Yɔb 20
20
Àmè bàɖà be nyɔna mu dɔ̃na ò
1Sofà so Naamà sɔ ènyà gblɔ̃ na Yɔb be:
2Kè mù le bù èta mèa, e jro mù be ma ɖo e ŋuti.
Eye nyè mu teŋu lè le ɖokoe nyè
3kè mù le ɖoto àpo ènyà kèwo nyi àmè zũzũ a ò.
Vɔ̀ susu nyè na mù ɖoŋuti ɖe.
4So xoxoa, so gà kè mè
àgbètɔ xòmèa va ànyigbã jia,
5Àmè bàɖà be jiɖùɖu mu dɔ̃na ò.
Àmè bàɖà be jìjɔɛ nɔ̀nà kpòeɖe.
Yɔb, wò mu nya ekèa?
*
6Ne àmè bàɖà gbà yì ji glòjò wu jiŋùkusi ŋutɔ cã,
ne yebe èta gbà tɔ lilikpowo cã a;
7e la crɔ̃ gbidi sìgbè ènu kè to lè àdɔ̀mè nène.
Àmè kèwo la kpɔ èa, la gblɔ̃ be: “Fikɛ be lè ò?”
8E sina yìnà sìgbè èdrɔ̃kuku nène,
eye wo mu gbà kènà ɖo e ŋuti ò.
E buna sìgbè ŋùku blè àmè zãmè nène.
9Wo mu la gbà kpɔ àmè kè wo kpɔna eji-eji sãa gbèɖe ò.
Wo mu la gbà kè ɖo e ŋuti lè yebe nɔ̀pe cã kpɔ ò.
10E ɖo la gble yebe àdɔ̀kùnuwo ɖɛ,
eye èviawo ɖo la tu èfɛ̃ kèwo keŋu be ɖù a.
11Ŋusɛ̃ lè e ŋuti sãa lè ɖèkajɛmè,
vɔ̀ ŋusɛ̃ ŋua le yì èyɔ̀ mè kudo è.
*
12Ènu bàɖà wɔ̀wɔ vivina na àmè bàɖà:
e wlana ɛ̀ ɖo yebe àɖe gɔ̃mè.
13E bùnà e ŋuti sìgbè lekè wo gbigbɔ̃na kpɛ̃tikè nène,
e nɔ̀nà ènu mè na ɛ̀ gà sia gàmè.
14Vɔ̀ yebe ènuɖùɖu trɔna
èdã be àɖi lè àdɔ̀mè na ɛ̀.
15E ɖo la trɔ jo àdɔ̀kùnɔ̀ kèwo be gbĩ lè àmèwo sia na.
Mawu le ɖè wo to lè yebe àdɔ̀mè.
16E la gbigbɔ̃ èdã be àɖi eye àɖia
la wù ì sìgbè èdã ye ɖù ì nène.
*
17Àmè bàɖà be ènu mu la gbà tɔ ànyisì ɖe,
kaka la jè bɔtà gbogbowo ji ò.
18E la jo èdɔ kè be wɔ̀a be àlè,
mu la kpɔ ɖekpe ɖù lè e mè ò: e la jo è na ɖɔɖɔ.
19Nukɛ ŋuti ò? Ɖo e zĩ wɔ̀amènɔ̀wo ɖo èto kudo màjɔ̀ màjɔ,
e ɖèkɔ̀ lè woa ŋuti, e xɔ̀ woabe àxuewo
wàlɛbɛ kè ye ŋutɔ la teŋu tù ye tɔ̀a.
20Ènu mu sùnà ɛ̀ gbèɖe ò, ekèa ŋuti ye
mu la teŋu hlùɛ̃ yebe àdɔ̀kùnu ɖekpe ò.
21Àmè sia àmè be ènu jro na ɛ̀ mà jìjɔ.
Ekèa ŋuti ye yebe nyɔna mu la teŋu nɔ̀ ànyi ò.
*
22Ne àmè bàɖà kpɔ èci gbãgoa,
e cina siayi eye gbledo kɔ̀nà ɖo e ji.
23Ne e lɔ ènu ɖekpekpe ɖo ènu le yìa,
Mawu la ɖè yebe àdɔ̀mèzea ɖo e ji.
E la ɖùɖù àdɔ̀mèzea ɖo e ji sìgbè èjijàja nène.
24Ne e si lè kɛ̃tɔ be èwui nua,
e la jè gàjɛ̃ be plɛ̃ŋugò nu.
25Ne e ɖè àŋùti kè ŋɔ àgò na ɛ̀a joa,
èku be vɔ̃vɔ̃ la jè e ji trolo.
*
26Èzã vìtì ye le tɔtè kpɔ àmè bàɖà.
Èzò kè àmè ɖe mu do òa, ye la vũvũ ì.
E la bì ènu kè kpɔ̀tɔ̀ lè yebe àxomèa.
27Jiŋùkusi la kè ɖo ènu bàɖà kè be wɔ̀a ŋuti.
Ànyigbã la sitè ɖo e ŋuti.
28Èsìɖɔɖɔ la kplɔ̀ yebe ènuwo yì,
wàlɛbɛ kè Mawu la ɖè yebe àdɔ̀mèze fiɔa.
29Nène ye Mawu la wɔ̀ kudo àmè bàɖàwo.
Ekèa ye le nyi woabe ècrɔ̃nu.
Currently Selected:
Yɔb 20: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
