Kòjoɖotɔwo 6
6
Gideɔ̀n kudo Abimèlɛk
Izràɛlviwo be ètonu màsè
1Izràɛlviwo gbà le wɔ̀ ènu kè mu jɔ̀nàjì na Tɔhonɔ̀ òa eye Tɔhonɔ̀ ɖè wo do àsi na Madìan-tɔwo xɔ̀ èpè adrɛ̃ sɔ̃ŋu. 2Madìan-tɔwo do àyà na Izràɛlviwo kaka be wo yì si wla ɖo àkpãdowo kudo èto be fɛ̃fɛ̃wo gbàkudo ètowo mè. 3Eye ne Izràɛlviwo gbe dà àgblè eye ènukuwo wɔ̀ kpòa, Madìan-tɔwo kudo Àmàlɛkviwo gbàkudo èwèzɛ̃pe be ŋusùwo va xa na wo lè nuku yàya be hùenu. 4Wo va sònà kɔpe ɖo Izràɛl be ànyigbã ji eye wo crɔ̃na ènu sia ènu kaka va ɖo na Gazà be èdùa gbɔ. Wo mu gblena ènu ɖe dà ɖɛ na Izràɛlviwo ne woa teŋu sɔ nɔ̀ àgbè ò: àgblè-nukuwo, àlɛ̃wo, ènyìwo, èsɔ-àkɛtɛwo kpata. 5Nyàwo be nyi be wo va kudo woabe èlãhawo gbàkudo woabe ègòxɔwo va sònà kɔpe. Wo vana lè gbɔsùsu mè sìgbè hùesuviwo nène eye wo gɛ̃na ɖo ànyigbã ji crɔ̃na ènuwo keŋu. 6Ekèa na be àdɔ̀toto gãaɖe va Izràɛlviwo dòmè eye le ènuhàha blibo mèa, wo fã yɔ Tɔhonɔ̀ ne bèa xɔ̀ na wo.
7Kè Izràɛlviwo biɔ Tɔhonɔ̀, ne bèa xɔ̀ wo lè Madìan-tɔwo si mèa, 8e ɖo yebe gblɔ̃ɖɛtɔ ɖèka ɖoɖa wo gblɔ̃ be: “Tɔhonɔ̀, Izràɛl be Mawu a gblɔ̃ be: “Ènyè ye kplɔ̀ mì to lè Ejiptè, fikè mì nyi kluviwo lè sãa. 9Mù hlùɛ̃ mì lè Ejiptè-tɔwo kudo àmè kèwo keŋu le tɛ mì ɖoànyia si mè. Mù nyà mìabe kɛ̃tɔwo lè ŋùkɔ̀ na mì kaka yì sɔ woabe ànyigbã na mì. 10Mù ku ì ɖo èto mè na mì be mù nyi Tɔhonɔ̀ mìabe Mawu. Mì mu gbà sumɔ Amɔrìtɔ kèwo be ànyigbã ji mì lèa be vòduwo ò. Vɔ̀ mì mu sè àpe ègbè ò!”
Mawu do èdɔ àsi na Gideɔ̀n
11Tɔhonɔ̀ be àtìkplɔtɔ ɖe va Ɔfrà be kɔpea mè. E va nɔ̀ ànyi ɖo àti gã kè lè Yòas be ànyigbã jia gɔ̃mè. Yòas so Abiezɛr be hɛ̃nu mè. Yòas be vi ŋusù Gideɔ̀n le pò èlù lè vɛ̃kufiɔ̃pe, ne Madìan-tɔwo mu gbà kpɔ ɛ̀ ò. 12Tɔhonɔ̀ be àtikplɔtɔa to ɖo Gideɔ̀n ji, gblɔ̃ na ɛ̀ be: “Tɔhonɔ̀ lè kudo wò, èwò kãlìnuwɔ̀tɔ!” 13Gideɔ̀n ɖo e ŋuti be “Tɔhonɔ̀, àpetɔ nyè! Ne Tɔhonɔ̀ lè kudo mia, nukɛ ŋuti èfũ gbogbo kèawo le kpe mi ɖo ò? Fikɛ ènu jɔ̀ àsu kèwo mia tɔwo gblɔ̃ na mia ɖe, ne wo le gblɔ̃ na mi be e ye ɖè mi to lè Ejiptè-nyigbã jia ò? Nyàwo be nyi be Tɔhonɔ̀ ɖè àsi lè mia ŋuti fifì na Medìantɔwo. 14Eye Tɔhonɔ̀ trɔ kpã ŋùkɔ̀ ɛ̀ gblɔ̃ na ɛ̀ be: “Yì hlùɛ̃ Izràɛlviwo gã lè Medìantɔwo si mè kudo ŋusɛ̃ kè lè àsi wò kèa. Ènyè ye le dɔ̃ wò ɖo ɖa.” 15Vɔ̀ Gideɔ̀n ɖo e ŋuti be: “Tɔ̀ wò jɔ̀, àpetɔ nyè! Àleke mù la wɔ̀ la hlùɛ̃ Izràɛl be dùkɔ̃a ò? Lè Manasè be kɔ̀taa mèa, hɛ̃nu nyèa mu sùgbɔ ò. Eye mù nyi ɖèvi vifɛ̃ lè xòmè nyèa mè.” 16Tɔhonɔ̀ ɖo e ŋuti na ɛ̀ be: “Mù la nɔ̀ kudo wò. Ekèa ŋuti ye wò la pò Medìantɔwo wù ɖodu.” 17Gideɔ̀n yì e ji gblɔ̃ be: “Ne wò ku ŋuzĩzĩ na mù a, eŋuã ɖè jèsìdo ɖe fiɔ ne ma nyã be èwò, Tɔhonɔ̀ ye le pò nupo na mù nyàwo. 18Tàflacɛ, mù gbà jo lè fikèa, kaka na gà kè mè mù la trɔ va ku ènu nana kè mù la va na wòa ò.” Tɔhonɔ̀ ɖo e ŋuti be: “Mù la nɔ̀ fikèa kaka na gà kè mè wò la trɔ va a.”
