Kòjoɖotɔwo 20

Izràɛlviwo yì dɔ̃ èto na Bɛnyamìnviwo

1Izràɛlviwo ɖo ègbè èdu, so kaka Dàn va kɔ̀ ɖo Bɛr-Cebà kudo Gilead. Woa kpata wo va bɔ̀ ɖo Tɔhonɔ̀ be ŋùkɔ̀ lè Mispà. 2Kɔ̀tawo kpata kudo woabe àgbònùglawo sɔ̀gbè lè Mawu be dùkɔ̃a be bɔ̀bɔa mè; ŋusùti àkpe èkà èwo (40000) ye nyi àmè kèwo zãna èwuia. 3Eye Bɛnyamìnviwo sè be Izràɛlvi kpɔ̀tɛawo kpata va yì bɔ̀ lè Mispà.

Bɔ̀bɔ ŋua mè ye wo biɔ be woa trɔ pò nupo so èhlɔ̃dãdãa ŋuti na yèwo. 4Eye Levì kè be èsrɔ̃ ye wo wùa, gblɔ̃ be: “Nyè kudo èsrɔ̃ nyè èvègɔ̃a ye zɔ̃ èmɔ̃ va ɖo Gibea lè Bɛnyamìn-nyigbã ji ne mia ci funu dɔ̃ èŋù bèa kè. 5Èzã mèa, Gibea be ɖèkajɛwo va xa àxue kè mè mù zɛ̃ a. Wo jro la wù mù eye wo dɔ̃ kudo èsrɔ̃ nyèa àlekè e jro wo ɖoa kaka e ku. 6Nène a ye mù va sɔ yebe ŋutilã kukua eye mù flì ì ɖo àkpa woèvè sɔ ɖoɖa Izràɛl be kɔ̀tawo kpata, ɖo wo dã èhlɔ̃ jiŋɔ ɖe lè Izràɛl nyigbã ji. 7Eŋuã fifì kè mìa Izràɛlviwo kpata mì bɔ̀a, mì le è kpɔ lè mìa dòmè ne mìa ɖokpe ènyà ɖèka ji.” 8Dùkɔ̃a kpata sitè kplà gblɔ̃ be: “Àmè ɖekpe mu sitè yì yebe àxomè kaka la yì ŋùgbe lè ènyà kèa ŋuti ò. 9Fifìa ènu kè mi la wɔ̀ kudo Gìbeàtɔwoa ye nyi be mi la dàkɔ̀ sɔ cã àmè kèwo la yì dɔ̃to na woa. 10Kɔ̀ta sia kɔ̀ta la na àmè ɖèka lè àmè èwo dòmè, eye woa yì ji ènuɖùɖu va na ŋusùti kèwo la yì wɔ̀ àhùa kudo Gibea lè Bɛnyamìn nyigbã ji, sɔ zɔ̃ ɖo èhlɔ̃ kè be dã lè Izràɛla ji.”

11Nène a ye Izràɛlviwo kpata ɖo ègbè èdu sɔ sitè ɖo Gibea ŋuti. 12Izràɛl be kɔ̀tawo kpata dɔ̃ àmè ɖoɖa Bɛnyamìnviwo gblɔ̃ be: “Èhlɔ̃ kɛ ŋùkumè mì dã leke ò? 13Mì ɖè ŋusù gbèvũ kèwo wɔ̀ ènu kèa lè mìa dòmèa, do àsi na mi, ne mia wù wo eye nènea, mi la ɖè èvuɛ̃a jo lè Izràɛl be dùkɔ̃a mè.”

Vɔ̀ Bɛnyamìn be kɔ̀ta mèviwo mu ji la ɖè èhlɔ̃dãtɔawo do àsi na Izràɛlvi kpɔ̀tɛawo ò. 14Eye Bɛnyamìnviwo lɔ so woabe èdù vòvòvòwo mè va bɔ̀ ɖo Gibea ne woa yì wɔ̀ àhùa kudo Izràɛlviwo. 15Bɛnyamìn be ŋusùti kèwo va Gibea be hɛ̃hlɛ̃ mè lè àmè àkpe wìvɔ àdɛ̃ (26000). Gibea be ŋusùtiwo ŋutɔ lè àmè àlɔ̀ adrɛ̃ (700). 16Àmè àlɔ̀ adrɛ̃ (700) lè àhùakɔ̃a mè kèwo nyi èmìɔnɔ̀. Wo mu dànà àdàgbà ò, ɖo ne wo dà rɔbàtu èɖà kui ɖèka ŋutɔ cã, èkpea lɔna ɛ̀ kpo ye. 17Tovò lè Bɛnyamìn be kɔ̀ta ŋutia, Izràɛl be àhùakɔ̃a be hɛ̃hlɛ̃ mè lè ŋusùti àkpe èkà èwo (400000) kèwo nya àhùawɔ̀wɔ nyuɛ̃ ɖe a.

