Kòjoɖotɔwo 5
5
Dèborà jì èhà na Tɔhonɔ̀
1Gbè ŋua gbè kea, Dèborà jì èhà kèa kudo Abinɔ̀am be vi Baràk gblɔ̃ be:
2“Mì lòlò Tɔhonɔ̀, be Izràɛlviwo sɔna woa ɖokoe nana fàa na àhùa-wɔ̀wɔ,
be dùkɔ̃a sɔ̀gbè la drɛ̃ àvũ.
Àkpe na Tɔhonɔ̀!
3Mìa èfìɔwo mì sè, mìa èfìɔviwo mì ɖoto!
Mù la jì èhà na Tɔhonɔ̀ Izràɛl be Mawu.
4O! Tɔhonɔ̀, wàlɛbɛ kè wò ɖì so Sèyir be ètoa ji
wàlɛbɛ kè wò va yì Edɔ̀m be zògbè jia,
ànyigbã hũhũ,
jiŋùkusi hũ eye lilikpowo ɖùɖù èsì fuu ɖoɖa.
5Ètowo ŋɛ̃ jè e mè lè ŋùkɔ̀ na wò,
Sìnayì be Tɔhonɔ̀, Izràɛl be Mawu.
6Lè Anàt be vi Camgàr be hùenu,
lè Yàɛl be hùenua, èmɔ̃zɔ̃tɔ nɔ̀ èkànuwo mu gbà vana èdùa mè ò
eye èmɔ̃zɔ̃tɔwo tona gbejà gbejà.
7Izràɛl be èdùwo mu gbà ɖo kplɔ̀tɔwo ò
eye è nyè Dèborà,
mù sitè sìgbè ènɔ̀ nène na Izràɛl.
8Dùkɔ̃a wɔ̀ caca kudo vòduwo
eye zè ɖèkaa, àhùa zɛ̃ àxue na wo.
Wo mu teŋu kpɔ àkɔtakpoxɔ̀nu àlo èhuã tètè
na Izràɛl be àhùakɔ̃ àmè àkpe èkàa ò.
9Àpe èjì lè kudo Izràɛl be àhùagbèɖètɔwo
ku àmè kèwo keŋu sɔ woa ɖokoe na fàa.
Mì lòlò Tɔhonɔ̀!
10Mì àmè kèwo nyi hùɛ̃yi,
nɔ̀nà èsɔ àkɛtɛ-nɔ ɣewo jia,
mì àmè kèwo sɔna àfɔ̀ ɖo àfɔ̀ɖojinuwo jia,
mì àmè kèwo zɔ̃nà èmɔ̃woa, mì bù e ŋuti kpɔ.
11Àlɛ̃kplɔ̀tɔ kèwo le na èsì woabe àlɛ̃wo lè èsìdowo toa,
le jì Tɔhonɔ̀ be nyɔnawo.
Nyɔna kèwo Tɔhonɔ̀ wɔ̀ na Izràɛl be kplɔ̀tɔwo
wàlɛbɛ kè dùkɔ̃a bla àhùakpa lè èdùa be àgbowo nua.
12Dèborà, fɔ̃ ne wòa wɔ̀ ènu ɖe!
Sitè ne wòa to àhùawɔ̀wɔ be èhà.
Baràk sitè ne wòa kplɔ̀ àhùalewo!
Èwò Abinɔ̀am be vi.
13Àmè ci àgbèwo trɔ kpɔ ŋusɛ̃ lè ègawo gbɔ.
Tɔhonɔ̀ be dùkɔ̃a bɔ̀ lè ye ŋutɔ gbɔ sìgbè kãlìwo nène.
14Àmè kèwo ɖù Àmàlɛk be èviwo jìa,
so Efràyim be kɔ̀taa mè.
Bɛnyamìnviwo kplɔ̀ wo do, kpe ɖo woa ŋuti.
Makìr be kɔ̀taa na ŋùkɔ̀nɔ̀tɔwo
eye Zabulɔ̀n be kɔ̀taa ya na ènuŋlɔ̀tɔwo.
15Isakàr be àgbònùglawo va kpe ɖo Dèborà ŋuti.
Lè ègbè nɔ̀ du mè ye Isakàr-viwo
kplɔ̀ Baràk do yì zògbè ji.
Vɔ̀ lè Rubɛ̀n be kɔ̀ta mèa,
ènyà hɛ̃hɛ̃ mà-ɖo kɔpewo ye nɔ̀ ànyi.
16Nukɛ ŋuti mì yì nɔ̀ èlãkpawo dòmè
le sè èlãwo be fãfã ɖo ò?
Ɛ̃ɛ, lè Rubɛ̀n be kɔ̀ta mèa,
ènyà dɔ̃dɔ̃ fuwo nɔ̀ ànyi.
