Yɔb 14
14
Mawu: Tàsi àgbètɔ ne bèa vò
1Àgbètɔ kè jɔ̀ lè nyɔ̃nù be àdɔ̀mèa,
nɔ̀nà àgbè na gàmè viɖe eye e ɖùnà àyà sùgbɔ.
2E tona sìgbè flawà nène, e yomè a, e yrɔ̀nà.
E sina sìgbè vɔ̃vɔ̃lì nène, eye mu nɔ̀nà ànyi kaka yì ò.
3Mawu nyè, e ye wò le ɖiaa!
Ènyè ye wò kplɔ̀ le yì kòjo mèa!
4Àmè kɛ la teŋu ɖè ènu kɔ̀kɔ̀ɛ ɖe
to lè ènu mà-kɔ̀ mà-kɔ mè ò?
Àmè ɖekpe mu lè ò.
5Wò ɖo lipò na àgbètɔ,
wò na hɛ̃hlɛ̃mè yebe wètriwo,
eye mu la wu nène ò.
6Ɖèkɔ̀ kpɔ àfi bu cã! Na ɛ̀ vòvo, ne bèa vɔ̀ yebe àgbèa lè fàfa mè,
sìgbè lekè èdɔwɔ̀tɔ vɔ̀nà yebe ŋùkèkè-dɔa nène.
*
7Ŋùɖo ɖe lè àti ŋuti kòkò: ne wo sò èa,
e la gbà teŋu jè eye be la gbà sɛ̃ku fuu.
8Ne èkè do xoxo lè ànyigbã mè,
eye yebe sòpea wɔ̀ sìgbè ènu kè ku nènea;
9e la gbà teŋu jè, ne èsì viɖe kɔ̀ ɖo e jia.
E la na àlɔ̀zɛ̃wo sìgbè àti yeye bu nène.
10Vɔ̀ ne àgbètɔ ɖe kua, àgbè mu gbà va nɔ̀nà e ŋuti ò.
Nukɛ ŋùkumè be trɔna ne e jo gbɔ̃gbɔ̃a ɖɛ ò?
11Àpùsi la teŋu pu kpakpla,
ètɔ̀ sàsrawo la teŋu mìɔ̃, èsì ɖe mà-ɖo:
12Àmè kèwo kua, mu gbà trɔ fɔ̃na ò.
Wo mu la fɔ̃ lè woabe àlɔ̃wo mè kaka kè xixea kpɔ̀tɔ̀ lè ò.
*
13Mù ji be wòa wla mù ɖo èkuwode,
wla mù ɖo tèpe ɖe kaka àpo àdɔ̀mèzea nu ne va yì.
Nène a, wò la gblɔ̃ wàlɛbɛ kè ye wò la va ɖoŋùku ji nyèa.
14Vɔ̀ àmè kè kua, la gbà teŋu gbɔ̀agbèa?
Ne e lè nènea, mù la ɖo ŋùɖo lè èdɔ sɛ̃sɛ̃ nyèa mè,
kaka na gà kè mè wo la ɖɔ̀lì mù a.
15Wò la yɔ mù eye mù la tɔ̀,
wò la ji la kpɔ ènyè kè wò ɖoa!
16Wò mu la gbà le ŋùku ɖo àpe àgɔ̀jèjewo ŋuti ò.
Vɔ̀ fifìa, wò le hlɛ̃ àpe àfɔ̀ ɖèɖewo ŋutɔ cã.
17Wò wla àpe àglajèje ɖo kòtòku mè eye wò tu ì,
eye wò sɔ àgɔ̀jèje nyèwo kè.
*
18Gãke, èto ɖekpekpe va mùnà,
àkpã ɖe cã va ɖɔ̀lìnà tèpe.
19Èsì teŋu va lìnà èkpewo,
èji-si kplɔ̀nà ànyigbã-kɔ yìnà.
Nène a ke ye wò crɔ̃na àgbètɔ be ŋùɖo.
20Wò dànà ɛ̀ ɖo ànyigbã eye be buna.
Wò trɔna yebe ŋùmè glãsã eye wò ɖona ɛ̀ ɖoɖa.
21Ne yebe viwo va xɔ̀ bùbu cã a, mu nyana ɖekpe lè e ŋuti ò.
Ne wo ɖì wo ègbɔ cã a, mu nyana ɛ̀ ò.
22Àgbètɔ la ɖù àyà na ye ŋutɔ ɖokoe kpò,
ye ŋutɔ be gbledo kpò be èhùɛ be la jè.
Currently Selected:
Yɔb 14: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