19Gideɔ̀n yì ɖà ègbɔvi; e sɔ èwɔ, mè kpɔ̃nɔ àkpiti bɔ̀ ɖo e ŋuti. E sɔ èlãa dà ɖo àjàfi mè eye desìa lè ègò mè. E fɔ̀ woa kpata yì àti gãa gɔ̃mè, sɔ yì na Tɔhonɔ̀ be àtikplɔtɔa. 20Àtikplɔtɔa gblɔ̃ na ɛ̀ be: “Yì sɔ èlãa ku kpɔ̃nɔ àkpitiawo dà ɖo àkpã kèa ji ne wòa kɔ̀ desìa ɖo woa ji!” Gideɔ̀n wɔ̀ ɖo ekèa ji. 21Tɔhonɔ̀ be àtikplɔtɔa vlũ àbɔ eye e sɔ àti kè lè àlɔ̀ mè na ɛ̀a, sɔ tɔ èlãa kudo kpɔ̃nɔ àkpitiawo. Eye èzò to lè àkpãa mè fiɔ̃ èlãa kudo kpɔ̃nɔ àkpitiawo. E yomè a àtikplɔtɔa bu lè ŋùkumè na ɛ̀. 22Gideɔ̀n kpɔ ɛ̀ do jèsi be Tɔhonɔ̀ be àtikplɔtɔ ye, eye e gblɔ̃ be: “Bàbà na mù, Tɔhonɔ̀ Mawu! Mù kpɔ àpo àtikplɔtɔa àgbãŋùgbà!” 23Vɔ̀ Tɔhonɔ̀ gblɔ̃ na ɛ̀ be: “Nɔ̀ ŋuti fàfa mè, mù gbà vɔ̃ ò, ɖo wò mu la ku ò.”
24Eye Gideɔ̀n tù vɔsakpe ɖo funu na Tɔhonɔ̀ eye e yɔ ɛ̀ be “Tɔhonɔ̀ nana ŋuti fàfa”. Vɔsakpe kèa gbà kpɔ̀tɔ̀ lè Ɔfrà be kɔpe, Abiezɛr be hɛ̃nu tɔ̀a mè kaka na egbè.