18Izràɛlviwo yì biɔ ènyà Mawu sè lè Betɛ̀l. Wo gblɔ̃ be: “Kɔ̀ta kɛ ye la yì wɔ̀ àhùa kudo Bɛnyamìnviwo cucugbã ò?” Eye Tɔhonɔ̀ ɖo e ŋuti na wo be: “Yudà be kɔ̀ta ye.” 19Kè èŋù kèa, Izràɛlviwo so jè èmɔ̃, yì sò kɔpe ɖo Gibea be ŋùkɔ̀. 20Eye e yomè kè wo bla àhùakpa vɔ̀a, wo to yì kpe àhùa kudo Bɛnyamìnviwo lè Gibea be ŋùkɔ̀ tututu. 21Bɛnyamìn be àhùakɔ̃a cã to va àhùagbea ji. Lè ŋùkèkè ŋua gbèa, Bɛnyamìn be àhùakɔ̃a wù Izràɛlvi àkpe èwì vɔ èvè (22000). 22Vɔ̀ Izràɛlviwo gbà dojì, trɔ bla àhùakpa, gbà yì tèpe kè wo wɔ̀ àhùa lè va yìa. 23Ɖo wo va yì fã yɔ Tɔhonɔ̀ ŋùkèkè blibo ɖèka sɔ biɔ sè be yèwo la gbà yì wɔ̀ àhùa kudo yèwo nɔ̀vi Bɛnyamìnviwo ke mà a. Tɔhonɔ̀ ɖo e ŋuti na wo be: “Ɛ̃ɛ mì yì.” 24Ŋùkèkè èvègɔ̃a gbèa, Izràɛlviwo gbà yì kpe àhùa kudo Bɛnyamìnviwo. 25Àzã ŋua ji, kè Bɛnyamìnviwo to lè Gibeaa, wo wù Izràɛl be àhùawɔ̀tɔ àdodoe ŋusùti àkpe woenyi (18000). 26Ekèa na be Izràɛlviwo kpata yì Betɛ̀l. Wo yì nɔ̀ ànyi lè Tɔhonɔ̀ be gòxɔa be ŋùkɔ̀, fã àvi eye wo bla ènu kaka va ɖo wètrɔ lè ŋùkèkè ŋua ji. Wo wɔ̀ ènu nana kudo ènumème be vɔsa na Tɔhonɔ̀. 27Izràɛlviwo yì biɔ ènyà Tɔhonɔ̀ sè, ɖo Tɔhonɔ̀ be Zòɖùɖu-Ɖakà a lè Betɛ̀l gà ŋua mè. 28Eye Arɔ̀n be tɔgbeyɔvi Pìneà kè nyi Eleazàr be vi jìjìa ye lè Zòɖùɖu-Ɖakà a be ŋùkɔ̀. Wo biɔ be: “Mia gbà yì wɔ̀ àhùa kudo mia nɔ̀vi Bɛnyamìn be kɔ̀ta àlo mia tàsia?” Tɔhonɔ̀ ɖo e ŋuti na wo be: “Mì yì, ɖo èsɔ̀a mù la ɖè wo do àsi na mì.”

