Yɔb 13
13
Mù jro la hlùɛ̃ wɔ̀na nyè lè Mawu be ŋùkɔ̀
1Ènu kèa kpata ye àpe ŋùkuwo ŋutɔ kpɔ,
èto nyèwo sè eye mù sè e mè.
2Mù cã mù nya ènu kè mì nyaa kpata,
nyè mu jɔ̀ èlã wu mì ò.
3Vɔ̀, mù jro la pò nupo na Mawu ŋusɛ̃kpatatɔa,
mù jro la hlùɛ̃ ɖokoe nyè ta.
4Mìa ya, ènukãtɔwo ye kpò mì nyi,
àjè be àmàdàtɔwo mì nyi.
5Ne mì la teŋu bɔ̀nu tètèa!
E la nyi ènunya be jèsì!
6Mì ɖoto àpe ŋùmèkãnyawo, mì le kònu
ɖo ènyà kè mù la sɔ hlùɛ̃ ɖokoe nyèa ŋuti.
7Mì la teŋu xɔ̀ ènyà ɖo Mawu ta, to àjè-nyà gbɔ̃gblɔ̃ mèa?
Nyàwo mì le wɔ̀ yebe jro kudo àjèɖà-nyàwoa?
8Mì lè yebe ènyà ji nyàwoa?
Mì nyi Mawu be lɔyàa àlo àmètahlùɛ̃tɔa?
9Eye ne e trɔ kpɔ mìabe jìjigbèa, e la nyɔ na mìa?
Wo mu blènà Mawu sìgbè lekè wo blènà àgbètɔ nène ò!
10Ne mì mu lè jɔ̀jɔɛ òa, lè wawla mè ŋutɔ cã a,
e la ɖè è fiɔ mì àkòŋùka.
11Yebe ègã nyinyia mu le sò àdìka na mìa?
Vɔ̃vɔ̃ kè lè e ŋutia mu la va gɛ̃ jè mìa jia?
12Nukpakpla kèwo mè mì tonawo cã mu xɔ̀ àsì ɖe wu àfi ò,
eye mìabe susuwo cã flà sìgbè ànyikɔ nène.
13Mì bɔ̀nu! Mì tàsi mù ɖɛ!
Ènyè ye ɖo la pò nupo fifì.
Mi la kpɔ ènu kè la jɔ̀ a.
14Mù sɔ̀gbè na ɖe sia ɖe,
ne e hiã be ma ku ŋutɔ cã.
15Mawu teŋu wù mù fàa,
ènu ɖe mu gbà lè ye mù la hlùɛ̃do na ò.
Vɔ̀ mù jro la hlùɛ̃ ɖokoe nyè ta lè Mawu be ŋùkɔ̀.
16E teŋu va jɔ̀ be wɔ̀nà kèa teŋu hlùɛ̃ mù.
Nyàwo, Mawu mu xɔ̀nà àjèɖàtɔ ɖe ɖo e gbɔ ò.
17Mì ɖoto nyuɛ̃ ɖe sè ènyà kè mù la gblɔ̃a,
mì hũ èto ɖo ènyà gɔ̃mè ɖèɖe nyèwo ŋuti.
18Mì kpɔa, mù jrà ɖokoe nyè be hùɛ̃hlùɛ̃ ɖo,
mù nya be mù nyi ɖemànyatɔ.
19Eŋuã, àmè kɛ ji la dohùɛ do mù ò?
Ne àpe ènyà mu jɔ̀ òa, mù sɔ̀gbè la bɔ̀nu kpoo eye ma ku.
*
20Mawu nyè, na mù ènu èvè pɛɛ,
eye nyè mu la wla lè gbɔ wò boo ò:
21Jè ŋùkɔ̀a, ɖè àpo àbɔ sɛ̃sɛ̃ kè le kpɛ̃ mù a jo,
eye nɔ̀tè vɔ̃vɔ̃ dodo na mù!
22E yomè a, pò nupo eye mù la ɖo e ŋuti,
àlo mù la pò nupo eye wò la ɖo e ŋuti.
23Àgɔ̀ nène ye mù jè ò, èvuɛ̃ nène ye mù wɔ̀ ò?
Ɖè àglajèje kudo èvuɛ̃ nyèwo fiɔ mù.
24Wò le wla àpo ŋùkumè do mù
eye wò sɔ mù wɔ̀ àpo kɛ̃tɔ. Nukɛ ŋuti ye ò?
25Àmè kɛ do ye wò pu dù kplɔ̀ ò?
Wò kplɔ̀ àmàkpa kè àya nyà le yìa do a?
Àmè kɛ ye do wò kplɔ̀ ò? Èbèyɔɛ pupua?
26Wò le ŋlɔ̀ ènyà sɛ̃sɛ̃wo ɖo ŋuti nyè,
wò le dà mù ɖo ɖèkajɛmè be àgɔ̀jèje nyèwo be ŋùkɔ̀.
27Wò le do kɔ̀sɔ̀ kɔsɔ àpe àfɔ̀wo,
wò le ɖia àpe wɔ̀nawo kpata,
wò le le ŋùku ɖo àfɔ̀tope nyèwo ŋuti!
28Eye co, àgbètɔ xòmèa le ɖù sìgbè àti kè nyìnyɔ̀a nène,
àlo sìgbè àwù kè le bea nène.
Currently Selected:
Yɔb 13: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
