Kòjoɖotɔwo 11
11
Jɛftè be èfìɔ ɖùɖu
1Gilead-vi Jɛftè nyi àhùawɔ̀tɔ sɛ̃ŋu ɖe. E nyi àhasìvi kè wo jì na Gilead. 2Gilead be èsrɔ̃ àxuenɔ̀a cã va jì èvi ŋusùwo. Ekè ɖèviawo va sĩa, wo ɖè Jɛftè to gblɔ̃ be: “Wò mu ɖo mia tɔ be àdɔ̀kùnɔ̀ ɖe, la va mã kudo mi ò, ɖo nyɔ̃nù bu be èvi ye wò nyi.” 3Ekèa na be Jɛftè jo lè nɔ̀viawo gbɔ va yì sò kɔpe ɖo kaka Tɔb be àgowo ji. Gbevũviwo va yì kpena ɖo e ŋuti eye wo yì sònà èmɔ̃ na àmèwo, xɔ̀a ènu lè woa si. 4Gà ŋua mè tutu ke ye Amɔ̀n-viwo sɔ àhùa ɖo Izràɛl ŋuti. 5Kè Amɔ̀n-viwo xa Izràɛl nyigbãa, Gilead be àmè sĩsĩwo na wo va yì ji Jɛftè lè Tɔb nyigbã ji, kplɔ̀ va. 6Wo gblɔ̃ na ɛ̀ be: “Va xɔ̀ ŋùkɔ̀ na miabe àhùakɔ̃a ne mìa teŋu yì wɔ̀ àhùa kudo Amɔ̀n-viwo.” 7Jɛftè ɖo e ŋuti na àmè sĩsĩawo be: “Mu nyi mìawo ye crì mù eye mì nyà mù to lè ètɔ nyè be àxo mèa? Nukɛ ŋuti ye mì va le hiã mù fifì kè ye mì jè tùkaɖa mè ɖo ò?” 8Àmè sĩsĩawo gblɔ̃ na ɛ̀ be: “Ɛ̃ɛ nyàwo, ne mi trɔ va gbɔ wò fifìa, mi ji kpò be wòa kpe ɖo mia ŋuti wɔ̀ àhùa kudo Amɔ̀n-viwo eye ne wòa trɔ miabe kplɔ̀tɔ lè Gilead nyigbã kpata ji.” 9Jɛftè trɔ gblɔ̃ na wo be: “Ne mì kplɔ̀ mù va be ma va wɔ̀ àhùa kudo Amɔ̀n-viwo wɔ̀ eye Tɔhonɔ̀ ɖè wo do àsi na mù a eŋuã mù la trɔ mìabe kplɔ̀tɔ.” 10Eye Gilead be àmè sĩsĩwo ɖo e ŋuti na Jɛftè be: “Tɔhonɔ̀ nyi ènu tèpe kpɔtɔ lè mia dòmè ne mi mu wɔ̀ ɖo ènyà kè wò gblɔ̃a ji òa.” 11Jɛftè jè èmɔ̃ kudo Gilead be àmè sĩsĩwo. Dùkɔ̃a sɔ ɛ̀ wɔ̀ kplɔ̀tɔ eye be xɔ̀ ŋùkɔ̀ na àhùakɔ̃a. Kè wo ɖo Mispà, Jɛftè trɔ gblɔ̃ ènyà kè ji be ɖo èkpe kudo àmè sĩsĩwoa lè Tɔhonɔ̀ be ŋùkɔ̀.
