Kòjoɖotɔwo 19
19
Bɛnyamìn be kɔ̀ta: èhlɔ̃dãdã lè Gibea
1Lè hùe ŋua nu, kè èfìɔ ɖekpe mu lè Izràɛl òa, Levì ɖe yì sò kɔpe ɖo Efràyim be èto-nyigbã ji. E ɖè nyɔ̃nù èvègɔ̃ ɖe kè so Bɛtlɛhɛ̀m, lè Yudà. 2Màsɔ̀ màsɔ ɖe va do ŋùmè ɖoɖa lè woa dòmè, eye nyɔ̃nùa jo lè e gbɔ, trɔ yì ètɔa gbɔ lè Bɛtlɛhɛ̀m, lè Yudà-nyigbã ji. E yì nɔ̀ funu wètri ènè sɔ̃ŋu. 3Ŋusùa va so jè èsrɔ̃a yomè be yèa yì pò nupo na ɛ̀ ne yèa kplɔ̀ ɛ̀ gbɔ̀. E kplɔ̀ yebe sumɔ̃vi kudo èsɔàkɛtɛ èvè ɖo ŋuti yì èdùa mè. Nyɔ̃nùa kplɔ̀ ɛ̀ yì ètɔa be àxomè eye kè ètɔa kpɔ ètoyɔvia, e xɔ̀ ɛ̀ kudo jìjɔɛ. 4Nyɔ̃nùa be ètɔ le ètoyɔvia ɖo funu ŋùkèkè ètɔ̃ sɔ̃ŋu. Wo ɖùnà, gbà nùnà ɖodu eye e zɛ̃ woa gbɔ. 5Ŋùkèkè ènègɔ̃a gbè, kè wo fɔ̃a, Levìa le wɔ̀ jàjràɖo la trɔ gbɔ̀ wàlɛbɛ kè ètoa gblɔ̃ na ɛ̀ be: “Ɖù ènu ɖe ne wòa ɖo ŋusɛ̃ gbɔ̀xue ne wòa jè èmɔ̃.” 6Eye wo àmè èvèawo nɔ̀ ànyi ɖù ènu ɖodu gbà nù. Zãɖea, nyɔ̃nùa be ètɔa gblɔ̃ na ŋusùa be: “Lɔ̃ ne wòa gbà ci ànyi dɔ̃ ne wòa ɖì ɖo e mè nyuɛ̃ ɖe.” 7Levìa ji la jo vɔ̀, ètoa zĩ e ji kaka be gbà ci funu dɔ̃. 8Ŋùkèkè àtɔ̃gɔ̃a gbèa, Levìa fɔ̃ èzã la jè èmɔ̃ eye ètoa gbà gblɔ̃ na ɛ̀ ɖe be: “Wo ne ji ènu ɖe na wò ne wòa ɖù eye wètrɔ gbɔa, wòa va so jè èmɔ̃.” Nène a ye wo gbà ɖù ènu ɖodu. 9Ekè gàmè sù ne Levìa kudo èsrɔ̃a nyɔ̃nùa gbàkudo yebe sumɔ̃viawo la jè èmɔ̃a, ètoa gbà gblɔ̃ na ɛ̀ be: “Kpɔɖa, èzã cã le do vɔ̀. Ma nyɔ be wòa gbà ci dɔ̃a? Ɛ̃ɛ wètrɔ ɖo, mì gbɔ̃jɛ̃ kpò. Ne èsɔ̀ ŋùdekɛ̃nyɛ mè xoxoa, mìa fɔ̃ jè èmɔ̃ yì mìa de.”
10Vɔ̀, Levìa mu gbà ji la ci ànyi ke ò. E bla àgbã na èsɔàkɛtɛawo, kplɔ̀ èsrɔ̃a eye wo jo. E zɔ̃ èmɔ̃ va ɖo Yebusì, kè wo gbà yɔna be Yèruzàlɛm. 11Wàlɛbɛ kè wo gogo Yebusì be èdùa mèa, xixea mè le cɔ̃ eye sumɔ̃via gblɔ̃ na Levìa be: “Na ne mia yì Yebusìtɔwo be èdùa mè ne mia yì ci funu dɔ̃.” 12Àpetɔa ɖo e ŋuti na ɛ̀ be: “Aò, mi mu la yì ci àmèjro be èdù ɖe mè fikè Izràɛlvi mu lèa ò. Mi do veve ènu kaka mia ɖo Gibea.” 13E yì e ji gblɔ̃ be: “Mi jè àgbàgba ne mia ɖo Gibea àlo Ramà. Mi la ci èdù ŋuawo dòmètɔ ɖèka mè la dɔ̃.” 14Eye wo yì àzɔ̃lìa ji. Èwè le ɖo èxɔ̀ wàlɛbɛ kè wo gogo Gibea gbɔ lè Bɛnyamìn be kɔ̀ta mè. 15Eye wo yì ɖo èdùa mè ne woa ci funu. Kè wo gɛ̃ ɖo èdùa mèa, wo yì nɔ̀ ànyi lè èdù-gboa nu. Vɔ̀, àmè ɖekpe mu va kplɔ̀ wo be woa va ci yè gbɔ dɔ̃ ò.
