Kòjoɖotɔwo 12
12
Jɛftè hɛ̃ ènyà kudo Efràyim-tɔwo
1Efràyim be kɔ̀ta be ŋusùwo cã bɔ̀, sò Yɔrdàn be ètɔ̀a yì Safɔ̀n lè Jɛftè gbɔ. Wo gblɔ̃ na ɛ̀ be: “Nukɛ ŋuti wò ɖèka, wò yì wɔ̀ àhùa kudo Amɔ̀n-viwo ye wò mu mì àsi na mi ò? Mi la tɔzò èwò kudo àxuedo wòa kpata.” 2Jɛftè ɖo e ŋuti na wo be: “Kè tùkaɖa jɔ̀ ɖo Amɔ̀n-viwo kudo dùkɔ̃ nyèa dòmèa, mù yɔ mì, co mì mu do ènu e mè ò. 3Ekè mù kpɔ be mì mu ji la va kpe ɖo ŋuti nyè òa, mù sɔ àgbè nyèa na èku eye mù yì wɔ̀ àhùa kudo Amɔ̀n-viwo kè Tɔhonɔ̀ ɖè wo do àsi na mù a. Eŋuã nukɛ ŋuti mì sitè ɖo ŋuti nyè fifì ɖo ò?” 4Jɛftè bɔ̀ Gilead be ŋusùtiwo kpata, yì wɔ̀ àhùa kudo Efràyim-viwo ɖù woa ji. Efràyim-tɔwo ye gblɔ̃nà be: “Gilead-tɔwo si lè Efràyim be kɔ̀ta mè va yì sò ci Manasè be kɔ̀ta mè.” 5Ekèa yomè a, Gilead-tɔwo yì sò èmɔ̃ na Efràyim-tɔwo lè Yɔrdàn be ètɔ̀a be sòpewo. Ne àmè ɖe va le sò ètɔ̀a, wo biɔna ɛ̀ be: “Efràyim-vi ye wò nyia?” Ne e ɖo e ŋuti be: “òa”, 6eŋuã wo gblɔ̃nà na ɛ̀ be, gblɔ̃: “Cìbòlɛt” ne mia sè. Ne àmèa gblɔ̃ be: “Sòbòlɛt” kpòa, wo nyana be Efràyim-vi be nyi, ɖo Efràyim-viwo mu teŋu gblɔ̃nà Cìbòlɛt àlo “Cì” ò. Eye wo lena àmèa la yì sò èkɔ̀ na ɛ̀ lè ètɔ̀a be sòpewo gbɔ. Nène a ye wo wù Efràyim-viwo sìgbè àmè àkpe èkà ci èvè (42000) sɔ̃ŋu nène lè hùe ŋua nu. 7Jɛftè kplɔ̀ Izràɛl be dùkɔ̃a xɔ̀ èpè àdɛ̃. E yomè a e ku eye wo yì ɖì ì ɖo Gilead fikè wo jì ì lèa.
Ibsàn
8Kè ye Jɛftè ku vɔ̀a, Ibsàn ye kplɔ̀ Izràɛl be dùkɔ̃a. E so Bɛtlɛhɛ̀m lè Zabulɔ̀n be kɔ̀ta mè. 9E jì ŋusùvi ègbã, nyɔ̃nùvi ègbã. E sɔ nyɔ̃nùvi ègbãwo na àsu àmèjrowo eye be ɖè àmèjro-nyɔ̃nùvi ègbãwo na yebe èvi ŋusùwo. E kplɔ̀ Izràɛl be dùkɔ̃a èpè adrɛ̃. 10E yomè a, e ku eye wò ɖì ì ɖo Bɛtlɛhɛ̀m.
Elɔ̀n
11Kè ye Ibsàn kua, Elɔ̀n so Zabulɔ̀n ye kplɔ̀ Izràɛl be dùkɔ̃a èpè èwo. 12Zabulɔ̀nvi Elɔ̀n ku e yomè, eye wo ɖì ì ɖo Ayalɔ̀n lè Zabulɔ̀n be ànyigbã ji.
Abdɔ̀n
13Kè ye Elɔ̀n kua, Hilɛ̀l kudo Pireatɔ̀n be èvi Abdɔ̀n ye kplɔ̀ Izràɛl be dùkɔ̃a. 14E ɖo èvi ŋusù èkà kudo tɔgbeyɔvi ŋusù ègbã. Woa kpata wo dona èsɔ-àkɛtɛ èkà takpo ci èwo. Abdɔ̀n kplɔ̀ Izràɛl be dùkɔ̃a èpè ènyi. 15E yomè a, Abdɔ̀n ku eye wo ɖì ì ɖo Pireatɔ̀n lè Àmàlɛk be ètoa ji lè Efràyim be kɔ̀ta mè.
Currently Selected:
Kòjoɖotɔwo 12: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