Jɛftè do àŋɛ̀ ɖoɖa Amɔ̀n-viwo
12Jɛftè dɔ̃ àmèwo ɖoɖa Amɔ̀n-viwo be èfìɔa gblɔ̃ be: “Ènyà kɛ ye lè mi kudo wò dòmè ye wò sɔ àhùa ɖo dùkɔ̃ nyèa ŋuti ò?” 13Èfìɔ ɖo e ŋuti na àmèdɔ̃dɔ̃awo be: “Ɖo Izràɛlviwo xɔ̀ àpe ànyigbã wàlɛbɛ kè wo to lè Ejiptè a. Wo xɔ̀ ɛ̀ so kaka Arnɔ̀n be bàlìa mè yì kɔ̀ ɖo Yàbɔk kudo Yɔrdàn be ètɔ̀awo gbɔ. Fifìa, trɔ sɔ ànyigbã nyèa na mù kpoo!” 14Jɛftè gbà trɔ dɔ̃ àmèawo ɖo Amɔ̀n-viwo be èfìɔa ke, 15gblɔ̃ be: “Izràɛl mu xɔ̀ Mòab be ànyigbã kaka la va xɔ̀ Amɔ̀n-viwo be ànyigbã ò. 16Nyàwo, kè wo to lè Ejiptè a, Izràɛlviwo zɔ̃ lè zògbèa ji kaka va ɖo plãŋùpòfɛ̃ be àpùa to; e yomè a wo va yì Kadɛ̀s nyigbã ji. 17Izràɛlviwo dɔ̃ àmè ɖoɖa Edɔ̀m be èfìɔa gblɔ̃ be: “Na èmɔ̃ ne mia to ànyigbã wòa ji va yì.” Vɔ̀ Edɔ̀m be èfìɔa mu lɔ̃ ò. Wo gbà dɔ̃ àmè ɖoɖa Mòab be èfìɔa, co e cã gbe. Eye Izràɛlviwo ci Kadɛ̀s. 18E yomè a, Izràɛlviwo zɔ̃ lè zògbèa ji kaka trɔ do Edɔ̀m kudo Mòab be èdùawo. Wo va yì ɖo Mòab be èwèzɛ̃pe. Wo mu ɖo Mòab be èdùa mè ò, co wo yì sò kɔpe ɖo Arnɔ̀n godo, ɖo Arnɔ̀n nyi lipò na Mòab. 19So funua, Izràɛlviwo dɔ̃ àmè ɖoɖa Sihɔ̀n, Amɔrì-tɔwo be èfìɔ kè lè Hɛsbɔ̀n eye wo gblɔ̃ na ɛ̀ be: “Na èmɔ̃ ne mia to ànyigbã wòa ji va yì miabe ànyigbã ji.” 20Vɔ̀ èfìɔ Sihɔ̀n gbe. Gbà sɔ wua, e bɔ̀ yebe àhùakɔ̃a, yì dotò ɖo Yàhas eye e wɔ̀ àhùa kudo Izràɛlviwo. 21Tɔhonɔ̀, Izràɛl be Mawu a ɖè èfìɔ Sihɔ̀n kudo yebe dùkɔ̃a kpata do àsi na Izràɛl eye Izràɛlviwo ɖù woa ji. Wo xɔ̀ Amɔrì-tɔwo be ànyigbã kè ji wo lèa kpata. 22Wo xɔ̀ ɛ̀ so kaka Arnɔ̀n va ɖo Yàbɔk, so kaka zògbèa ji va ɖo Yɔrdàn be ètɔ̀a to. 23Tɔhonɔ̀, Izràɛl be Mawu ŋutɔ ye ɖè Amɔrì-tɔwo be ànyigbã do àsi na mi eye wò ya wò le ji la va xɔ̀ ɛ̀ lè mia si fifìa? 24Ànyigbã kè vòdu wò Kemɔ̀s na wòa, mu lè àsi wòa? Nène a ye mia cã mi la lebè na ànyigbã kè Tɔhonɔ̀ Izràɛl be Mawu xɔ̀ na mia cã. 25Wò susu be yè sɛ̃ŋu wu Bàlak, Sipɔ̀r be èvi kè nyi Mòab be èfìɔa? Mu ji ènyà lè Izràɛl be dùkɔ̃a ŋuti kaka la va wɔ̀ àhùa kudo è ò. 26Èpè àlɔ̀ ètɔ̃ sɔ̃ŋu ye Izràɛlviwo lè Hɛsbɔ̀n kudo Àroà nyigbãwo ji kudo èdù kèwo keŋu trɔdo Arnɔ̀n be èdùa mè. Nukɛ ŋuti ye wò mu biɔ ànyigbã trɔ xɔ̀ ɛ̀ kaka va na fifì ò? 27Lè tɔ̀ nyè go mèa, nyè mu wɔ̀ àgɔ̀ jèje be nu ɖe va gbɔ wò ò, èwò ye sitè ɖo ŋuti nyè bòhũ be yèa wɔ̀ àhùa kudo Izràɛl-dùkɔ̃a. Tɔhonɔ̀ kòjoɖotɔ gãa ne sò kòjo lè Izràɛlviwo kudo Amɔ̀n-viwo dòmè egbè.” 28Vɔ̀ Amɔ̀n-viwo be èfìɔa mu sɔ Jɛftè be ènyàa sɔ wɔ̀ èdɔ ò.