16Fìɛ̃si mè ye àmègã sĩsĩ ɖe gbɔ̀ so àgblè gbãnà. Àmègã kèa nyi Efràyim be èto-nyigbã ji tɔ, vɔ̀ e va sò kɔpe ɖo Bɛnyamìn be kɔ̀ta mè lè Gibea. 17Wàlɛbɛ kè e kè ɖo e ŋuti lè èdù-gboa nua, e biɔ ɛ̀ sè be: “Fikɛ wò so ò eye fikɛ wò le yì ò?” 18Levìa ɖo e ŋuti na ɛ̀ be: “Mi so Bɛtlɛhɛ̀m lè Yudà eye mi trɔ le yì Efràyim be èto-nyigbã ji. Funu ye mù nɔ̀nà. Mù ɖìsà va yì Bɛtlɛhɛ̀m eye mù trɔ le yì àxue. Togbɔ be mù va ɖo Tɔhonɔ̀ be àxomèa, àmè ɖe mu na mù nɔ̀pe ò. 19Mù ɖo èbè kudo ègbe na èsɔ-àkɛtɛ nyèwo, eye mù gbà ɖo kpɔ̃nɔ kudo vɛ̃ na nyè ŋutɔ kudo èsrɔ̃ nyè gbàkudo sumɔ̃vi kè kplɔ̀ mù do a cã gãke, ènu ɖekpe mu hiã mi gbɔ̀xue ò.” 20Eye àmègã sĩsĩa gblɔ̃ na ɛ̀ be: “Wòezɔ̃ bɔ̀kɔ̀, fàfa ne va àxue; àpo hiãhiãwo kpɔ ŋùkumè na mù. Wò mu la teŋu ci èdù-gboa nu la dɔ̃ ò.” 21E kplɔ̀ wo yì yebe àxomè eye e na nuɖùɖu èsɔ-àkɛtɛawo ɖù. Àmèjroawo klɔ woabe àfɔ̀wo eye wo ɖù ènu, gbà nù ɖo ji.
22Wàlɛbɛ kè wo le ɖù gbà le nùa, èdùa mè be ɖèkajɛvi gbevũwo va xa àxuea. Wo le pò èhɔ̃a ku àdã gblɔ̃ ɖoɖa àxuetɔ sĩsĩa be: “Ɖè ŋusù kè va zɛ̃ gbɔ wòa to na mi ne mia dɔ̃ e gbɔ.” 23Àxuetɔ sĩsĩa to va, gblɔ̃ na wo be: “Nɔ̀viwo, mì mu gbà wɔ̀ èhlɔ̃dãnu kèa ò! Kè e tɔ̀ be àmèjroa va zɛ̃ gbɔ nyè kpòa, mì tàsi lè susu kpòtoe kèa ŋuti! 24Mù ɖo tùgbɛ̀jɛvi lè àlɔ̀ji ɖèka, ŋusùa be èsrɔ̃ èvègɔ̃a cã lè. Mì na ma kplɔ̀ wo va na mì ne mìa wɔ̀ kudo wo sìgbè àlekè mì jro a nène. Vɔ̀ mì mu gbà wɔ̀ ènu kpòtoe ɖekpe yì ŋusùa gbɔ ò.” 25Ɖèkajɛawo mu le ji la sè àmègã sĩsĩa be ègbè ò. Ekèa na be Levìa kplɔ̀ èsrɔ̃a èvègɔ̃a va na wo lè àgboa ji. Wo dɔ̃ kudo nyɔ̃nùa àlekè wo jro ɖoa, lè èzã kpata mè. Eye fɔ̃fɔ̃ mèa, wo gble è ɖɛ jo.
26Kè èŋù le kèa, nyɔ̃nùa kplà ɖɔ̀ɖɔ̀ va jè ànyi ɖo àxue kè mè èsrɔ̃a lèa be àgbo ji. E ci funu bèɖè bèɖè kaka èŋù kè. 27Eye ekè èŋù kèa, Levìa fɔ̃ la so jè èmɔ̃ yì àxue. Kè e hũ àgboa, e kpɔ èsrɔ̃a lè ànyigbã lè àgboa ji. Yebe àlɔ̀wo lè hɔ̃tru a ŋuti. 28E yɔ ɛ̀ gblɔ̃ be: “Sitè ne mia so jè èmɔ̃!” Vɔ̀ mu sè ɖoŋuti ɖekpe ò. Eye Levìa kɔkɔ èsrɔ̃a be àmèkpòtia ɖo èsɔàkɛtɛa ji eye e jè èmɔ̃ yì woa de. 29Kè be ɖo àxuea, Levìa sɔ àdèkpe, flì èsrɔ̃a be àmèkpòtia ɖo àkpa woèvè. E mã wo ɖoɖa Izràɛl be kɔ̀ta woèvèawo kpata. 30Levìa do ègbè kèa àsi na àmè kèwo be dɔ̃awo be ne woa biɔ Izràɛlviwo be: “Kaka kè Izràɛlviwo to jo lè Ejiptè va na fifìa, ènu kèa hati ɖe jɔ̀ kpɔa? Mì bù e ŋuti ne mìa le è kpɔ ɖoɖè kaba!”
Currently Selected:
Kòjoɖotɔwo 19: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
