Yɔb 12
12
Mawu nyi ètamèsɛ̃tɔ mà kpɔ ŋùgbe
1Nène a Yɔb ɖo e ŋuti be:
2Nyàwo ye, mì nya ènuwo keŋu!
Eye ènunyaa, la ku kudo mì!
3Vɔ̀ nyè ya, mù ɖo ènunya sìgbè mìawo ke nène,
nyè mu jɔ̀ èlã cã, wu mì ò!
4Mù do àpa yɔ Mawu ne ma xɔ̀ ɖoŋuti ye, nukɛ jɔ̀ ò?
Mù trɔ ènu kòkoe na èxlɔ̃ nyèwo
Wo le kò àmè kè le sè ègbè na Mawu
eye be le wɔ̀ ɖo yebe ɖoɖowo jia.
5Àmè kè ènu nyɔ na a, ɖènà sùsu be:
“Ma crì àmè kè ènu gble do a!”
E wɔ̀nà ekèa kudo àmè kè jèanyia.
6Eye gbevũwo vònà lè woabe àxuewo mè.
Àmè kè jina ège lè Mawu ŋutia, nɔ̀nà ètomè fàfa mè.
Mu nya Mawu bu tovò lè yebe ŋusɛ̃ kpò ŋuti ò.
*
7Vɔ̀, biɔ ènyà èlã kèwo lè èkpa wò mèa, wo la fiɔ wò ènu.
Yɔ àyamè xèviwo ne woa gblɔ̃ ènyà yeye na wò.
8Pònu na ànyigbã a, e la na wò kpakplawo,
àpùmèlãwo la kã àseŋu sùgbɔ na wò.
9Tɔhonɔ̀ ye wɔ̀ ekèa kpata.
Èlã kɛ ye mu nya ɛ̀ lè woa kpata dòmè ò?
10E ye le ènu ɖoɖowo kpata be àgbè ɖo yebe ŋusɛ̃ gɔ̃mè,
àgbètɔ xòmèa kpata be àgbè.
11Wo gblɔ̃nà be: “èto lɔ̃nà ènyà sèse
sìgbè àlekè ènu dona vivi nuɖùɖu ŋutia nène.
12Àmè sĩsĩwo be ènyà ye nyina ènunya,
Àmè kèwo kpɔ ènuwo tèpe kpɔa tɔ̀ ye nyi ènunya!”
13Lè nyàwo mèa, ŋusɛ̃ kudo ènunyawo nyi Mawu tɔ̀.
E ɖèka pɛɛ ye ɖo àɖàŋù kudo ènunya.
*
14Ne Mawu crɔ̃ ènua, àmè ɖekpe mu la teŋu trɔ wɔ̀ ɛ̀ ò,
ne e do àmè ɖe ègàkpa mèa, àmè bu ɖe mu la teŋu yì ɖè è to ò.
15Ne e le èjia, ènuwo kpata puna kpakpla.
Ne e gbà tàsi èjia be le ɖùɖùa, e crɔ̃na ànyigbã a.
16Mawu ɖo ŋusɛ̃ gbà bi ŋutɔ. Nusianu nyi e tɔ̀:
Àmè kè le flù kudo àmè kè le flù àmèa.
17E nana èdùkplɔ̀tɔwo zɔ̃nà àfɔ̀ gbalo,
eye e dona kplɔ̀tɔwo àɖàhùa.
18E ɖènà èfìɔwo lè woabe fìɔzìkpe ji
eye e dona gàmènɔ̀tɔ be àwù na wo.
19E nana hũbonɔwo zɔ̃nà àfɔ̀ gbalo
eye e ɖiɖina ekèwo ɖo ŋusɛ̃a.
20E xɔ̀nà ègbè lè àmè kèwo pònà nupo nyuɛ̃ ɖeawo si,
e nana àmè sĩsĩwo be susu titɔna.
21E nana wo crìnà xixea be àmè gãgãwo,
E ɖènà àsi lè àmè sɛ̃ŋuwo ŋuti.
22E nana vìvìtimènu wawlawo kpata tona va gàglà gbè,
e hɛ̃nà ènu kè lè vìvìti mèa va kɛ̃klɛ̃ mè.
23E nana dùkɔ̃wo sĩnà, e yomè a, e crɔ̃na wo.
E nana wo jìnà fuu, e yomè a, e kplɔ̀nà wo yì gàtɔnugbe.
24E ɖènà jɔ̀jɔɛ lè èdùmègawo si,
e nana wo sãnà lè zògbè ji, mà nya fikè wo le yìa ò.
25Wo klɛ̃nànu lè èzã klìko mè,
eye wo ɖiɖina sìgbè àhànùmunɔ̀wo nène.
Currently Selected:
Yɔb 12: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
