Kòjoɖotɔwo 17
17
Dàn be kɔ̀ta
Mikà kudo yebe vɔsa wɔ̀pe
1Lè Efràyim be èto-nyigbã jia, àmè ɖe lè funu kè wo yɔna be Mikà. 2E gblɔ̃ na ènɔa gbè ɖèka be: “Wò ɖo ŋùku be wo fĩ klòsalò-ga àkpe ɖèka èkà èvè takpo na wò eye wò sɛ̃kpɛ̃ na àmèa lè àpe ŋùku mèa! Nyàwoa fifìa ègà kèa lè gbɔ nyè, ɖo ènyè ye sɔ ɛ̀.” Ènɔa gblɔ̃ zè ɖèka be: “Tɔhonɔ̀ ne tu sì na wò èvi nyè!” 3Mikà trɔ sɔ klòsalò-gaa na ènɔa, vɔ̀ ènɔa le gblɔ̃ na ɛ̀ be: “Lè nyàwo toto mèa, mù ɖè ègà kèa ɖovò na Tɔhonɔ̀ ɖo èwò ŋuti èvi nyè. Ne wò srèa, wò la sɔ wɔ̀ klòsalò vòdu tata. Eŋuã trɔ xɔ̀ ɛ̀.” 4Eye kè Mikà gbà trɔ sɔ ègàa sɔ na ɛ̀a, ènɔa ɖè klòsalò-ga èkà-àtɔ̃ lè e ŋuti sɔ na àmè kè srènà ègàa. Àmè kèa li vòdu gbà sɔ klòsalò sɔ jɔ̀ ènu tata kè wo sɔ yì dà ɖo Mikà be àxomèa.
5Kè Mikà ŋutɔ ɖo sɛ̃sɛ̃ tèpe ɖo àxomèa, e na wo jɔ̀ ènu tata na ɛ̀ eye wo gbà li àxomè-vòduwo na ɛ̀. Eye e sɔ èvia ɖèka sɔ ɖo hũbonɔ ɖo sɛ̃sɛ̃a nu. 6Lè hùe ŋua nua, èfìɔ ɖekpe mu lè Izràɛl ò. Eye àmè sia àmè wɔ̀nà ènu kè jro èa.
7Levì ɖèkajɛ ɖe so Bɛtlɛhɛ̀m lè Yudà be kɔ̀ta mè, lè àmèjronugbe lè àgo ŋua ji. 8Levì kèa jo lè Bɛtlɛhɛ̀m Yudàtɔ̀ a le ji tèpe bu kè be la teŋu nɔ̀a. E va ɖo Efràyim be èto-nyigbã ji eye e yì kɔ̀ ɖo Mikà be àxomè. 9Mikà biɔ ɛ̀ sè be: “Fikɛ ye wò so ò?” E ɖo e ŋuti be: “Mù nyi Levì so Bɛtlɛhɛ̀m lè Yudà, mù le ji àfi kè mù la zɛ̃ a.” 10Mikà gblɔ̃ na ɛ̀ be: “Ci gbɔ nyè ne wòa nyi àpe àxuedo a be hũbonɔ. Mù la nɔ na wò klòsalò-ga èwo èpè sia èpè, gbà nɔ na wò nuɖùɖu kudo àwù kèwo keŋu hiã wòa.” Levìa yì bù e ŋuti kpɔ. 11E yomè a, Levìa lɔ̃ be yèa nɔ̀ Mikà be àxomè, eye Mikà sɔ ɛ̀ sìgbè èvia jìji nène. 12Mikà ɖo Levìa hũbonɔ lè sɛ̃sɛ̃ kè be ɖo lè yebe àxomèa nu eye be na ɛ̀ tèpe lè àxuea mè. 13Eye Mikà gblɔ̃ lè ye ɖokoe mè be: “Fifìa mù nya be Tɔhonɔ̀ la wɔ̀ nyuɛ̃ na mù ɖo hũbonɔ kè mù ɖoa, nyi Levì.”
Currently Selected:
Kòjoɖotɔwo 17: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
