Yɔb 34
34
Èlìhu dohùɛ do Yɔb
1Èlìhu yì e ji gblɔ̃ na Yɔb be:
2Mì àmè kèwo nyi ènunyatɔa, mì ɖoto mù.
Mì hũ mìabe ètowo, mì àɖàŋùɖètɔwo.
3Ɛ̃ɛ, èto ɖɔna ènyà sè sìgbè
lekè ènu ɖɔna nuɖùɖu kpɔa nène.
4Mi ji ènu kè lè jɔ̀jɔɛa ɖodu,
mi le ŋùku ɖo ènu kè nyɔa ŋuti ɖodu.
*
5Yɔb gblɔ̃ be: “Mù nyi ɖemànyatɔ,
vɔ̀ Mawu mu sònà jɔ̀jɔɛ na mù ò.
6Mù la ɖàjè ɖo jɔ̀jɔɛ nyinyi nyèa jia?
Nyè mu wɔ̀ èvuɛ̃ ò, vɔ̀ co e do èku-bi ŋuti nyè.”
7Àmè kɛ ŋutɔ ye nyi Yɔb kèa?
Àmè kè le zũ Mawu sìgbè lekè wo nùnà èsìa nène.
8E le yì kudo ènu bàɖàwɔ̀tɔwo,
e nɔ̀nà àmèdrãwo be àhàda mè.
9Nyàwo e gblɔ̃ be: “Àlè ɖekpe mu lè
ne wo jè àgbàgba sɔ jè Mawu be ŋùmè ò.”
*
10Mì àmè kèwo àyè sɔ̀gbè na a, mì ɖoto mù!
Mawu mu ɖona ènu bàɖà wɔ̀nà ò,
Ŋusɛ̃kpatatɔa mu la teŋu nyi màjɔ̀ màjɔwɔ̀tɔ ò!
11Vɔ̀ e nana ènu kè jè na àmèa,
e kplɔ̀nà àmè sɔ zɔ̃ ɖo yebe àgbènɔ̀nɔ ji.
12Ɛ̃ɛ nyàwo! Mawu mu wɔ̀nà bàɖà gbèɖe ò,
Ŋusɛ̃kpatatɔa mu dànà lè jɔ̀jɔɛ ji ò.
13Ne e lè nènea, àmè kɛ ye la kè sɔ ànyigbã do àsi na ɛ̀ ò?
Vɔ̀ e ye ɖèka kpò ye le kpɔ xixea keŋu ji.
14Ne Mawu kè le bù ye ŋutɔ kpò be èta mèa,
ne e trɔ xɔ̀ yebe àgbè gbɔ̃gbɔ̃a,
15ènu àgbèagbèwo kpata la ku zè ɖèka,
eye àgbètɔwo la trɔ zũ ɖiɖɔɛ.
*
16Yɔb, ɖoto, ne wò nyi ènunyatɔa,
le ŋùku ɖo ènyà nyèawo ŋuti.
17Mawu la teŋu kplɔ̀ xixea ne e nyi be mu lɔ̃ jɔ̀jɔɛ òa?
E la jro wò be wòa gblehùɛ do
àmè ɖèka pɛɛ kè ɖo ŋusɛ̃ gbà lè jɔ̀jɔɛa?
18E ye ɖèka kpò ye teŋu kpɔ èfìɔ ɖe be mu gbà nyɔ na ènu ɖe ò,
ye ɖèka ke la teŋu gblɔ̃ na àmègãwo be: “Mì nyi gbevũwo.”
19Mu dona èha kudo àmègãwo ò,
mu wɔ̀nà kudo ècitɔ nyuɛ̃ ɖe wu wɔ̀amènɔ̀ ò.
Nyàwoa, e ye ɖo wo àmè èvèa kpata.
20Àmè gãwo kuna kpàtà lè èzã mè:
dùkɔ̃a tɔ̀nàzi eye wo wùnà kplɔ̀tɔwo.
Àmè nyrãkuwo crɔ̃na àgbàgba ɖe màje.
21Ɛ̃ɛ, Mawu ɖiana àmèwo be wɔ̀na,
e kpɔna ènu kèwo keŋu wo le wɔ̀a.
22Èzã ɖe àlo vìvìti klìko ɖe
mu lè ne woa sɔ wla àmè bàɖàwo ò.
*
23Mawu mu hiã la kplɔ̀ àmè ɖe yì kòjo mè ò.
24E ɖiɖina ŋusɛ̃tɔwo kè mu yì jina ènu ɖe gɔ̃mè kpɔ ò
eye e sɔna àmè bu dà ɖo woa tèpe,
25ɖo e nya ènu kè wo le wɔ̀a. E ɖènà wo jo
èzã-èzã eye wo mu gbà ɖìnà ènu ɖe ò.
26E pònà wo lè àgũdòmè sìgbè èhlɔ̃dãtɔwo nène.
27Àmè kèawo mu jro la jè Mawu yomè ò,
wo mu sè yebe ènufiɔfiɔa gɔ̃mè ò.
28Nène a, wo na wɔ̀amènɔ̀wo do àpa yɔ Mawu.
Eye Mawu sè ènuwɔ̀donɔ̀wo be àpadodowo!
*
29Lè ègo bu mèa, ne Mawu mu kè ènu òa, àmè kɛ ye la gblehùɛ do è ò?
Ne e wla yebe ŋùmèa, àmè kɛ ye la teŋu jè àgbàgba la kpɔ ɛ̀ ò?
Co, e lenabè na àmè sia àmè lè ànyigbã ji.
30Mu sɔna àmè bàɖà sɔ ɖona kplɔ̀tɔ ò,
àmè kè la blè dùkɔ̃a.
31Mi sɔ ɛ̀ kpò be àmè ɖe gblɔ̃ na Mawu be:
“Mù jè àgɔ̀, nyè mu la gbà wɔ̀ ènu bàɖà ke ò.
32Na ma kè ɖo àgɔ̀jèje nyè wawlawo ŋuti.
Ne mù wɔ̀ bàɖàa, nyè mu la gbà wɔ̀ ɖe ò.”
33Lè gbɔ wòa, Mawu ɖo la dɔ̃to na ɛ̀a?
Mù nya be e le ɖì kòkoe na wò.
Kè e nyi be èwò ye le ɖè ègbè ɖo tèpe nyèa,
gblɔ̃ ènu kè wò nyaa na mù.
*
34Àmè kèwo susu sɔ̀gbè na kudo ènunyatɔ
kèwo ɖoto mù a, la gblɔ̃ na mù be:
35“Yɔb le pò nupo sìgbè àmè mànya ènu nène.
Yebe ènyàwo mu jègà ò.
36E le pò nupo sìgbè àmè bàɖà nène,
eŋuã, wo ɖo la le ŋùku ɖo yebe ènyà ŋuti nyuɛ̃ ɖe.
37Nyàwoa, to e gbɔ be e wɔ̀ èvuɛ̃ coa,
wu ekèa, àmè jèagla ye be trɔ zũ.
Kè be kpɔ̀tɔ̀ le ji ènyà lè Mawu ŋutia,
e do tìtɔ̀ titɔ mia dòmè.”
Currently Selected:
Yɔb 34: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
