Yɔb 39
39
*
1Wò nya hùenu kè ye àvũgbɛwo jìnà èvia?
Wò kpɔ èsewo be èvijìpe kpɔa?
2Wò nya wètri nenè kè wo hɛ̃nà woabe èviwo va sùa?
Wò nya hùenu kè wo jìnà èvia?
3Woa nɔ̀wo yì jrànà woa ɖokoewo ɖo na èvi jìji
eye èvi jìji be vève sèsea jona lè woa ji.
4Èseviawo sĩnà lè vòvo mè, ɖona ŋusɛ̃.
Eye gbè ɖèka ne wo joa, wo mu gbà trɔna va woa nɔ̀awo gbɔ gbèɖe ò.
*
5Àmè kɛ ye na vòvo ègbesɔàkɛtɛ ò?
Àmè kɛ ye tu èkà na ɛ̀ ò?
6Mù na zògbè trɔ zũ yebe nɔ̀pe
ànyigbã vejè e ji ye be sò kɔpe ɖo.
7Fikè hũnyà-hũnyà lèa, ɖìnà ènu kòkoe na ɛ̀ ɖo e jina ètomè fàfa.
Àpetɔ ɖe mu dona àpa ɖo e ta ò.
8E ɖìnàsà lè ètowo ji, fikè be kpɔna gbè sia gbè be ènuɖùɖu lè.
Ènu kè do àmà ye jɔ̀nàjì na ɛ̀.
*
9Ètò la teŋu sɔ ye ɖokoe wɔ̀ sumɔ̃vi na wòa?
E la teŋu dɔ̃ àpo àxomèa èzã ɖèkaa?
10Wò la teŋu bla ɛ̀ ɖo àgblèdànu ŋuti ne bèa ŋlɔ̀ àgblè mè na wòa?
Wò la teŋu nɔ̀ ŋùkɔ̀ na ɛ̀ ne bèa dɔ̃ èmɔ̃ kè jrànà ànyigbã ji ɖoa?
11Wò la dojì ɖo yebe ŋusɛ̃ tɔ̀hɛa ŋuti,
kaka la tàsi èdɔ wòa na ɛ̀a?
12Eye wò la tàsi ènukuyàya wòa
ne bèa bɔ̀ wo ɖo àvà ji na wòa?
*
13Tatabòli be àwàwo pònà nyuɛ̃ ɖe
vɔ̀ mu la teŋu zrò sìgbè èglò nène ò.
14E ɖona yebe àzìwo ɖo ànyigbã
eye woa ŋutɔwo pònà woa ɖokoewo lè èkɔ mè.
15E ŋlɔ̀nàbe be wo la teŋu ɖo àfɔ̀ woa ji,
be ègbemèlã ɖe teŋu va gbã wo.
16Woa nɔ̀ sɛ̃na èta mè ɖo woa ŋuti ŋutɔ
sìgbè wo mu nyi yebe èviwo ò nène.
Èvi jìji mu wɔ̀ ènu ɖe na ɛ̀ ò.
17Ɖo Mawu mu na ɛ̀ ènunya ò,
mu na ɛ̀ susu tɔ̀hɛ cã ò.
18Vɔ̀, ne e sitè eye be tɔ èdù pupua,
èsɔ kè èsɔdotɔ le kùa cã mu teŋu kpena e ji ò.
*
19Èwò ye na ŋusɛ̃ èsɔa, èwò ye sɔ èfu
lɔ̀bɔ̀ lɔ̀bɔ̀wo sɔ do èkɔ̀ mè na ɛ̀ trɔdoa?
20Èwò ye na be zrònà sìgbè tìkpo-tìkpo nènea?
Yebe gbɔ̃gbɔ̃ be àya ɖona vɔ̃vɔ̃ ŋutɔ.
21E sɔna yebe àfɔ̀ kpàbàwo pònà ànyigbã
ne e le pu dù lè bàlìwo mèa.
Kudo yebe ŋusɛ̃ ye be sɔ jènà ŋùkɔ̀ na àhùakɔ̃wo.
22Vɔ̃vɔ̃ mu ɖona ɛ̀ kaka ye àdìka la sò è ò,
mu yìnà ŋùgbe lè èwui ɖe be ŋùkɔ̀ ò.
23E kpɔna gbà sènà àhùawɔ̀nu vòvòvòwo be ègbè:
èwuiwo, èhuãwo kudo àŋùtiwo be zòzro.
24Lè àmè ɖokoe ji màɖu mèa, e zrònà làlàlà kudo èdù.
Ne àhùakpɛ̃a ɖìa, mu gbà teŋu lena ye ɖokoe ò.
25E gbɔ̃nà sɛ̃sɛ̃ɖe na àhùa be yìyi ne e sè àhùakpɛ̃a ɖìa.
E sènà àhùa be èzĩtɔ̀tɔ ɖoɖa, àhùagawo be ègbèɖèɖe
kudo àhùawɔ̀tɔwo be àpa dodowo.
*
26Àmlãkoe kènà yebe àwàwo ɖoɖa àpùgo lɔ̀ge
ne zòzo bèa na ne èfu ye yèwo woa to na ɛ̀.
Èwò ye na ɛ̀ ènunya kè be sɔ le wɔ̀ ekèa?
27Èwò ye ɖè susu na èhɔ̃ gã
eye be yì wɔ̀nà àtɔ̃ ɖo ètowo mèa?
28E nɔ̀nà àkpãdowo mè,
e dɔ̃na àkpãwo be èta mè, funu ye yebe ŋusɛ̃a lè.
29So kaka funua ke ye be dànà àdè lè,
eye yebe ŋùkuwo kpɔna kaka dìdìpewo ɖoɖa.
30Èviawo nùnà èhũ.
Fikè ènukuku bɔ lèa, èhɔ̃ gã nɔ̀nà funu.
Currently Selected:
Yɔb 39: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
