Kòjoɖotɔwo 13

Wo do Samsɔ̀n be jìji be àŋɛ̀

1Izràɛlviwo gbà wɔ̀ ènu kè mu jè ŋùmè na Mawu ò a, eye e ɖè wo do àsi na Filistìtɔwo xɔ̀ èpè èkà sɔ̃ŋu. 2Lè Soreà be àgowo jia, ŋusù ɖe kè wo yɔna be Manɔà so Dàn be kɔ̀ta mèa, sò àxue ɖo funu. E ɖè nyɔ̃nù ɖe kè mu jì èvi kpɔ òa. 3Tɔhonɔ̀ be àtikplɔtɔ ɖe ze ɖo nyɔ̃nù kèa ji, gblɔ̃ na ɛ̀ be: “Mù nya be wò mu jì èvi kpɔ ò, ɖo wò nyi èkònɔ̀, vɔ̀ wò la fɔfu eye wò la jì ŋusùvi ɖèka. 4So fifìa jia, wò mu gbà la nɔ nù vɛ̃ àlo àhà mu àmè ò eye wò la sɔ ènu mà-kɔ̀ mà-kɔ ɖùɖu sɔ do èkɔ̀, 5ɖo èfu kè wò la fɔa kudo ŋusùvi kè wò la jìa ŋuti. Wo mu la kpà èɖà na ɛ̀ kpɔ gbèɖe ò, ɖo wo ɖè èvi kèa ɖovò na Mawu so kaka àdɔ̀mè ke. E ye ji ye Mawu la to, la tɔ jiɖùɖu nana Izràɛlviwo ɖo Filistìtɔwo ji.” 6Eye nyɔ̃nùa yì gblɔ̃ na ŋusùa be: “Mawu be àmè ɖe va gbɔ nyè. Yebe nɔ̀nɔmè lè sìgbè Mawu be àtikplɔtɔ tɔ̀ nène, ɖo e ɖo vɔ̃vɔ̃. Nyè mu biɔ ɛ̀ fikè be soa ò eye mu yɔ yebe nyikɔ cã na mù ò. 7E gblɔ̃ na mù be mù la fɔfu, la jì ŋusùvi ɖèka. E gbe na mù be nyè mu gbà nù vɛ̃ àlo àhà sɛ̃sɛ̃ ke ò, eye ma sɔ ènu mà-kɔ̀ mà-kɔ be ɖùɖu sɔ do èkɔ̀. Ɖo e gblɔ̃ be wo ɖè ɖèvia ɖovò na Mawu so kaka àdɔ̀mè ke kaka na yebe èku. 8Manɔà fãkue na Tɔhonɔ̀ gblɔ̃ be: “Tɔhonɔ̀, mù ɖè kuku, trɔ dɔ̃ àtikplɔtɔ kè wò dɔ̃ sãa, ɖoɖa ne bèa va fiɔ mi ènu kè mi la wɔ̀ na ɖèvia wàlɛbɛ kè wo la jìa.” 9Mawu sè Manɔà be kuefã eye bè trɔ dɔ̃ àtikplɔtɔa ɖoɖa nyɔ̃nùa, wàlɛbɛ kè e nɔ̀ ànyi lè èsrɔ̃a Manɔà be àgblè mè, eye Manɔà mu lè funua òa. 10Zè ɖèka, nyɔ̃nùa sidù yì gblɔ̃ ɛ̀ na èsrɔ̃a Manɔà be: “Mawu be àmè kè ze na mù nyìsɔ̀a, gbà va ze ɖo ji nyè ke.” 11Manɔà sitè kplà, kplɔ̀ èsrɔ̃a do va yì kpɔ ŋusùa, gblɔ̃ na ɛ̀ be: “Èwò ye pò nupo kudo èsrɔ̃ nyèa?” Àtikplɔtɔa ɖo e ŋuti na ɛ̀ be: “Ɛ̃ɛ ènyè tutu ye!” 12Manɔà yì e ji, gblɔ̃ be: “Ne ènyà kè wò gblɔ̃a va e