènu nyè kpoo!
5Mù pò nupo fuu, mù la ɖo ènutè.
Mù gblɔ̃ ènyà sùgbɔ va yì, fifìa mù bɔ̀nu kpoo.”
Ènu ɖoɖo la teŋu sɔ̀ kudo ɖotɔ a?
6Lè àya sɛ̃sɛ̃ ɖe mèa, Tɔhonɔ̀ biɔ ènyà Yɔb. E gblɔ̃ na ɛ̀ be:
7Bla àkpà ne wòa jrà ɖokoe wò ɖo ne ma biɔ wò ènyà,
eye wòa na mù ɖoŋuti.
8Wò le ji la gblɔ̃ be nyè mu lè jɔ̀jɔɛ òa?
Wò le ji la gblɔ̃ be yèbe ènyà jɔ̀ eye ènyè ye jè àgɔ̀a?
9Wò ɖo ŋusɛ̃ sìgbè ènyè ke nènea?
Eye wò cã àpo ègbè ɖìnà sìgbè èji be ègbè ɖèɖe nènea?
10Ne e lè nènea, eŋuã kpɔ jìjɔɛ ne wòa kɔ ɖokoe wò yì ji,
do bùbu tɔ̀hɛ ɖokoe wò ŋuti ne wòa jràɖo.
11Na ne àdɔ̀mèze wòa ne gbãgo.
Ɖè ŋùku kpò, ne wòa ɖiɖi ègòyitɔwo va ànyi.
12Ɛ̃ɛ, kpɔ ɛ̀ ne àdɔ̃ bèa jègũ na wo!
Ɖiki àmè bàɖàwo lè tèpe ɖèka.
13Na ne woa kpata woa ɖo ègũ,
tu wo ɖo èku be gàkpa mè;
14Nène a, mù la kafu wò.
Ɛ̃ɛ, àpo ŋusɛ̃ kpò ye la na wò jiɖùɖu.
Bòsrò àlo Ɖɛ̀gbo
15Kpɔ ɖɛ̀gbo ɖa, ènyè ke ɖo è sìgbè àlekè mù ɖo wò cã a nène.
E ɖùnà ègbe sìgbè ènyì ke nène.
16Vɔ̀ kpɔ yebe ŋusɛ̃ lè àlìmè na ɛ̀,
yebe pòdo trì nyuɛ̃ ɖe ŋutɔ!
17Yebe àsike sɛ̃ŋu sìgbè sedàti nène,
èkã sɛ̃ŋuwo ye lè yebe àtawo mè.
18Yebe èpuwo lè sìgbè gàjɛ̃ be gàkpo kèwo mè èdo toa nène,
yebe àhàdaputiwo lè sìgbè gàja nène.
19E nyi èlã xɔ̀asì wu lè ènuɖoɖo nyèwo kpata dòmè.
Ènyè, ɖotɔ a ŋutɔ ɖèka kpò ye ɖo ŋusɛ̃ ɖo e ji.
20Ètowo mè be kpɔna ègbe kè be la ɖùawo lè,
fikè ye èlãwɔ̀adãwo gblena lè.
21Vɔ̀ e yì mlɔ̃na àtiwo be fàfagbè,
e yì wlana ɖo ètãkuwo mè lè èkowo dòmè.
22Àti kèwo lè ètɔ̀toa be vɔ̃vɔ̃lì trɔna do è gòdòo.
23Èsì ɖɔɖɔ mu wɔ̀nà ènu ɖe na ɛ̀ ò.
E nɔ̀nà kpoo ne èsìa gbà ɖɔ kaka va ènu gbɔ na ɛ̀ cã a.
24Àmè kɛ la teŋu le è ne yebe ŋùkuwo lè hũhũ ò?
Àmè kɛ ye la teŋu sɔ èhuã sɔ ŋɔ ŋɔ̀ti na ɛ̀ ò?
Dràgɔ̃nà èlã-jiŋɔa
25Wò la teŋu yì le dràgɔ̃nà èlã-jiŋɔa sìgbè àkpàvi nènea?
Wò la teŋu sɔ àkpoŋù sɔ kù yebe àɖea?
26Wò la teŋu do àti ŋɔ̀ti mè na ɛ̀,
la sɔ ènu kù yebe àglãa?
27E la ɖèkuku na wò be wòa ɖè yè ègàa?
E la teŋu pò nupo na wò kudo ègbè bɔ̀bɔɛa?
28E la ɖùzò kudo wò ne bèa nɔ sumɔ wò kaka na yebe èkua?
29Wò la teŋu gble kudo è sìgbè xèvi nènea?
Àlo wò la do è èkà sìgbè àvũvi nène
na èvi nyɔ̃nùvi wòwo be gbegblea?
*
30Èɖɔdàtɔwo la teŋu bɔ̀ ɖo èdu sɔ sà èlã-jiŋɔa?
Wo la teŋu ma ɛ̀ sà do àmèwoa?
31Wò la teŋu sɔ àŋùtiwo trɔ̃ yebe àgbàze
eye wò la sɔ èhuã ŋɔ èta na ɛ̀a?
32Ne wò yì ji ènyà lè e ŋutia, wò la kpɔ ɛ̀.
Wò la nɔ ɖoŋù yebe wɔ̀na eye èsɔ̀ ŋùkèa, wò la kɔ̀ ɛ̀ ɖɛ!
Currently Selected:
Yɔb 40: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
