Kòjoɖotɔwo 18
18
Dàn be kɔ̀ta ɖɔ̀lì ècrɔ̃-nyigbã
1Lè hùe ŋua nua, èfìɔ mu lè Izràɛl ò. Gà ŋua mè tutu ye Dàn be kɔ̀ta le ji ànyigbã kè ji be la sò kɔpe ɖoa, ɖo wo mu teŋu xɔ̀ ècrɔ̃-nyigbã kè wo na lè Izràɛl be kɔ̀ta kpɔ̀tɛawo dòmè ò. 2Dàn be viwo dɔ̃ ŋusùti wɔ̀ àhùa àtɔ̃ lè woa dòmè ɖoɖa be woa yì sàdè lè ànyigbã keŋu ji. Wo so Sorà kudo Ɛstaɔ̀l yì sã ŋùku gòdò sɔ kpɔ ànyigbã jèsi. Àmè kèawo va ɖo Efràyim be èto-nyigbã ji lè Mikà be àxue gbɔ fikè wo ci dɔ̃a. 3Wàlɛbɛ kè wo gogo Mikà be àxuea, wo do jèsi ɖèkajɛ Levìa be ègbè eye wo zɔ̃ yì e gbɔ, biɔ ɛ̀ sè be: “Àmè kɛ ye kplɔ̀ wò va fikèa ò? Nukɛ ye wò le wɔ̀ lè fikèa ò? Eye nukɛ le wò ɖo fikèa ò?” 4E ɖo e ŋuti na wo be: “Mikà ye wɔ̀ ènu kèawo kpata na mù, e le tu èfɛ̃ na mù eye mù trɔ zũ yebe hũbonɔ. 5Eye wo gblɔ̃ na ɛ̀ be: “Ne e lè nènea, biɔ Mawu sè na mi ne ènu kè gbe mi toa la nyɔa!” 6Hũbonɔa gblɔ̃ na wo be: “Mì mu gbà vɔ̃ ò, Tɔhonɔ̀ ŋutɔ la kplɔ̀ mì lè mìabe èmɔ̃zɔ̃zɔ̃ mè.”
7Ŋusùti àtɔ̃awo so jè èmɔ̃, eye wo yì kɔ̀ ɖo Laìs nyigbã ji. Wo kpɔ be àmè fàfawo ye lè èdùa mè sìgbè Sidɔ̀n-tɔwo ke nène. Wo lè ŋuti fàfa mè eye wo mu le ji ènyà lè àmè ɖe ŋuti ò. Wo dìdì lè Sidɔ̀n-tɔwo gbɔ eye àmè ɖe cã mu le tɛ wo ɖo ànyi ò. 8E yomè a, Dàn be àmèdɔ̃dɔ̃wo trɔ gbɔ̀ va Sorà kudo Ɛstaɔ̀l eye wo biɔ wo ènu kè wo yì kpɔa sè. 9Wo ɖo e ŋuti na wo be: “Mì va mia yì xa Laìs-tɔwo, ɖo mi kpɔ be ànyigbã nyuɛ̃ ɖe ye be nyi. Mì ɖèbla mia yì xɔ̀ tèpe ŋua kaba. 10Ne mì ɖo funua, mì la kè ɖo dùkɔ̃ bɔ̀bɔɛ ɖe ŋuti lè ànyigbã gã gbàjà ɖe ji. Mawu ɖè dùkɔ̃ kèa do àsi na mì, fikè ye ànyigbã ji be ènuwo kpata bɔ lè.”
