Yɔb 21
21
Gbledo mu jènà àmè bàɖà ji ò
1Yɔb ɖo e ŋuti na èxlɔ̃awo be:
2“Mì ɖoto ènyà kè mù le ji la gblɔ̃a nyuɛ̃ ɖe,
nène ye mì la do bàbà na mù.
3Mì na ne nyè cã ma pò nupo jro.
Sofà, ne mù bɔ̀nu vɔ̀a,
wò teŋu kò mù fàa.
4Àmè ɖe ye mù le jèhùɛ na a?
Mù le ciji gbalo ye à?
5Mì kpɔ mù nyuɛ̃ ɖe: e la wɔ̀ ŋùdã na mì,
eye mì la do àlɔ̀vi ènu mè, la bɔ̀nu kpoo.
6Vɔ̃vɔ̃ ye le ɖo mù kè mù le bù ènu kè
le wɔ̀ mù a ŋuti kpɔa eye mù le hũhũ tìtìtì.
*
7Nukɛ ŋuti ŋutɔ ye àmè bàɖà kpò ye nɔ̀nà àgbè dìdi ò?
Nukɛ ŋuti ŋusɛ̃ gbà kpɔ̀tɔ̀ nɔ̀nà e ŋuti ne e le sĩ cã ò?
8Èviawo cã kãna ɖo e ji,
tɔgbe-yɔviawo sĩnà lè yebe àkɔ mè.
9Ènu sia ènu zɔ̃nà sùu na ɛ̀, vɔ̃vɔ̃ ɖe mu lè ò
eye Mawu mu pònà ɛ̀ gbèɖe ò.
10Yebe ènyì-suwo dona-àsu sɔ nana àgbè godoo,
yebe ènyìnɔwo jìnà èvi ɖo gàmè eye ɖekpe mu kuna ò;
11E nana yebe ɖèkajɛviwo puna èdù,
tìnàkpo sìgbè ègbɔviwo nène,
eye yebe tɔgbeyɔviwo gblena lè vòvo fɛ̀ɖɛ̀ mè.
12Wo jìnà èhà, pònà àsihũvi kudo kàsãŋùgu,
wo ɖunawè ɖo èkpɛ̃ be ɖìɖi ji,
13Woabe àgbèa nyina nyɔna ɖèɖe,
wo yìnà èkuwode lè ŋuti fàfa mè.
*
14Co wo gblɔ̃nà na Mawu be: “Tàsi mi ne mia vò,
mu hiã be mia nya ènu kè wò le ji ò!
15Èwò kè wo yɔna be Ŋusɛ̃kpatatɔa,
nukɛ ye wò nyi ne mia trɔ zũ àpo kluviwo ò?
Àlè kɛ ye mi la kpɔ xɔ̀ ne mi le fãkue na wò ò?
16Nyàwo, àmè ŋuawo mu ɖo ŋusɛ̃ ɖekpe ɖo woabe nyɔna ji ò.
Mawu mu gbà jro ne ma do àfɔ̀ woabe àfɔ̀dowo mè ò!
17Vɔ̀, woabe àgbè kãligbɛ̃ a cã cina kplò ha ɖèkaa?
Vlàvò ye gbledo vana woa ji eye
Mawu be àdɔ̀mèzea cã gblena woabe ènuwo.
18Woa cã wo nɔ̀nà sìgbè èbèyɔɛ kè àya le kplɔ̀ le yìa nène,
sìgbè àmàkpa pupu kè àya sɛ̃sɛ̃ lɔ ɖo ènu le yìa nènea?
*
19Vɔ̀, mì le gblɔ̃ be: “Mawu dɔ̃nàto
na àmè ŋuawo to woabe èviwo ji.”
Woa ŋutɔwo ye be ɖo la dɔ̃to na
eye wo la sè e mè!
20E jè be àmè bàɖà ŋutɔ ne kpɔ yebe gbledo,
ne ɖɔ Ŋusɛ̃kpatatɔa be àdɔ̀mèzea kpɔ!
21Nyàwo, ne e kua, ne yebe èpèwo nu va yìa,
èviawo be àgbè mu la gbà wɔ̀ ènu ɖe na ɛ̀ ò.
22Vɔ̀ àmè ɖe la teŋu yì fiɔ ènu kè jèa Mawu a?
Mawu mu ɖona kòjo kudo yebe àtikplɔtɔwo ŋutɔ cã a?
*
23Ŋusɛ̃ gbà nɔ̀nà àmè ɖewo ŋuti gbɔ̀xue wo kuna.
Nyɔna mè ye wo nɔ̀ eye ènu ɖe mu jɔ̀ ɖo woa ji va yì ò.
24Wo lòlò, do àmì, àgbè gbà lè woa mè.
25Àmè ɖewo kuna kudo vevesèse,
kè wo mu ɖɔ nyɔna ɖe kpɔ òa.
26Woa kpata wo yì ànyigbã mè
eye èŋɔviwo la ɖù wo.
27Ɛ̃ɛ, mù nya ènu kè mì le susua
kudo ènu kè lè ètago mè na mì ɖo ŋuti nyèa.
28Mì le gblɔ̃ be: “Fikɛ ènudrãwɔ̀tɔa be nɔ̀pea lè ò?
Eye àmè bàɖà be àxuea ɖe? Ɖekpe mu lè ò!”
*
29Vɔ̀, mì mu biɔ ènyà èmɔ̃zɔ̃tɔwoa?
Mì mu la xɔ̀ woabe ènyà ŋuti ɖoɖo a ji sèa?
30Ne gbledo vaa, mu jènà àmè bàɖà ji ò,
Mawu be àdɔ̀mèze mu kɔ̀nà ɖo e ji cã ò.
31Àmè kɛ ye la teŋu yì nɔ̀tè lè ŋùkɔ̀ na ɛ̀, la hɛ̃nyà kudo è ò?
Àmè kɛ ye teŋu tu ènu kè be wɔ̀a be èfɛ̃ na ɛ̀ ò?
32Ne àmè kèa kua, wo la yì dà ɛ̀ ɖo àmèɖìbɔmè.
Wo ɖiana yebe èyɔ̀doa,
33eye ànyigbã bɔ̀bɔ̀nà na ɛ̀.
Àmè buwo la gbà jè e yomè.
Àmè kèwo jè ŋùkɔ̀ na ɛ̀a, wo sùgbɔ fuu;
*
34Àsìxɔ̀xɔ kɛ ye lè mìabe bàbà do na àmèawo si ò?
Mìabe ènyà ɖoŋutiwo nyi àjè sɔ̃ŋu!”
Currently Selected:
Yɔb 21: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