Gideɔ̀n gbã vòdu Baal be vɔsakpe
25Lè èzã ŋua mè kea, Tɔhonɔ̀ do ègbè kèa àsi na Gideɔ̀n gblɔ̃ be: “Sɔ ètɔ wò be ènyì-su kè wo jì èvègɔ̃ eye be ɖo èpè adrɛ̃ a ɖèka. Yì ne wòa mù ètɔ wò be vɔsakpe kè be li na vòdu Baal eye wòa sò vòdu-ti sòso kè lè e gbɔa cã. 26Lè èkpo kèa jia, wò la trɔ li vɔsakpe àdodoe ɖe na Tɔhonɔ̀, àpo Mawu. Wò la wù ènyì-sua lè funu sɔ wɔ̀ ènumème vɔsa na Tɔhonɔ̀. Vòdu-ti kè wò mù a ye la nyi ànakèa.” 27Gideɔ̀n kplɔ̀ yebe sumɔ̃vi èwo ɖo ŋuti yì wɔ̀ èdɔ kè Tɔhonɔ̀ do àsi na ɛ̀a. E wɔ̀ èdɔ kèa lè èzã mè ɖo e le vɔ̃ yebe xòmètɔ kudo kɔpea mètɔwo. 28Kè èŋù kè a, kɔpe a mètɔwo do è jèsi be wo mù vòdu Baal be vɔsakpe a ku vòdu-ti sòso a, eye wo trɔ li vɔsakpe yeye ɖe kè ji wo wɔ̀ ènumème vɔsa lè kudo ènyì-sua ɖo funu. 29Wo le biɔ woa nɔ̀nɔwo be: “Àmè kɛ ye wɔ̀ ènu kèa ò? Eye wo biɔ ènyà sè, kè wo kù ènu mè nyuɛ̃ ɖe a, wo kè ɖo ŋuti be Yòas be vi Gideɔ̀n ye wɔ̀ ɛ̀. 30Eye wo yì gblɔ̃ na Yòas be: “Ɖè èvi wò Gideɔ̀n do àsi na mi ne mia wù ì ɖo e yì mù vòdu Baal be vɔsakpe kudo vòdu-ti sòso kè lè e gbɔa.” 31Yòas ɖo e ŋuti na woa kpata be: “Mìawo ye nyi vòdu Baal ye mì la va nɔ̀ xɔ̀ ènyà ɖo e taa? Ne àmè ɖe gbà gblɔ̃ ènyà ŋua kea, wo ɖo la wù ì gbɔ̀xue èŋù la kè. Ne vòdu Baal nyi Mawu a, ne xɔ̀ ènyà ɖo yeŋutɔ ɖokoe ta, ɖo yebe vɔsakpe ye Gideɔ̀n mù.” 32So gà ŋua mèa, wo ɖo na Gideɔ̀n be Yèrubaal, e gɔ̃mè ye nyi be vòdu Baal ne xɔ̀ ènyà ɖo ye ɖokoe ta, ɖo, Yòas gblɔ̃ be: “Vòdu Baal ne xɔ̀ ènyà ɖo yeŋutɔ ɖokoe ta, ɖo yebe vɔsakpe ye be gbã.”
Jàjràɖo na àhùawɔ̀wɔ: Gideɔ̀n biɔ jèsìdo Mawu
33Madìantɔwo kpata kudo Àmàlɛk be viwo gbàkudo èwèzɛ̃pe be ŋusùwo ɖo ègbè du, sò Yɔrdàn-tɔ̀a eye wo sò kɔpe ɖo Yìzrɛl be ègbegbà ji. 34Eye Tɔhonɔ̀ be gbɔ̃gbɔ̃a ɖɔ Gideɔ̀n keŋu, eye e ku èlã be àzòa sɔ bɔ̀ Abiezɛr be hɛ̃nua ɖo yeɖokoe ŋuti. 35E dɔ̃ àmèwo ɖoɖa Manasè be kɔ̀ta sɔ bɔ̀ ŋusùtiwo ɖo e ŋuti. E gbà dɔ̃ àmè ɖoɖa Àsɛr, Zabulɔ̀n kudo Neftalì be kɔ̀tawo eye wo va bɔ̀ ɖo Gideɔ̀n ŋuti.
36Gideɔ̀n gblɔ̃ na Mawu be: “Ne nyàwo ye wò gblɔ̃ be yè la to ji nyè la hlùɛ̃ Izràɛl gãa, 37eŋuã, mù la ɖo àlɛ̃gbàze ɖo èlùfupe. Ne àhũ jà zã mè eye àlɛ̃gbàzea pò àhũ vɔ̀ ye ànyigbã ya lè pupua, mù la nya be wò la to ji nyè la sɔ hlùɛ̃ Izràɛl gã sìgbè àlekè wò gblɔ̃ ɛ̀a nène.” 38Eye ekèa va e mè tututu. Ɖo kè èŋù kèa, Gideɔ̀n yì sɔ àlɛ̃gbàze kè pò àhũa, fiɔ̃ ɛ̀ eye èsì kè toa, ɖɔ kɔpò ɖèka. 39Gideɔ̀n gbà gblɔ̃ na Mawu be: “Mù gbà bijì do mù ne mù gbà biɔ ènu ɖe ke ò. Na ne ma gbà biɔ jèsìdo ɖèka so àlɛ̃gbàzea ŋuti. Fifìa na ne àlɛ̃gbàzea ɖèka ne nɔ̀ pupu ne ànyigbã kpata ne pò àhũ kè la jàa.” 40Èzã mèa, Mawu wɔ̀ ènu kè Gideɔ̀n biɔ ɛ̀a. Ànyigbã kpata pò àhũ kaka fa, vɔ̀ àlɛ̃gbàzea ya pu kplakpla.
Currently Selected:
Kòjoɖotɔwo 6: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