11Eye Dàn be èviwo bla àhùakpa so Sorà kudo Ɛstaɔ̀l. Wo le nyi ŋusùti àlɔ̀ àdɛ̃ kèwo so jè èmɔ̃a. 12Wo yì sò kɔpe ɖo Yudà nyigbã ji lè Kìrial-Yearìm be èwèɖoxɔ̀pe. Ènu kèa ŋuti ye wo kpɔ̀tɔ̀ yɔna funua be Màha mè, Dàn àlo Dàn be kɔpe kaka va na egbè. 13So funua, wo yì Efràyim be èto-nyigbã ji, yì kɔ̀ ɖo Mikà be àxuea gbɔ. 14Ŋusùti àtɔ̃ kèwo va yì sã ŋùku lè Laìs sãa, gblɔ̃ na woa nɔ̀viwo be: “Mì nya ɛ̀ be vɔsawɔ̀tɔ gã be àwù, àtikpàkpawo, àpeli kudo gàkpo be legba lè àxue ɖe mè. Fifìa mì nya ènu kè mì la wɔ̀a!” 15Eye ŋusùti àtɔ̃awo gɛ̃ ɖo Mikà be àxue kè mè ɖèkajɛ Levìa lèa mè ne woa do ègbè na ɛ̀. 16Wàlɛbɛ ŋua, Dàn-vi àlɔ̀ àdɛ̃ (600) kèwo bla àhùakpaawo lètè lè àgboa nu. 17Ŋusùti àtɔ̃ kèwo yì sã ŋùku lè èdùa mè sãa, yì èxɔ̀a mè, lɔ àtikpàkpawo, vɔsawɔ̀wu, àpeli kudo gàkpo be legbaa. Hũbonɔa lè àgboa nu kudo ŋusùti àlɔ̀ àdɛ̃awo (600). 18Kè wo le lɔ ènuawo lè Mikà be àxuea mèa, hũbonɔa biɔ wo sè be: “Ènu kè mì le wɔ̀a be gɔ̃mè ɖe?” 19Wo ɖo e ŋuti na ɛ̀ be: “Sùu! Bɔ̀nu kaba ne wòa va trɔ zũ miabe kɔ̀taa be hũbonɔ. Ekɛ ye la nyɔ na wò wu ò? Wòa nyi kɔ̀ta blibo be hũbonɔ loo àlo hũbonɔ na àmè ɖèka be àxuedo a?” 20Ɖoɖo kèa do jìjɔɛ na hũbonɔa ŋutɔ eye be yì lɔ vɔsanuawo, ɖo àhùakɔ̃a dòmè.
21Eye wo trɔ le woabe èmɔ̃ wàlɛbɛ kè wo ɖè ɖèviwo, èlãwo kudo woabe àgbãwo ɖo ŋùkɔ̀a. 22Wo zɔ̃ èmɔ dìdiɖe so Mikà be àxuea gbɔ gbɔ̀xue Mikà kudo yebe àxuekɔ̀tɔwo va sitè jè woa yomè. 23Wàlɛbɛ kè wo va gogo Dànviwoa, wo le do àpa ɖo woa ta eye Dànviwo trɔ biɔ Mikà sè be: “Nukɛ ye le jɔ̀ ɖo èji wò ye wò yì bɔ̀ èha gbogbo kèa ò?” 24Mikà ɖo e ŋuti na wo be: “Mì yì lɔ vɔsanu nyèwo gbà kplɔ̀ hũbonɔa cã. Ènu ɖekpe mu kpɔ̀tɔ̀ ò, eye mì le biɔ mù be nukɛ ye le wɔ̀ mù mà a? Yɔ!” 25Dànviwo ɖo e ŋuti na ɛ̀ be: “Mù gbà do nupo na mi ke ò. Ɖo àdɔ̀mè teŋu ve mia dòmètɔ ɖewo eye wo la trɔ kpã ŋùkɔ̀ mì; funua wò la crɔ̃ kudo àxuedo wòa kpata.” 26Ekèa yomè a, Dànviwo trɔ le woabe èmɔ̃, eye kè Mikà kpɔ be wo sùgbɔ gbà sɛ̃ŋu wu yèwoa, wo trɔ gbɔ̀ va woa de.
Dànviwo yì xɔ̀ Laìs be èdùa
27Kè Dànviwo lɔ Mikà be vɔsawɔ̀nuwo kudo yebe hũbonɔa, wo yì xa Laìs be èdù kè le ètocɔ̃ànyi mè kpoa eye wo wù èdùamètɔwo, ɖè èzò do èdùa mè. 28Laìs-tɔwo mu kpɔ àlɔ̀xɔ̀kpetɔ ɖekpe ò, ɖo wo lè woa ɖokoe si eye wo gbà dìdì lè Sidɔ̀n be èdùa gbɔ. Laìs lè Bɛt-Rehɔ̀b be bàlìa mè. Eye Dànviwo trɔ gbìgbɔ̀ tù èdùa eye wo sɔ wɔ̀ woabe nɔ̀pe. 29Wo sɔ woa tɔgbe Dàn kè wo jì lè Izràɛla be nyikɔ na èdùa, vɔ̀ Laìs ye wo yɔna ɛ̀ so gɔ̃mè jèje. 30Dànviwo yì ɖo vɔsawɔ̀nuawo ànyi eye Gɛrsɔ̀n be èvi Yonatàn kè gbà nyi Mosè be jìjimèvia nyi hũbonɔ na wo. Yebe jìjimèviwo le wɔ̀ èdɔ kèa kaka va na wàlɛbɛ kè wo kplɔ̀ wo yì gàtɔnugbea. 31Nène a ye wo lebè na Mikà be vɔsawɔ̀nuwo dìdiɖe kè Mawu be àxuea gbe lè Silò be èdùa mè kpòa.
Currently Selected:
Kòjoɖotɔwo 18: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
