Yɔb 36
36
Èlìhu ɖè lekè Mawu kplana àmèa gɔ̃mè
1Èlìhu yì e ji gblɔ̃ be:
2“Yɔb, nɔ̀tè viɖe ne ma fiɔ wò ènu buwo:
nyè mu kpɔ gblɔ̃ Mawu be ènu jɔ̀ àsuwo vɔ̀ ò.
3Mù la ɖè ènu kè mù nyaa fiɔ àmèwo
kaka yì ànyigbã be nukpòpewo,
sɔ ɖè Mawu, àpe Ɖotɔ a be jɔ̀jɔɛ fiɔ.
4Nyàwo be nyi be nyè mu nya àjè ɖàɖa ò,
eye ènunyatɔ tɔ̀xɛ ɖe ye lè gbɔ wò.
5Mawu nyi ŋusɛ̃tɔ, eye mu wɔ̀nà àdɔ̀mèkutui ò.
Mawu sɛ̃ŋu eye yebe ènyàsòso nɔ̀nàtè goŋu.
6Mu tànàsi àgbè na àmè bàɖà ò,
vɔ̀, e sònà jɔ̀jɔɛ na wɔ̀amènɔ̀wo.
7Mu ɖènà ŋùku lè àmè kè sumɔna ɛ̀a ji ò.
*
Mawu na ŋusɛ̃ èfìɔwo ne woa sɔ kplɔ̀ dùkɔ̃wo.
Vɔ̀, wo va zũnà ègòyitɔwo kaka jo trãnà.
8Eye wo yì jènà gbledo be èmɔ̃ tetre mè,
èvuɛ̃ be kɔ̀sɔ̀ kɔsɔ blana wo, dona gàkpa mè.
9Mawu fiɔna àsi èvuɛ̃ kè wo wɔ̀a na wo,
àgɔ̀ kèwo ye woabe ègòyiyia na be wo jèa.
10E hũnà woabe ètowo ne woa sè
ènu kè ŋuti be le kãŋùmè na wo ɖoa gɔ̃mè,
e le biɔ so woa si be woa trɔ lè èvuɛ̃ yomè.
11Ne wo le ɖoto gbà le sètonu na Mawu a,
nyɔna la kpàsà woa do, eye jìjɔɛ mè kpò ye wo la nɔ̀.
12Ne wo mu le ɖoto òa, wo la le èkuwode be èmɔ̃a,
eye wo la ku ɖo wo mu nya ènu ɖekpe ò.
13Ɛ̃ɛ, àmè bàɖà nɔ̀nà àdɔ̀mèze dodo ji tɛ̀gbɛ̀.
Ne Mawu le dɔ̃to na ɛ̀a, mu dona àpa ò.
14Wo buna àgbè lè woabe ɖèkajɛ mè ke,
wo kuna sìgbè tùgbɛ̀jɛvi àhasìtɔwo nène.
*
15Vɔ̀ Mawu hlùɛ̃nà wɔ̀amènɔ̀ gã to èhiã mè.
E hũnà susu na ɛ̀ to àyàɖùɖu mè.
16Xoxo sã, e xɔ̀ wò lè gbledo si.
Ènu sia ènu sù àsi wò, eye àgbã
xɔ̀asìwo ye nɔ̀nà èkplɔ̃ wòwo ji.
17Co gãke, wo gblehùɛ do wò sìgbè àmè bàɖà ke nène,
eye wo mu la teŋu ɖɔ̀lì ètodɔ̃ wòa cã ò.
18Àdɔ̀mèze mu gbà na ne wòa yì wɔ̀ ènu drã ɖe ò! Kpɔ nyuɛ̃ ɖe!
Mù gbà susu be yè la teŋu sɔ ènu nanawo yì plè Mawu ò.
Ànyi jèje ye ekèa la nyi na wò.
19Àpo àdɔ̀kùnɔ̀ ku sìka wòawo mu la sù ò,
eye àpo ŋusɛ̃a kpata cã mu la teŋu do wò àlɔ̀ ò.
20Mù gbà dojì ɖo èzã ŋuti ò, ɖo e ye mè ye
wo la nyà dùkɔ̃wo lè lè woabe ànyigbã ji.
21Na àsà èvuɛ̃ bòhũ. Nyàwo ye!
Ènu kèa ŋuti ye gbledo va ji wò ɖo.”
Mawu wugã ènu sia ènu
22Ɛ̃ɛ, Mawu lòlò to yebe ŋusɛ̃ ji.
Àmè kɛ ye sù la teŋu fiɔ ènu sìgbè e ye nène ò?
23Àmè ɖe teŋu fiɔ ɛ̀ èmɔ̃ kè be ɖo la toa?
Àmè ɖe la teŋu dojì gblɔ̃ na ɛ̀ be: “Wò le wɔ̀ ènu bàɖàa?”
24Jè àgbàgba ne wòa do jèsi yebe ènu jɔ̀ àsuwo.
Woawo ŋuti ye àmèwo jìnà kàfùkafu-hawo ɖo.
25Wo teŋu le kpɔ ènu kè Mawu wɔ̀ eye wo le glò è kpɔ ɖoɖa.
*
26Ɛ̃ɛ, Mawu lòlò, eye mi mu sènà ekèa gɔ̃mè ò.
Mi mu la teŋu hlɛ̃ yebe èpèwo ò.
27E gbɔ̃nà yezo be èsì vana ye ɖokoe gbɔ,
e trɔna ɛ̀ sɔ wɔ̀nà àhũ eye e trɔ jànà sìgbè èjisi nène.
28Nène a ye lilikpowo hlɛ̃na ɛ̀ eye wo nana
e jànà ɖo dùkɔ̃wo ji lè ànyigbã ji.
29Àmè kɛ ye la teŋu sè lilikpowo be wɔ̀na gɔ̃mè ò?
Leke ye hɛ̀bìɛsò dànàtu ɖo lè jiŋùkusi ò?
30Mawu dànà yebe bìɖàwo lè jiŋùkusi,
vɔ̀ àpù be ègũ cicriwo nɔ̀nà vìvìti mè.
31To lilikpowo jia, e dɔ̃nàto na dùkɔ̃wo,
e nana ènuɖùɖu lè gbɔsùsu mè.
32E wlana bìɖàwo ɖo yebe àlɔ̀wo mè
eye e nana wo ŋusɛ̃ be woa yì gble ènu kè be jro a.
33Hɛ̀bìɛsò be ègbèɖèɖe ye sìanà àmè na yebe vava,
èlãhawo ŋutɔ cã nyana be e gbãnà.
Currently Selected:
Yɔb 36: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