29Izràɛlviwo na woabe ŋusùtiwo gbà yì do èxa na Gibea trɔdo. 30Eye sìgbè ŋùkèkè èvè cucugbã-tɔ̀wo nènea, Izràɛlviwo gbà sɔ àhùa ɖo Bɛnyamìnviwo ŋuti eye wo gbà yì xa Gibea ke. 31Bɛnyamìnviwo cã gbà to sìgbè ŋùkèkè kpɔ̀tɛawo ke nène, yì kpe àkɔ kudo Izràɛlvi kèwo kplɔ̀ wo jo boo lè woabe èdù Gibea gbɔ. Gbè ŋua gbèa, Bɛnyamìnviwo gbà tɔ Izràɛlviwo wùwu eye wo wù sìgbè àmè ègbã nène lè àgblèta lè Betɛ̀l kudo Gibea be èmɔ̃ ji. 32Eye Bɛnyamìnviwo le susu be yèwo la gbà wù Izràɛlviwo sìgbè àlekè yèwo wɔ̀ sã nène. Vɔ̀, Izràɛlviwo ɖo e be yèwo la si, sɔ kplɔ̀ wo jo lè Gibea be èdùa ŋuti yì àgblèta. 33Zãɖea, àmè kèwo yì wla ɖo tèpe vòvòvòwoa to yì, bɔ̀ lè Baal-Tamàr la sɔ kpe àhùa kudo Bɛnyamìnviwo. Gà ŋua mè ke ye àmè kèwo yì do èxa sã lè Gibea trɔdoa, cã sɔ àhùa, jè Bɛnyamìnviwo yomè to Gebà fikè wo mu ɖo ŋusɛ̃ lè òa. 34Nène a ye Izràɛl be ŋusùti àkpe èwo (10000) va kpe àkɔ kudo wo lè Gibea. Àvũ klìkã ɖe ye nɔ̀ ànyi vɔ̀ Bɛnyamìnviwo mu kpɔ nya ènu bàɖà kè le ja va jɔ̀ ɖo woa ji ò. 35Tɔhonɔ̀ ɖè Bɛnyamìnviwo do àsi na Izràɛlviwo gbè ŋua gbè; eye wo wù Bɛnyamìn-vi àkpe èwì vɔ àtɔ̃ àlɔ̀ ɖèka (25100). 36Eye Bɛnyamìnviwo do è jèsi be wo ɖù yèwo ji. Nyàwo Izràɛlviwo si lè ŋùkɔ̀ na Bɛnyamìnviwo, kplɔ̀ wo yì àgblèta, ɖo wo le kãɖo woa tɔ̀ kèwo do èxa trɔdo Gibea ji. 37Ŋusùti kèawo ye sɔ àhùa yì Gibea be èdùa mè yì xa ɛ̀, wù àmèwo kpata. 38Wo ɖokpe ènyà kèa ji sã be ne wo yì èdùa mèa, wo la tɔzò gãaɖe ne àzìzɔa bèa nyi jèsìdo na Izràɛlvi kpɔ̀tɛawo. 39Wàlɛbɛ kè ye Izràɛlviwo le si lè Bɛnyamìnviwo nu eye wo wù àmè ègbã (30) lè Izràɛlviwo dòmèa, wo susu be yèwo la gbà ɖù Izràɛlviwo ji sìgbè cucugbã tɔ̀a ke nène. 40Vɔ̀ gà ŋua mè tutua, àzìzɔ lìlìɖe kè nyi jèsìdo na Izràɛlviwoa, le tù lè Gibea be èdùa ji. Eye kè Bɛnyamìnviwo trɔa, wo kpɔ be yèwo be èdùa kpata le bìzò vlà vlà vlà. 41Eye Izràɛlviwo trɔ ɖo Bɛnyamìnviwo ji. Vɔ̃vɔ̃ jè woa ji, ɖo wo kpɔ sukpa kè kɔ̀ ɖo woa jia. 42Wo si lè Izràɛlviwo be ŋùkɔ̀ tùtà zògbè ji, vɔ̀ wo yì jè Izràɛlvi kèwo ye do èxa na woa si eye wo wù wo ɖo wo jã ci Izràɛlviwo be dòdòmè. 43Nène a ye Izràɛlviwo xa Bɛnyamìnviwo, wù èɖewo, nyà èɖewo do ègbe àfɔ̀ si àfɔ̀ si kaka yì kɔ̀ ɖo Gevà lè Gibea be èwèzɛ̃pe. 44Wo wù Bɛnyamìn be ŋusùti hotu àsiɖèkɛ (18000). 45Àmè kpɔ̀tɛawo si yì zògbè ji lè Rimɔ̀n be àkpã gbɔ lɔ̀ge. Izràɛlviwo gbà wù àmè hotu èvè èkà èwì vɔ àtɔ̃ (5000) lè èmɔ̃a ji. Eye wo nyà kpɔ̀tɛawo kaka yì kɔ̀ ɖo Gidɔ̀m fikè àmè hotu ɖèka gbà ku lèa. 46Bɛnyamìn-vi kèwo wo wù lè àzã ŋua jia be hɛ̃hlɛ̃ mè lè àmè hotu woèvè èkà èwì vɔ àtɔ̃ (25000). Woa kpata, wo nyi ŋusùtiwo. 47Lè Bɛnyamìn-vi kèwo sia mèa, àmè àlɔ̀ àdɛ̃ (600) kpò ye teŋu ci àgbè. Wo yì ci Rimɔ̀n be àkpãdoa mè wètri ènè. 48Izràɛlviwo gbà trɔ va to Bɛnyamìn be èdùawo mè ɖèka-ɖèka, crɔ̃ àmè kè wo kpɔawo kudo woabe èlãwo, eye wo ɖèzò do èdùawo kpata mè.

Currently Selected:

Kòjoɖotɔwo 20: GEN

Highlight

Copy

Compare