Yɔb 33
33
Èlìhu tɛgbè ɖo e ji be Mawu pònà nupo na àmè
1Yɔb, mù trɔ va gbɔ wò, ɖoto mù.
2Kpɔɖa mù le kè ènu ne ma gblɔ̃ ènyà.
3Mù la gblɔ̃ ènyà na wò so kaka èjì mè ke,
ɖoto ènu kè mù nyaa.
4Mawu ŋutɔ be gbɔ̃gbɔ̃ ye wɔ̀ mù
eye Ŋusɛ̃kpatatɔa be àya puplu ye na mù àgbè.
5Ne wò teŋuã, ɖo ènyà ŋuti na mù fàa.
6Mù nyi àmè sìgbè èwò ke nène lè Mawu be ŋùmè,
ànyikɔ ke wo sɔ wɔ̀ nyè cã.
7Vɔ̃vɔ̃ mu gbà ɖo wò klua ò.
Mù gbà susu be mù ɖo ŋusɛ̃ sɔ zĩ yè ji ò.
*
8Ènyà kèwo wò gblɔ̃a, gbà le ɖì lè èto mè na mù
kè wò le tɛgbè ɖo e ji be:
9“Mù kɔ̀ mà-ɖo xàxa ɖe.
Mù nyi ɖemànyatɔ nyàwo.
10Vɔ̀, Mawu ji ènu kè be la sɔ dohùɛ do mù,
ye be la sɔ mù sìgbè yebe kɛ̃tɔ nènea.
11E do mù àmèviga,
eye e le ɖia àpe àfɔ̀topewo.”
12Mù ɖo la gblɔ̃ ekèa na wò Yɔb be:
Àpo ènyà mu jɔ̀ lè fikèa ò.
Nyàwoa, Mawu wugã àgbètɔ.
13Eŋuã, nukɛ ŋuti ye wo la hɛ̃ ènyà kudo è ɖo ò,
àlo kè mu le ɖo ènyà kèwo wò le biɔ ɛ̀a, ŋuti òa ye à?
*
14Co Mawu pònà nupo to wɔ̀na vòvòvòwo mè,
vɔ̀ mi mu ŋɔnajè e mè kaba ò.
15Wàlɛbɛ kè àmèwo mlɔ̃ ànyi lè èzã mè,
le dɔ̃ àlɔ̃ ku bòbò lè woabe dɔ̃bawo jia,
Mawu pònà nupo to èdrɔ̃kuku kudo ŋùtègãwo mè.
16E hũnà èto na wo,
e ɖona àfɔ̀ àfɔ̀ ji na wo cã ne
17bèa ɖè àmèwo to lè woabe ènudrãwo mè,
eye woa na àsà ègòyiyi.
18Nène a, e la xɔ̀ woabe èkla lè èku si,
e la ɖè wo to lè èkuwode be èmɔ̃a ji.
*
19Vɔ̀ Mawu dɔ̃nà èto na àmè to èdɔ̀lele mè
wàlɛbɛ kè be le è pu àba jia. E hũhũna tìtìtì,
20ènu mu nyana ɖùnà na ɛ̀ ò,
kaka jè ènuɖùɖu kè jɔ̀nàjì na ɛ̀a cã ji.
21E ɖìnàkù kaka yebe èpuwo ŋutɔ cã zena klàyòo.
22Yebe àfɔ̀ ɖèka ɖo èyɔ̀mè xoxo,
yebe àgbè lè èku be àsi mè.
23Vɔ̀ Mawu be àtikplɔtɔ àkpe àkpewo
dòmètɔ ɖe teŋu nɔ̀ èdɔ̀nɔ̀ ŋua gbɔ,
sɔ nɔ ɖoŋùku yebe èdɔ do àsiwo ji na ɛ̀.
24Àtikplɔtɔa la ku ŋuzĩzĩ na ɛ̀ eye e la gblɔ̃ na Mawu be:
“Mù gbà lɔ̃ ne bèa ɖota èyɔ̀ mè ò,
mù kpɔ àjɔ̀ kè mù la sɔ hlùɛ̃ ɛ̀ gãa.”
*
25Nène a, èdɔ̀nɔ̀a kpɔna ŋusɛ̃
yeye eye e trɔ gbɔ̀nà àgbè.
26E la fã yɔ Mawu kè la sè yebe kuefãa kudo àdɔ̀mè nyuɛ̃.
E la dɔ̃ gogo Mawu ku jìjɔɛ, ɖo e hlùɛ̃ ɛ̀ gã.
27E la jì èhà lè àmèwo be ŋùkɔ̀ gblɔ̃ be:
“Mù jè àgɔ̀ sã, nyè mu wɔ̀ ɖo èsea ji ò.
Vɔ̀ Mawu mu dɔ̃ èto na mù sìgbè lekè e jèa nène ò.
28E xɔ̀ mù lè èku simè, mù kpɔ àgbè
eye mù gbà le kpɔ kɛ̃klɛ̃a.”
*
29Ɛ̃ɛ, Mawu le wɔ̀ ekèawo kpata na àgbètɔ be nyɔna,
eye mu gɔ̃ ɛ̀ mà-wɔ̀ gbèɖe ò.
30E le ji kpò be yèa xɔ̀ wo lè èku si
eye ne àgbè be kɛ̃klɛ̃a ne kɔ̀ na wo.
31Yɔb, ɖoto mù nyuɛ̃ ɖe! Bɔ̀ ènu,
ènyà gbà lè àsi nyè ma gblɔ̃ na wò.
32Ne wò ɖo ènyà ɖe la gblɔ̃a,
pò nupo ɖo mù le ji la sò jɔ̀jɔɛ na wò.
33Ne wò mu ɖo ènyà ɖekpe la gblɔ̃ òa, eŋuã ɖoto mù.
Bɔ̀ ènu kpoo ne ma fiɔ wò ènunya.
Currently Selected:
Yɔb 33: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
