Yɔb 16
16
Mawu ŋɛ̃ mù, vɔ̀ mù ɖo ɖàsèfo lè jiŋùkusi
1Eye Yɔb ɖo e ŋuti be:
2Mù sè ènyà kèawo hati fuu va yì.
Sìgbè àsiɖoàkɔnamètɔwo nènea,
mì mu sù na ènu ɖe ò,
3mìa àmè kèwo le gblɔ̃ na mù be:
“Àpo ènyàwo mu ɖo ètù òa,
woa nu la ɖoɖa see zãɖe kèa?”
Gbà wua: “Nukɛ ye na wò le ɖù àyà
kaka ye wò le ɖo ènyà ŋuti nène ò?”
4Ne mì lè tèpe nyèa, nyè cã,
mù la teŋu pò nupo sìgbè mìawo ke nène.
Mù la hũhũ èta nɔ kò mì.
5Mù la pò nupo, do mì ŋusɛ̃ eye mù la pò nupo
ètèmàtɔ sɔ ɖiɖi mìabe vève sèse kpɔ̀tɔ̀.
*
6Vɔ̀ ne mù le pò nupoa, vève sèse nyèa mu vɔ̀nà ò,
ne mù nɔ̀tèa, mu buna ò.
7Eye fifìa, Mawu na ènutìkɔ̀ na mù,
e crɔ̃ àmè kèwo kpata trɔdo mù va yìa.
8E na àgbàze nyè keŋu dɛ̃ eye mù ɖìkù.
Ekèa dohùɛ do mù eye e na mù nyi
àmè kè le hɛ̃ ènu kè le jɔ̀ a va.
9Mawu trɛ̃ mù lè yebe àdɔ̀mèze mè,
e nyà mù ɖo ènu, le ɖù àɖuklui.
E le tɛ̃ ŋùku do mù ɖo e nyi àpe kɛ̃tɔ.
10Àmèwo le pò nupo so ŋuti nyè,
wo le gbã ŋùkumè na mù gbà le zũ mù.
Wo sitè ɖo ŋuti nyè.
11Ɛ̃ɛ, Mawu do mù àsi na ɖèkajɛ
kèwo mu nya ènu ɖekpe òa,
e do mù àsi na àmè bàɖàwo.
*
12Mù lè ŋuti fàfa mè sãa, eye Mawu va ŋɛ̃ mù.
E le èkɔ̀ na mù eye be crɔ̃ mù.
E dà mù yebe àŋùtiwo,
13so àgowo kpata ji.
E ŋɔ àpe àlì, mà kpɔ ɖo e mè na mù,
e na àgò nyè be èsìa ɖùɖù kɔ̀ ɖo ànyigbã
14E jè e ji nyè sìgbè àhùawɔ̀tɔ nène,
e pò mù gbà do àbì ŋuti nyè.
15Mù lè èfũlòlo mè gà sia gàmè,
mù blìbɔ̀nà àfi mè.
16Mù fã àvi kaka àpe ŋùkuwo bìa,
eye ŋùkumè tɛ̃, ci kpɔ̃ na mù.
17Co, nyè mu jèagla kpɔ ò,
mù kpɔ̀tɔ̀ le fãkue kudo èjìmè kɔ̀kɔ̀ɛ.
*
18Ànyigbã! Mù gbà nù àpe èhũ kè wo kɔ̀ ɖɛa ò,
ne woa kpɔ̀tɔ̀ nɔ sè àpe àpa lelele.
19So fifìa, mù ɖo ɖàsèfo lè jiŋùkusi,
ɛ̃ɛ, mù ɖo àmè kè le ɖù ɖase so ŋuti nyèa lè èji hũi.
20Èxlɔ̃ nyèwo le kò mù, vɔ̀,
mù kɔ ŋùku nyè ɖɔ kudo àɖàsìwo yì ji.
21Ɖàsèfo nyèa ne nyi ènyàmèsòtɔ lè nyè
gbàkudo Mawu dòmè, sìgbè xɔ̀namètɔ nène!
22Ɛ̃ɛ, e kpɔ̀tɔ̀ gàmè viɖe na mù ne ma sɔ nɔ̀agbè,
eye mù jè èmɔ̃ ɖe ji, fikè nyè mu la gbà trɔ va ŋùgbe lè ò.
Currently Selected:
Yɔb 16: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
