Yɔb 27
27
Ɖemànyatɔ
1Yɔb yì yebe ènyà ji gblɔ̃ be:
2Mù le tànu lè Mawu àgbè-àgbè
kè mu le ji la sò jɔ̀jɔɛ na mù ò, lè Ŋusɛ̃kpatatɔ
kè na àpe èjì le sè vevea be nyikɔ mè be:
3Kaka kè mù kpɔ̀tɔ̀ le gbɔ̃a,
kaka kè Mawu be gbɔ̃gbɔ̃ gbà lè ètù mè na mù a,
4nyè mu la gblɔ̃ àjè-nya ɖekpe ò,
ènu nyè mu la ɖà àjè ò.
5Nyè mu la lɔ̃ gbèɖe be mìabe ènyà jɔ̀ ò!
Mù la kpɔ̀tɔ̀ nɔ gblɔ̃ be mù nyi ɖemànyatɔ
kaka sɔ èta yì èyɔ̀ mè.
6Mù le tɛgbè ɖo e ji ku ŋusɛ̃ be wɔ̀na nyèa sɔ̀gbè,
eye nyè mu la gbà gblɔ̃ èbu gbèɖe ò.
Àgbè nyè mu le wɔ̀ ŋùkpɛ̃ na mù ò,
jìjigbè nyè mu le dohùɛ ɖe do mù ò.
*
7Kɛ̃tɔ nyè ye wo ɖo la wɔ̀ kudo sìgbè àmè bàɖà nène!
Àmè kè sitè ɖo ŋuti nyèa ye ɖo la vɔ̃
sìgbè ènu bàɖàwɔ̀tɔ nène!
8Nyàwo, ŋùɖo kɛ ye gbà lè àmè bàɖà si
wàlɛbɛ kè Mawu sò, àlo ɖè yebe àgbè kaa jo ò?
9Mawu sènà yebe àpa dodo ne gbledo cɔ̃ ɛ̀ vĩ ìa?
10E kpɔna jìjɔɛ lè Ŋusɛ̃kpatatɔ mèa?
E dona àpa yɔ ɛ̀ gà sia gàmèa? Nyè mu xɔ̀ ɛ̀ sè ò!
11Nyè ya mù la fiɔ mì lekè Mawu wɔ̀nà ɖoa,
nyè mu le wla ènu kè be bùnà kpɔ
lè ye ɖokoe mè kèa, do mì ò.
12Mìa ŋutɔ mì kpɔ ɛ̀ ku ŋùkuwo.
Nène a, nukɛ be ènyà ye gbà nyi gbogbo ŋua ò?
Mawu be ɖoɖɛ na àmè bàɖàwo
13Ènu kè Mawu jràɖo dàɖɛ na àmè bàɖàwo,
àkpa kè ye ènudrãwɔ̀tɔwo la xɔ̀ so Ŋusɛ̃kpatatɔa gbɔa, ye nyi èku.
14Ne wo jì èvi sùgbɔa, wo la ku ci àhùa,
eye woabe èviwo mu la kpɔ ènu ɖekpe la ɖù ò.
15Àmè kèwo la kpɔ̀tɔ̀ ci àgbèa, èdɔ̀ vuɛ̃ la kplɔ̀ wo yì èyɔ̀ mè.
Eye woabe àhòsìwo mu la teŋu fã woabe àvi ò.
16Ne e bɔ̀ ègà ɖɛ sìgbè ɖiɖɔɛ nène,
eye be bɔ̀ àwùwo ɖɛ sìgbè bàba nène cã a;
17ne yì e ji kpò!
Ànùkuamè ɖe ye la va do àwùawo,
ɖemànyatɔ ye la va zã ègàa.
*
18Àmè bàɖàwo be àxue mu linakè ò,
e nɔ̀nà sìgbè èzãɖiatɔ be àgbàdo nène.
19Wo mlɔ̃na ècitɔ be ànyi na memlɛ̃a, ɖo ne wo va fɔ̃a,
ènu ɖekpe mu gbà nɔ̀nà ànyi ò.
20Vɔ̃vɔ̃ sònà wo do sìgbè èsì kè gbãgoa nène.
Lè èzã mèa, èsì ɖɔɖɔ kplɔ̀nà wo yìnà.
21Àya sɛ̃ŋu ɖe sɔna wo ɖonu kplɔ̀nà wo yì boo,
e ɖènà wo jo lè woabe àxuewo mè.
22Mawu dànà yebe àŋùti àmè bàɖàwo ŋùgbe màkpɔ.
Wo ɖo la si lè yebe àlɔ̀ sɛ̃ŋua be ŋùkɔ̀.
23Àsikpe wo la pò ɖo woabe cɔ̃crɔ̃a ŋuti.
Àkui lìɔliɔ ye kplɔ̀nà wo do lè fikè wo toa.
Currently Selected:
Yɔb 27: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