Jɛftè fìã àjɔ̀gbè na Mawu
29Tɔhonɔ̀ be gbɔ̃gbɔ̃a ɖɔ Jɛftè; e sɔ èmɔ̃a so Gilead yì to Manasè-nyigbã ji. E yomè a, e yì Mispà lè Gilead. Funua ye be so lè yì kpe àhùa kudo Amɔ̀n-viwo. 30Jɛftè do ŋùgbè na Tɔhonɔ̀ gblɔ̃ be: “Ne nyàwo, wò ɖè Amɔ̀n-viwo do àsi na mù a, 31àmè ɖe kpekpe àmè kè la to va dogò mù cucugbã wàlɛbɛ kè mù trɔ gbɔ̀ so Amɔ̀n-viwo be àhùagbe ji gbãnà kudo jiɖùɖua, la nyi Tɔhonɔ̀ tɔ̀. Eye mù la sɔ ɛ̀ wɔ̀ ènumème be vɔsa na Mawu.” 32Jɛftè sɔ àhùa ɖo Amɔ̀n-viwo ŋuti lè woabe ànyigbã ji eye Tɔhonɔ̀ ɖè wo do àsi na ɛ̀. 33Jɛftè ɖù woa ji lè èdù èwì mè, so kaka Àroà va ɖo Mìnitè kudo Avɛ̀l-Kèramìn. Izràɛlviwo ɖù Amɔ̀n-viwo ji blibo eye wo kpɔ ŋusɛ̃ ɖo Amɔ̀n-nyigbã ji. 34Kè àhùa vɔ̀a, Jɛftè trɔ gbãnà àxue lè Mispà. Èvia àkòŋùgò, nyɔ̃nùvi kè lè e sia ye to va yì dogò è. E le Pò àsi-hũvi, gbà le ɖuwè. 35Wàlɛbɛ kè Jɛftè kè ɖo e ŋutia, e zɛ̃ ye ŋutɔ be àwù, le làmɔɛ̃ gblɔ̃ be: “Aà! Tùgbɛ̀jɛvi nyè, wò sɔ mù do ŋuzĩzĩ mè. Èwò ye le nyi jɔ̀gbèvuɛ̃ nyèa. Nyè mu la gbà teŋu trɔ va àjɔ̀gbè kè mù fìã na Tɔhonɔ̀a ji ò.” 36Vɔ̀ èvia ɖo e ŋuti na ɛ̀ be: “Ne wò fìã àjɔ̀gbè na Tɔhonɔ̀a, eŋuã wɔ̀ kudo mù sìgbè àlekè wò kã àtãŋua nène, ɖo Tɔhonɔ̀ ɖè Amɔ̀n-viwo do àsi na wò ye wò ɖù woa ji.” 37Sɔ kpea, e gblɔ̃ na ètɔa be: “Na mù èmɔ̃ ne ma yì nɔ̀ ètowo mè wètri èvè kudo èxlɔ̃ nyè nyɔ̃nùviwo sɔ fã àpe ègbèjinɔ̀nɔ, ɖo nyè mu la nya ŋusù gbɔ̀xue la ku ò.” 38Jɛftè tàsi ì na wètri èvè. Eye, ye kudo èxlɔ̃awo yì ètowo mè yì fã, ɖo mu nya ŋusù gbɔ̀xue le ja ku ò. 39Kè Wètri èvèa va yìa, e trɔ gbɔ̀ va ètɔa gbɔ eye be wɔ̀ àjɔ̀gbè kè be fìã be ŋuti-dɔ kudo èvia. Eye e ku wàlɛbɛ kè mu nya ŋusù òa, eye ekèa trɔ zũ kɔ̀nu lè Izràɛl. 40Èpè sia èpèa, Izràɛl-nyɔ̃nùviwo yì ɖona ŋùku Jɛftè be nyɔ̃nùvi kè nyi Gilead-via ji ŋùkèkè ènè.
Currently Selected:
Kòjoɖotɔwo 11: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
