Yɔb 38
38
Tɔhonɔ̀ biɔ ènyà Yɔb
1So àya sɛ̃ŋu be dòdòmè ye Tɔhonɔ̀ ɖo ènyà ŋuti na Yɔb lè, gblɔ̃ be:
2“Àmè kɛ ye wò nyi le cɔ̃nu àpe ɖoɖowo ji,
lè ènupòpo so ènu kè wò mu nya òa ŋuti ò?
3Jràɖo ɖɛ ne wòa nyi ŋusù!
Mù la biɔ wò ènyà ne wòa na mù gɔ̃mè ɖèɖewo.”
Mu nyi Mawu ye ɖo xixea?
4Fikɛ ye wò lè wàlɛbɛ kè mù le sɔ ànyigbã ɖo yebe dodoewo ji ò?
Ne wò nya nyàwoa, to è na mù.
5Àmè kɛ ye na yebe jijewo ò, wò nya ɛ̀a?
Àmè kɛ ye dàkà sɔ jije è ò?
6Nukɛ ji ye dodoeawo li ɖo ò?
Àmè kɛ ye ɖo koŋùjikpe kpɔ̀tɛa,
7wàlɛbɛ kè ye jiŋùkusi dùkɔ̃wo le do jìjɔɛ be àpa
eye ŋùdekɛ̃nyɛ wètriviwo le jì màmlã-hawo ò?
8Wàlɛbɛ kè àpùa wo so ànyigbã mèa,
àmè kɛ ye tu èmɔ̃ do è, sɔ le è ɖo ànyigbã ji ò?
9Ènyè ye! Eye mù sɔ lilikpowo cɔ̃ e ji,
mù cɔ̃ àvɔ-do-vìvìti ɖe na ɛ̀.
10Mu ɖo àsi yebe èdù pupua ji, mù do lipò na ɛ̀,
kè mù tu èhɔ̃ ɖo e nu, dogà e mèa.
11Mù gblɔ̃ na àpùa be: “Wò la va kaka fikèa!
Wò mu ɖo la gbà yì wu nène ò!
Ɛ̃ɛ, àpo ègòyiyi srɔ̀kewo be sɛ̃pewo ye yà!”
*
12So kaka gà kè mè wò jɔ̀ a,
wò ɖè ègbè eye èŋù kè kpɔa?
Eye wò sɔ fɔ̃fɔ̃mè be tèpe sɔ fiɔ ɛ̀:
13ne bèa le ànyigbã be ètowo mè,
bèa hũhũ ì ne àmè bàɖàwo woa jè ànyi.
14Nène a, ànyigbã trɔna sìgbè ànyikɔ
kè mè ye ènu be tata ɖè ɖo nène,
eye xixea kpata lè sìgbè ènu kè wo do àwù na a nène.
15Vìvìtimènuwo ye jɔ̀nàjì na àmè bàɖàwo,
co wo mu la teŋu kɔ àsi yì ji ɖo àmè ɖekpe ŋuti ò.
*
16Wò yì kè ɖo àpù be jɔ̀sope ŋuti vɔ̀a?
Wò yì ɖìsà lè àpùwo be dòdòmèa?
17Wò kè ɖo èkuwode be èmɔ̃a ŋutia?
Wò kpɔ yebe àgbo mɔnuawoa?
18Wò teŋu ɖè susu ɖe so ànyigbã be lipòwo ŋutia?
Ne wò nya ekèawo kpataa, na ne ma nya!
19Fikɛ lɔ̀ge ye kɔ̀kɔ̀ɛ nɔ̀nà ò?
Eye èzã be nɔ̀pe ɖe?
20Wò la teŋu yì ji wo kpɔ lè woabe nɔ̀pewo
eye wò la nya woabe àfɔ̀topewoa?
21Wò nya ɛ̀, èwò kè wo jì so gbèɖegbè kea!
*
22Wò teŋu yì kaka èsìkpe wuwluiwo be wlapea?
Wò yì kpɔ èsìkpe jàja be àvàa?
23Mù wla wo na jɔ̀gbè vuɛ̃wo be ŋùkèkè,
na àvũ kudo àhùa wɔ̀wɔ be ŋùkèkèwo.
24Fikɛ ye kɔ̀kɔ̀ɛ so ò? Fikɛ ye èwèzɛ̃pe be àya sɔna,
va pònà lè ànyigbã ji ò? Wò nya ekèa?
25Àmè kɛ ye ta èmɔ̃ na èsì jàja ò?
Àmè kɛ ye ɖè èmɔ̃ na bìɖà kudo hɛ̀bìɛsò ò?
26Àmè kɛ ye nana èsì ɖùɖùnà kɔ̀ ɖo
ànyigbã kè ji àmèwo mu lè òa ji ò?
Zògbè nyigbã, fikè àmè ɖe mu lè ò.
27Àmè kɛ ye nana èji jànà kɔ̀ ɖo
ànyigbã pupui ji kaka be ɖona èsì
eye e nana ègbe mìɔ̃ nà gbà jènà ò?
28Ètɔ ɖe lè èjisi jàja sia?
Àmè kɛ ye jì àhũ jàja ò?
29Ènɔ̀ lè èsìkpe sia?
Àmè kɛ ye jì èsìkpe wuwluiwo ò?
30Wàlɛbɛ ŋua èsìa trɔna èsìkpe sɛ̃ŋu goŋu-goŋu,
eye ye ji àlo yebe ŋuti nɔ̀nà ɖèka kpò.
*
31Kpɔ wètriviwo be èha sòsowo ɖa!
Wò la teŋu bla wètrivi adrɛ̃awo ɖodu,
eye wò la tu èkà na wètrivi ènè kɔ̀ ceŋu-ceŋuãwoa?
32Wò la teŋu na ye wètriviwo la to ɖo àmè hùenu,
la kplɔ̀ Sisiblìsi gã kudo vitukuia?
33Wò nya èse kè le kplɔ̀ jiŋùkusia?
Èwò ye lè ŋùkɔ̀ na jiŋùkusi be wɔ̀nawo, lè ànyigbã jia?
34Wò ɖènàgbè ɖo lilikpowo ji
ne woa na wò èjisi gbɛ̀lua?
35Èwò ye ɖènàgbè na bìɖàwo ye wo zena lè xixea mèa?
Wo sènàgbè na wòa?
36Àmè kɛ ye sɔ ènunya do Ejiptè be ètɔ̀ gã, be xèvi ɖè ɖovòa mè ò?
Àmè kɛ ye na susu sɔ̀gbè na kòklo ne bèa sɔ nya èji jàja be vava ò?
37Àmè kɛ sù la teŋu hlɛ̃ lilikpowo
eye be la kpà èsì lè jiŋùkusi ò?
38Lè hùe ŋua nua, hũhũ la trɔ zũ bàba be ètɔ̀ sàsra,
eye bàbakɔ̃wo la ca ɖodu lè àgblèwo mè.
Mu nyi Mawu ye ɖo èlãwoa?
39Èwò ye jina èlã na jãŋùta-nɔa?
Èwò ye jina nuɖùɖu na jãŋùta vi
40kèwo lè woabe èdowo mè,
àlo sɔ̀gbè la dà àdè sɔ le èlãa?
41Èwò ye ɖànànu na àvàkò, ne èviawo le do àpa yɔ Mawu,
eye wo le ci jàjàjà, àdɔ̀ le wù woa?
Currently Selected:
Yɔb 38: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
