Yɔb 28
28
Fikɛ ènunya so ò?
1Nyàwo ye, klòsalò be èkɔ̃wo lè,
eye sìka klɔpewo cã lè.
2Ànyigbã mè ye wo ɖènà gàkpo lè
eye, èkpewo ye wo srènà sɔ wɔ̀nà gàjɛ̃.
3Ànyigbã mè be ènujitɔwo hɛ̃nà kɔ̀kɔ̀ɛ yìnà ànyigbã gɔ̃mè.
Wo yì jina ànyigbã mè be àdɔ̀kùnuwo kito-kito, lè gòglòpe cicriwo.
4Wo kùnà ànyigbã lè tèpe kèwo mu gogo àxue gbɔ òa.
Lè fikè àmè be àfɔ̀ sònà lèa,
ànyigbã mè be ènujitɔwo nɔ̀nà èkàwo ŋuti yìnà gbɔ̀nà.
5Ènuɖùɖu sona ànyigbã mè,
vɔ̀, sìgbè pòdomè nènea,
e titɔ kudo èzò bìnuwo.
6Sàfirò-kpe lè yebe èkpewo mè,
yebe ɖiɖɔɛ mè ye wo ɖènà sìka lè.
7Èhɔ̃ mu nyana èmɔ̃ ŋua lè ànyigbã gɔ̃mè ò,
xèvi gãgãwo cã mu kpɔ wo kpɔ ò.
8Ègbemèlãwo mu kè ɖo e ŋuti kpɔ gbèɖe ò,
jãŋùta mu yì ɖìsà to funu kpɔ ò.
9Vɔ̀, àgbètɔwo yì kpena àkɔ kudo àkpã sɛ̃sɛ̃,
eye wo kùnà ètowo kaka yì kɔ̀nà ɖo woabe èkè ŋuti.
10Wo ɖènà àfĩdowo ɖo àkpãwo mè,
eye wo jina ènu kèwo ɖo àsìxɔ̀xɔa.
11Wo puna èsìdowo, eye wo yì ɖènà
ànyigbã be àdɔ̀kùnɔ̀ wawlawo to.
*
12Vɔ̀, fikɛ ye wo la kè ɖo ènunya ŋuti lè ò?
Eye ènunya be jɔ̀sope ɖe?
13Àgbètɔ mu nya yebe xòmè ò,
eye wo mu kpɔna ɛ̀ lè àgbètɔwo de ò.
14Àpù gã gblɔ̃ be: “Mu nɔ̀nà fikèa ò.”
Eye àpù tɛgbè ɖo e ji be: “Mu lè gbɔ nyè ò!”
15Wo mu la teŋu ɖɔ̀lì ì kudo sìka kɔ̃ kè kɔ̀ ò,
wo mu la teŋu plè è kudo ègà sùgbɔ ò.
16Sìka kè kɔ̀ ŋutɔa, Kɔ̀rnàlinà-kpe xɔ̀ci
àlo Sàfirò-kpe cã mu xɔ̀ yebe àsì ò.
17Sìka àlo klisì cã mu teŋu sɔ̀ kudo ènunya ò.
Wo mu la teŋu sɔ sìka kɔpò ɖèka cã sɔ plè è ò.
18Mi mu la gbà gblɔ̃ Kristalò ku Kòrayì tɔ̀ ò.
Ènunya be àsìxɔ̀xɔ to jònuwo tɔ̀ ŋuti.
19Ètiopìa be Tòpazò cã mu sɔ̀ kudo è ò,
Sìka kè kɔ̀a cã mu sù ì ò.
*
20Vɔ̀, fikɛ ye ènunya so ò?
Eye ènunya be jɔ̀sope ɖe?
21E wla do àmè àgbèagbèwo kpata,
àyamè xèviwo mu le kpɔ ɛ̀ ò.
22Èku kudo èkuwode gblɔ̃ be:
“Ɛ̃ɛ mi sè wo gblɔ̃ yebe ènyà.”
23Vɔ̀ Mawu ye nya yebe èmɔ̃,
e nya fikè be nɔ̀nàa.
24E ye le kpɔ kaka ànyigbã be vɔ̀vɔnu ke,
eye e le kpɔ ènu kèwo lè xixea mèa kpata.
25Nyàwo, e ye na ŋusɛ̃ àya pòpo,
e ɖo jije ɖo èsì ŋuti,
26e ɖo lipò na èji jàja,
eye e ta èmɔ̃ na èji be ègbè ɖèɖe.
27Wàlɛbɛ ŋua, Mawu kpɔ ènunya eye e kafu ì.
E do è jèsi eye e jro la kpɔ yebe àsìxɔ̀xɔ.
28E yomè a, e gblɔ̃ na àgbètɔ be:
“Bù Tɔhonɔ̀, ekèa ye nyi ènunya!
Si lè èvuɛ̃ gbɔ, e ye nyi ènunyaa!”
Currently Selected:
Yɔb 28: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