17Lè Yɔrdàn be èwèzɛ̃pe, lè Gilead nyigbã jia, kɔ̀tawo mu sitè ò.
Dàn be kɔ̀ta mu jo lè yebe àklowo gbɔ tètè lè ètɔ̀a to ò.
Eye Àsɛr be viwo cã mu jo lè woabe èhũjèpewo gbɔ lè àpùa to ò.
18Co Zabulɔ̀n kudo Neftalì be ŋusùwo lɔ̃ fàa
jè ŋùkɔ̀ èku lè àhùa gbeji.
19Ɛ̃ɛ, miabe kɛ̃tɔwo!
Kanàn be èfìɔwo kpe àhùa kudo mi lè Tanàk,
gogo Mègidò be sìdoawo,
gãke wo mu kpɔ ènu ɖekpe sɔ ò;
ɖo wo mu ɖùji ò.
20Jiŋùkusi be ènu kɛ̃klɛ̃wo ŋuti cã kpɔ gomè lè àhùa mè.
So kaka jiŋùkusi ke wo wɔ̀ àhùa kudo Sìzerà.
21Kicɔ̀n be ètɔ̀ sàsra kè lè so gbè ɖe gbè kea,
Kicɔ̀n be ètɔ̀ sàsraa kplɔ̀ kɛ̃tɔwo jo yì.
Mì na mia zɔ̃ kãlìwɔ̀tɔ̀.
22Nène a, èsɔwo sidù va yì
eye woabe àfɔ̀wo ɖè èdo ɖo ànyigbã.
23Mì sɛ̃kpɛ̃ na Mèroz be èdùa,
Tɔhonɔ̀ be àtikplɔtɔa ye gblɔ̃ ɛ̀!
Mì sɛ̃kpɛ̃ na Mèroz-viwo kpataa,
ɖo wo mu va do àlɔ̀ Tɔhonɔ̀
kudo woabe àhùawɔ̀tɔ àdodoeawo ò!
24Wo tu sì na Yàɛl lè nyɔ̃nùwo kpata dòmè.
Yàɛl, Kenì-vi, Hebɛ̀r be èsrɔ̃a,
wo tu sì na ɛ̀ lè nyɔ̃nù kèwo
kpata nɔ̀nà ègòxɔwo mèa dòmè.
25Sìzerà biɔ èsì, Yàɛl na ɛ̀ ènyìnɔsi
àdodoe ɖo kɔpò xɔ̀asì mè.
26E yomè a, Yàɛl sɔ àti ènu piɖoea,
eye kè be sɔ hãmà kudo ɖùsilɔa,
e pò àtia ɖo èto mè na ɛ̀,
ŋɔ ɛ̀ yì ɖo ànyigbã mè.
27Eye e gbɔjɔ lè yebe ŋùkɔ̀ ɖo e lè gbaji gbàjì.
Lè yebe àfɔ̀wo nua, e mlɔ̃ ànyi mà fɔ̃ gbèɖe,
e fa tɔtɔtɔ ɖo e ku ɖo àfi kè be mlɔa.
28Sìzerà be ènɔ̀ kpɔ èmɔ̃ ji to flɛsɛ̀ nu, le xànu gblɔ̃ be:
“Nukɛ ŋuti yebe àhùakèkevivia mu kpɔ gbɔ̀ kaka na fifì ò?
Nukɛ ŋuti wo ci ŋùgbe ɖo ò?”
29Eye e kpɔ̀tɔ̀ le dèŋùgblè so ɖoŋuti
kè nyɔ̃nù ɖìnyi kèwo trɔdo èawo na ɛ̀a ŋuti gblɔ̃ be:
30“Èta mu nyɔ òa, yebe àhùakɔ̃a kpɔ̀tɔ̀ le bɔ̀
àmɔ̀nyɔ̀nuawo na woabe mamã ɖo àmè sia àmè nu.
Wo kè le mã wo ŋutɔ cã ɖaa.
Tùgbɛ̀jɛvi ɖèka àlo èvè na ŋusùti ɖèka.
Àvɔ do àmàwo kudo àwù kèwo ŋuti
wo sɔ èkà do àcã ɖoawo na Sìzerà.
Ɛ̃ɛ, àvɔ xɔ̀ àsìa ye wo la sã ɖo èkɔ̀ na èjiɖùtɔa.”
31Tɔhonɔ̀! Àpo kɛ̃tɔwo kpata la crɔ̃ sìgbè Sìzerà nène
vɔ̀ àpo èxlɔ̃wo ya la nɔ̀ sìgbè èwè nène.
Eye wo la nɔ̀ sitè kudo ŋusɛ̃ ɖèɖe.
Lè ekèa yomè a, Izràɛl be èdùa kpɔ ŋuti fàfa èpè èkà sɔ̃ŋu.
Currently Selected:
Kòjoɖotɔwo 5: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.