Kòjoɖotɔwo 10
10
Tolà
1Kè Abimèlɛk ku vɔ̀a, Puà be èvi Tolà kè nyi Dodò be tɔgbeyɔvia, ye hlùɛ̃ Izràɛl gã. Tolà so Isakàr be kɔ̀taa mè. E nɔ̀nà Camìr be èdùa mè lè Efràyim nyigbã ji. 2E kplɔ̀ Izràɛlviwo èpè èwì vɔ ètɔ̃ sɔ̃ŋu. E yomè a e ku eye wo ɖì ì ɖo Camìr.
Yàir
3Kè Tolà kua, Gilead-vi jìji Yàir ye kplɔ̀ Izràɛlviwo èpè èwì vɔ èvè. 4E jì èvi ŋusù ègbã eye woa kpata wo liana èsɔ àkɛtɛ ègbã. Wo ɖo kɔpe ègbã lè Gilead-nyigbã ji. Kaka va na egbèa, wo gbà yɔna kɔpe kèawo be Yàir be èviwo be kɔpewo. 5Yàir va ku eye wo ɖì ì ɖo Kamɔ̀n.
Jɛftè
Amɔ̀n-tɔwo tɛ Izràɛlviwo ɖo ànyi
6Izràɛlviwo gbà le wɔ̀ ènu kè mu jɔ̀nàjì na Tɔhonɔ̀ òa: wo yì le sɛ̃ vòdu Baal ku Àstartè. Wo gbà sumɔna Sirìa, Sidɔ̀n, Mòab, Amɔ̀n kudo Filistì be vòduwo cã. Wo gbe Tɔhonɔ̀ eye wo mu gbà sɛ̃nà ɛ̀ cã ò. 7Eye Tɔhonɔ̀ do àdɔ̀mèze ɖo Izràɛlviwo ŋuti kaka be èsɔ wo do àsi na Filistì kudo Amɔ̀n-tɔwo. 8Sɔ so gà ŋua mèa, àmè kèawo tɛ Izràɛlvi kèwo lè Gilead nyigbã kudo Yɔrdàn-tɔ̀ be èwèzɛ̃pea ɖo èto, do fùnya-fùnya na wo xɔ̀ èpè ènyi sɔ̃ŋu. 9Eji-ejia, Amɔ̀n-tɔwo sònà ètɔ̀a, yì wɔ̀nà àhùa kudo Yudà, Bɛnyamìn kudo Efràyim be kɔ̀tawo ɖùnà woa ji. Eye Izràɛlviwo gɛ̃ ɖo ènuxàxa gãaɖe mè. 10Ekèa na be Izràɛlviwo do àpa biɔ Tɔhonɔ̀ be àlɔ̀do gblɔ̃ be: “Mi wɔ̀ ènuvuɛ̃ ɖo ŋuti wò, ɖo mi gbe èwò kè nyi miabe Mawu a, yì le sɛ̃ Baal vòduwo.” 11Tɔhonɔ̀ ɖo e ŋuti na wo be: “Wàlɛbɛ kè ye Ejiptè-tɔwo, Amɔrì-tɔwo, Amɔ̀n-tɔwo, Filistìtɔwo, 12Sidɔ̀n-tɔwo, Amàlɛk-viwo kudo Maɔnì-tɔwo tɛ mì ɖo ànyi eye mì biɔ àpe àlɔ̀doa ɖe, nyè mu hlùɛ̃ mì lè woa sia? 13Vɔ̀ mì va gbe mù, yì le sɛ̃ vòduwo. Ekèa ŋuti ye nyè mu gbà le ji la hlùɛ̃ mì ɖe ò. 14Fifìa, mì biɔ àlɔ̀do so vòdu kèwo mì le sɛ̃a si. Woawo ye ɖo la hlùɛ̃ mì lè mìabe vevesèsea mè.” 15Izràɛlviwo trɔ gblɔ̃ na Tɔhonɔ̀ be: “Ɛ̃ɛ, mi wɔ̀ ènuvuɛ̃! Wɔ̀ ènu kè jro wòa kudo mi, vɔ̀ to kuku ɖèɖe mèa, hlùɛ̃ mi fifì jro.” 16Eye wo ɖè vòdu kèawo keŋu jo lè woabe dòdòmè, trɔ le sɛ̃ Tɔhonɔ̀. Ɖo Tɔhonɔ̀ ŋutɔ cã mu teŋu le dojì lè woabe tɛtɛ ɖo ànyi a be ŋùkɔ̀ ò. 17Nène a, Amɔ̀n-tɔwo bɔ̀, bla àhùakpa eye wo yì sò kɔpe ɖo Gilead nyigbã ji. Izràɛlviwo cã bla àhùakpa lè Mispà. 18Eye Izràɛl be kɔ̀ta kèwo lè Gilead nyigbã jia kudo woabe àmègãwo le gblɔ̃ na woa nɔ̀nɔwo be: “Àmè kɛ ye la kpe àhùa kudo Amɔ̀n-tɔwo na mi ò? Àmè kè la teŋu wɔ̀ ɛ̀a, la trɔ zũ kplɔ̀tɔ na Gilead be dùkɔ̃a kpata.”
Currently Selected:
Kòjoɖotɔwo 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
