Yɔb 4
4
Mawu ɖo gbledo sɔ kplana àgbètɔwo
1Nène a, Elifaz so Temàn sɔ ènyàa gblɔ̃ na Yɔb be:
2“Nyè mu ji la pò nupo na wò, ɖo mù kpɔ be wò dojì kaka be glo.
Co nyè mu la teŋu bɔ̀ ènu ò.
3Èwò kè pònà èto ɖo na àmè fuu,
eye wò nya àlekè wo dona àmè ŋusɛ̃ ɖoa.
4Àpo ènyàwo gbɔ̀nà àgbè àmè kèwo gbɔjɔa;
wo jɔ̀nà àmè kèwo trã èmɔ̃a.
5Eye fifìa, èwò ŋutɔ ji be jè eye wò gbɔjɔ.
Wàlɛbɛ kè gbledo le va ji wòa, vɔ̃vɔ̃ ɖo wò.
6Èwò kè nyi Mawu be èxlɔ̃a,
wò mu la le èjì sɛ̃sɛ̃ɖe ne wòa dojì ɖo e ŋutia?
Àpo àgbè nɔ̀nɔ nyuɛ̃a ne do ŋusɛ̃ wò tètè.
7Bù e ŋuti kpɔ: wò kpɔ gbledo jè
èɖemànyatɔ àlo ànùkuamè ji kpɔa?
8Nyè ya, mù do jèsi ènu kèa be:
àmè kè dànà ènu drã be àgblè gbà
dona àyà na àmèa, yì ɖènà àyà kudo ènu drã.
9Ne Mawu gbɔ̃ ɖo e jia, e kuna;
ne e do àdɔ̀mèzea, e crɔ̃na.
10Mawu nana ye jãŋùta be àdã
kudo ègbese be àpawo nu cina.
E ŋɛ̃na jãŋùtavi be àɖuwo.
11Nène a, jãŋùta la ku, ɖo mu gbà ɖo ènu ɖekpe la ɖù ò,
jãŋùtaviwo la kã tɔbu-nɔ̀bu.
*
12Mù sè ègbè wawla ɖe,
èto nyè sè ènu hùãhuã ɖe.
13Ekèa jɔ̀ lè èzã mè, lè èdrɔ̃ kuku mè
wàlɛbɛ kè àmèwo dɔ̃ àlɔ̃ ku bòbòa.
14Èta nyè lɔha eye fàfa le mù,
eye mù le hũhũ tìtìtì.
15Ènu ɖe sìgbè àya puplu nène to ŋùkumè na mù va yì,
vɔ̃vɔ̃ gbà jè e ji nyè kpe è.
16Àmè ɖe kè nyè mu kpɔ jèsi òa, tɔtè lè ŋùkɔ̀ na mù.
Àmè be nɔ̀nɔmè ɖe lè ŋùku mè na mù.
Èɖaɖo, e yomè a, mù sè ègbè ɖe gblɔ̃ be:
17“Àgbètɔ ɖe la teŋu nɔ̀ jɔ̀jɔɛ lè Mawu be ŋùmèa?
Àmè ɖe la nɔ̀ kɔ̀kɔ̀ɛ lè ɖotɔ a be ŋùmèa?
18Kpɔɖa: Mawu mu kãna ɖo yebe àtikplɔtɔwo ji ò,
e kãna ŋùmè na yebe sumɔ̃viwo
so woabe àgɔ̀jèjewo ŋuti.
19Ne e lè nènea, leke be la teŋu dojì ɖo àgbètɔwo ŋuti ɖo ò?
Nyàwoa, èkɔ ye wo sɔ wɔ̀ wo, eye woabe ŋutilã nyi hũhũ ɖèɖe.
Wo la teŋu wù wo sìgbè tɔ̀bɔ̀su nène.
20Wo la teŋu crɔ̃ wo lè hùenu viɖe kpò mè.
Wo la bu gbidi, àmè ɖe mu la gbà ɖo ŋùku woa ji ke ò.
21Èkà kè le wo ɖo àgbèa, sò.
Wo ku kè wo mu kpɔ ènunya xɔ̀ ò.”
Currently Selected:
Yɔb 4: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
