Yɔb 19
19
Xɔ̀namètɔ nyèa be ŋusɛ̃ la ze
1Eye Yɔb ɖo e ŋuti na yebe èxlɔ̃wo be:
2“Mì la nɔ do àyà na mù kaka va na gà kɛ mè ò?
Kaka va na gà kɛ mè ye mìabe ènyàwo la crɔ̃ mù sù ò?
3Mì zũ mù dokpò. Èŋù mu le kpɛ̃ mì
be mì le do vevesèse na mù a?
4Mì gblɔ̃ be mù blè ɖokoe nyè.
Ne e gbà nyi nyàwo cã a, e kã mù.
5E lè e mè na mì be nyè ŋutɔ ye ji ènu kè le jɔ̀ ɖo ji nyèa
eye nènea mìabe ènyà la jɔ̀.
6Co, mì ɖo la nya be Mawu ye wɔ̀ màjɔ̀ màjɔ kudo mù,
eye e na mù jè yebe èmɔ̃ mè.
*
7Mù teŋu do àpa ɖo ènu kè le wɔ̀ mù a ŋuti,
vɔ̀ ɖoŋuti ɖekpe mu lè ò. Mù biɔ àlɔ̀do,
vɔ̀ àmè ɖe mu lè la sò jɔ̀jɔɛ na mù ò.
8Mawu xe èmɔ̃ na mù ne nyè mu gbà va yì ò,
e gble mù ɖo vìvìti mè.
9E ɖè bùbu nyèa jo,
e xɔ̀ ènu kè dona jìjɔɛ na mù a.
10E gbã mù gudu-gudu, àfɔ̀ nyè lè èyɔ̀ mè vɔ̀.
E ɖè àpe ŋùɖo sìgbè lekè wo hɔ̃nà àti be èkè nène;
11E le bijì veku-veku ɖo ŋuti nyè,
e sɔ mù sɔ wɔ̀ yebe kɛ̃tɔ.
12Yebe ènu gbletɔwo to èmɔ̃ vòvòvòwo va jòo,
wo va sò àsàɖa ɖo àxàda mè na mù ne woa teŋu va xa mù.
*
13Mawu na xòmè nyèa tè yì ŋùgbe lè ŋuti nyè.
Àmè kè jèsi mù a cã, zɛ̃ na mù.
14Àxuekɔ̀tɔ nyèwo kãhlɛ̃,
eye èxlɔ̃ nyèwo ŋlɔ̀be mù.
15Àmè kèwo mù kpea kudo sumɔ̃vi
nyèwo le kpɔ mù ɖo àmèjro bònu.
Mù trɔ zũ èfũɖènamètɔ na wo.
16Ne mù yɔ sumɔ̃vi nyèa, mu tɔ̀nà ò,
ne mù gbà ɖè kuku na ɛ̀ cã.
17Àpe hɔ̃xuɛ̃ mu gbà le jè e ji na èsrɔ̃ nyè ò,
eye àpe ènu to lè ŋùku mè na nɔ̀vi nyèwo ŋutɔ cã.
18Ɖèvi vifɛ̃wo cã crì mù.
Ne mù le pò nupoa, wo kònà mù.
19Èxlɔ̃ nyè àdodoewo crì mù,
àmè kèwo mù lɔ̃nàa, wo cã trɔ ɖo ŋuti nyè.
20Mù ɖìkù glãyò, kpɔ̀tɔ̀ èpu ɖèɖe
eye gbɔ̃gbɔ̃ kpò ye le mù ɖotè.
*
21Mì ku ŋuzĩzĩ na mù jro mìa èxlɔ̃ nyèwo.
Ɛ̃ɛ, Mawu be àlɔ̀ ye pò mù!
22Mì le do àyà na mù sìgbè Mawu ke nène.
Nukɛ ŋuti ò? Ènu mu tìkɔ̀ na mì ɖo ŋuti nyèa?
23Mù jro be woa ŋlɔ̀ ènyà nyèwo ɖɛ,
ɖo xoma mè dà ɖɛ.
24Ne wo la teŋu ta wo ɖo àkpã mè ɖɛa, e la kè nyɔ;
wo la wɔ̀ wo kudo èpɛ kudo suŋubui be plɛ̃gò.
*
25Mù nya nyuɛ̃ ɖe be ènyàxɔ̀namètɔ nyèa lè àgbè,
eye lè vɔ̀vɔnua, e la sitè lè ànyigbã ji.
26Wàlɛbɛ kè àgbàze nyè la crɔ̃ vɔ̀a,
nyè ŋutɔ, mù la kpɔ Mawu àgbãŋùgbà.
27Ɛ̃ɛ mù la kpɔ ɛ̀ kudo àpe ŋùkuviwo,
nyè ŋutɔ ye la kpɔ ɛ̀ mu nyi àmè bu ò.
Hùe ŋua nu ne va kaba! Nyè mu teŋu le dojì ò.
28Mì la teŋu biɔ be: “Nukɛ mè ye wo teŋu le Yɔb lè ò?
Ènyà kɛ mi la teŋu sɔ ɖo e ŋuti ò?”
29Ɛ̃ɛ! Vɔ̃vɔ̃ ne jè mìa ji, mì la ku lè èwui nu.
Nyàwo, èku ye jè na mì àmè kèwo ye le tĩ yo nyè mè lekea.
Mì ɖo la nya be Mawu ye la ɖokòjo kudo mì.
Currently Selected:
Yɔb 19: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