mèa ɖe, nukɛ ye la nyi miabe èdɔ do àsi ò? Eye àleke be la nɔ̀ na ɖèvia ɖo ò?” 13Tɔhonɔ̀ be àtikplɔtɔa gblɔ̃ na Manɔà be: “Ènu kèwo keŋu mù gblɔ̃ na èsrɔ̃ wòa, ne wɔ̀ ɖo woa ji: 14Ènu ɖekpekpe kè wo sɔ vɛ̃ wɔ̀a mu ɖo la jè ènu mè na ɛ̀ ò. Mu ɖo la nù vɛ̃ àlo àhà sɛ̃sɛ̃ ò, eye mu ɖo la ɖù ènu mà-kɔ̀ mà-kɔ ɖe ò. E ɖo la wɔ̀ ɖo ègbè do àsi nyèa ji.” 15Manɔà gblɔ̃ na Tɔhonɔ̀ be àtikplɔtɔa be: “Na ne mia gbà le wò ɖɛ viɖe ne mia ɖà ègbɔvi ɖèka na wò.” 16Tɔhonɔ̀ be àtikplɔtɔa gblɔ̃ na Manɔà be: “Ne wò gbà le mù ɖɛ ŋutɔ cã a, nyè mu la ɖù ènu kè wò la na mù a ò. Vɔ̀ ne wò jroa, wɔ̀ ènumème vɔsa na Tɔhonɔ̀.” Nyàwoa, Manɔà mu nya be Tɔhonɔ̀ be àtikplɔtɔ ye be nyi ò. 17Manɔà gblɔ̃ na àtikplɔtɔa be: “Leke wo yɔna wò ò? Ne mia teŋu va pòmlã wò ne ènu kè wò gblɔ̃a va e mèa!” 18Àtikplɔtɔa gblɔ̃ na ɛ̀ be: “Nukɛ ŋuti wò le ji la nya nyikɔ nyè ɖo ò? Nyikɔ wɔ̀ ŋùdã ye be nyi!” 19Manɔà sɔ ègbɔvi a ku ènu nana a eye e yì wɔ̀ vɔsa na Tɔhonɔ̀ lè àkpã be tamè; na Tɔhonɔ̀ kè be nyikɔ wɔ̀ ŋùdã a. Wàlɛbɛ kè Manɔà ku èsrɔ̃a wo le kpɔ 20vɔsa be èzòa le yì èjia, eye wo kpɔ Tɔhonɔ̀ be àtikplɔtɔa lè èzòa mè lè vɔsakpea ji be tùtà jiŋùkusia, wo sɔ ŋùku mè cɔ̃ ànyi. 21Manɔà sè e gɔ̃mè be Tɔhonɔ̀ be àtikplɔtɔ ye be nyi. Àtikplɔtɔ kèa mu gbà ze ɖo woa ji kpɔ gbèɖe ò. 22Eye Manɔà gblɔ̃ na èsrɔ̃a be: “Mi la ku godo, ɖo mi kpɔ Mawu!” 23Èsrɔ̃a ɖo e ŋuti na ɛ̀ be: “Ne Tɔhonɔ̀ kè ji la wù mia, mu la lɔ̃, xɔ̀ miabe nunana àlo numème vɔsa ò. Eye mu la kè na mi la kpɔ ènu kèwo keŋu be sɔ fiɔ mia ò; gbà wua, mu sɔ ègbè do àsi kèawo na mia!” 24Nyɔ̃nùa jì ŋusùvi ɖèka eye be ɖo nyikɔ na ɛ̀ be Samsɔ̀n. Ɖèvia le sĩ eye Tɔhonɔ̀ tu sì na ɛ̀. 25Tɔhonɔ̀ be gbɔ̃gbɔ̃a tɔ Samsɔ̀n zãzã so kaka Màhanè-Dàn kè lè Sorà kudo Ɛstaɔ̀l dòmèa ke.

Currently Selected:

Kòjoɖotɔwo 13: GEN

Highlight

Copy

Compare