Yɔb 35
35
Èlìhu tɛgbè ɖo e ji be Yɔb le pò nupo ɖo àya mè
1Èlìhu yì nupoa ji gblɔ̃ be:
2Wò susu be yebe ènyà jɔ̀ a, wò kãɖoji be yè la teŋu ɖè
kunù na yè ɖokoe lè Mawu be ŋùkɔ̀a?
3Wàlɛbɛ kè wò le gblɔ̃ be:
“Nukɛ ye èvuɛ̃ mà-wɔ̀ la hɛ̃ va na mù ò,
nukɛ ye la so e mè na mù ò?”
4Mù la ɖo ènyà ŋuti na wò kpòeɖe,
eye mù la ɖo èxlɔ̃ wòwo cã tɔ̀ ŋuti zè ɖèka.
5Le ŋùku ɖo jiŋùkusi ŋuti, kpɔ lilikpowo ɖa:
wo lè àyamè boo na wò!
6Ne wò le wɔ̀ bàɖàa, wò dona àbì Mawu ŋutia?
Ne wò kpɔ̀tɔ̀ le jèaglaa, nukɛ be la teŋu wɔ̀ na ɛ̀ ò? Kpao!
7Eye ne wò le sètonu na ɛ̀a, àlè kɛ be la kpɔ ò,
nukɛ be la xɔ̀ so gbɔ wò ò?
8Àgbètɔ kè lè sìgbè èwò nènea ŋuti kpò ye ènu kè wò le wɔ̀a le do àbì,
àgbètɔwo kpò ye le kpɔ ègomè lè ènyuɛ̃ kè wò le wɔ̀a mè.
*
9Ne màjɔ̀ màjɔ tɛ àmèwo ɖotoa, wo jènàhùɛ,
wo dona àpa sɔ jina àlɔ̀do ɖo ŋusɛ̃tɔwo be ènu drã wɔ̀wɔ ŋuti.
10Vɔ̀ àmè ɖe mu biɔna sè be: “Mawu kè ɖo mù a ɖe ò?”
Fikɛ be lè ò, e ye kè nana wo kpànà èhà lè èzãa,
11e ye kè fiɔna mi ènu to ègbemèlãwo jia,
kè ɖènà ènunya na mi to àyamè xèviwo jia?”
12Àmè sia àmè ye le do àpa le biɔ àlɔ̀do
ɖo àmè bàɖàwo be ègòyiyi ŋuti vɔ̀,
Mawu mu le kè ènu do e mè ò.
13Aò, Mawu Ŋusɛ̃kpatatɔ mu le ɖoto woabe ènyà mà-ɖo ètùa ò,
yebe susu cã mu lè e ji ò.
*
14Mu le ɖoto èwò Yɔb cã ò, ne wò le gblɔ̃ be:
“Nyè mu le kpɔ Mawu ò, e nya àpe ènyàa,
eye mù kpɔ̀tɔ̀ le kpɔ yebe àsinu kòkòkò”.
15Nyàwoa, Mawu mu ɖènà yebe àdɔ̀mèze fiɔ ò,
e wɔ̀nà sìgbè àmè kè ŋlɔ̀be àgbètɔ be àglajèje nène.
16Ènu kè ŋutia, ye nyi be Yɔb kè ènu le pò nupo ɖo àyamè,
e le pò nupo yùu, sìgbè àmè kè mu le nya ènu òa nène.
Currently Selected:
Yɔb 35: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
