Kòjoɖotɔwo 1
1
Izràɛlviwo be Kanàn-nyigbã xɔ̀xɔ
1E va va e mè lè Yosùa be èku yomè be Izràɛlviwo yì biɔ Tɔhonɔ̀ ènyà sè, ne woa sɔ nya kɔ̀ta kè ye la yì wɔ̀ àhùa ku Kanàntɔwoa. 2Tɔhonɔ̀ ɖo e ŋuti na wo be: “Mù ɖè èdù kèa do àsi na Yudà be kɔ̀ta be ŋusùwo.” 3Eye Yudà be kɔ̀ta be ŋusùwo biɔ so woa nɔ̀vi Simeɔ̀n be jìjimèviwo si be: “Mì va kpe ɖo mia ŋuti ne mia wɔ̀ àhùa ku Kanàntɔwo, sɔ xɔ̀ ànyigbã kè wo sɔ na mia. E yomè a, mi la kpe ɖo mìawo cã ŋuti sɔ xɔ̀ mìa tèpea.” Eye Simeɔ̀n be jìjimèviwo lɔ̃ kplɔ̀ woa do, 4eye wo yì kpe àhùa ku Kanàntɔwo. Tɔhonɔ̀ ɖè Perizìtɔwo ku Kanàntɔwo do àsi na Izràɛlviwo. Wo wù àmè àkpe èwo lè Kanàntɔwo dòmè lè Bezɛ̀k be èdùa mè. 5Nyàwo wo yì kè ɖo èfìɔ Adonì-Bezɛ̀k ŋuti lè Bezɛ̀k eye wo xa ɛ̀. Izràɛlviwo ɖù Perezì-tɔwo ku Kanàntɔwo ji lè funu. 6Èfìɔ Adonì-Bezɛ̀k si, eye wo kplɔ̀ ɛ̀ do, yì le è. Wo sò dèglèfèsu lè àfɔ̀wo ku àlɔ̀wo na ɛ̀. 7Eye èfìɔ Adonì-Bezɛ̀k gblɔ̃ be: “èfìɔ gbogbo kèwo mù na wo sò dèglèfèsu naawo cã ɖùkpɔ̀tɛwo lè èkplɔ̃ nyèa gɔ̃mè. Ènu kè mù wɔ̀a, Mawu na e trɔ va ji nyè.” Wo kplɔ̀ ɛ̀ yì Yèruzàlɛm fikè be yì ku lè.
8Yudà be ŋusùwo xa Yèruzàlɛm eye wo xɔ̀ èdùa. Wo wù àmèwo eye wo tɔzò àxuewo. 9Lè funua, wo yì wɔ̀ àhùa ku Kanàntɔwo lè èto-nyigbã ku Pàlɛstinà be àpùgo ku èdùa be àpùgo jia. 10E yomè a, Yudà be ŋusùwo gbà yì wɔ̀ àhùa ku Kanàntɔ kèwo lè Hebrɔ̀n. Hebrɔ̀n ye wo yɔna sãa be Kirìat-Àrabà. Wo wù Cecaì, Ahimàn ku Talmaì be kɔ̀tawo lè funu. 11Eye wo jo lè funu yì wɔ̀ àhùa ku Devìr be ŋusùwo. Devìr ye wo yɔna sãa be Kirìat-Sefɛ̀r. 12Kàlɛb kã àtãŋu be yè la sɔ yèbe nyɔ̃nùvi Aksà na ŋusù kè la ɖù Kirìat-Sefɛ̀r be èdùa jia eye be la sɔ ɖè è. 13Kàlɛb be yomètɔ̀ ŋusù kè wo yɔna be Kenàz be vi ŋusù Otnìɛl ye yì xa èdùa, ɖù e ji eye Kàlɛb sɔ èvia nyɔ̃nù sɔ na ɛ̀ be ɖè. 14Kè wo gbe kplɔ̀ ɛ̀ trolo kpòa, e ɖè sùsu na èsrɔ̃a Otnìɛl be bèa biɔ yè tɔ Kàlɛb àgblè-nyigbã. Eye e ɖì lè yebe èsɔ-àkɛtɛa ji. Ètoa biɔ ɛ̀ sè be: “Nukɛ ye wò le ji ò?” 15E ɖo e ŋuti be: “Ne jè ŋùmè na wò ne wòa na mù èsìdowo, ɖo ànyigbã kè wò na mù lè èvègoa nyi zògbè.” Kàlɛb sɔ èsìdo kèwo lè èto jia ku kèwo lè bàlì mèa na ɛ̀.
16Mosè be èto, Kenì be viwo so ku Yudà be ŋusùwo lè Yerikò kè nyi èdeti be èdùa mè yì sò kɔpe ɖo Yudà be àpùgo kè nyi Arad be èdùa be àpùgo. Eye wo yì nɔ̀ dùkɔ̃wo dòmè.
17Yudà ku ètɔa be vi Simeɔ̀n be ŋusùwo yì xa Kanàntɔ kèwo lè Sefàt be èdùa mèa eye wo crɔ̃ ènu sia ènu. Wo trɔ nyikɔ na èdùa be Hɔrmà. 18E yomè a, Yudà be ŋusùwo xɔ̀ Gazà, Àskalɔ̀n ku Ekrɔ̀n be èdùwo kudo woabe ànyigbãwo. 19Tɔhonɔ̀ nɔ̀ kudo Yudàtɔwo ye wo xɔ̀ èto-nyigbãa kpata. Vɔ̀, wo mu teŋu nyà àmè kèwo lè bàlìawo mè ò, ɖo gàyìbɔ be àhùakèkevivi lè woa si. 20Wo sɔ Hebrɔ̀n be èdùa na Kàlɛb sìgbè àlekè Mosè gblɔ̃ ɛ̀ ɖɛa nène. Eye Kàlɛb nya Anàk be vi ŋusù ètɔ̃awo jo lè funu. 21Bɛnyamìn be viwo ya mu teŋu nyà Yebusìtɔwo lè Yèruzàlɛm ò eye wo kpɔ̀tɔ̀ lè kaka va na egbè.
22Yosɛ̀f be vi Efràyim ku Manasè be jìjimèviwo cã so yì xa Betɛ̀l eye Tɔhonɔ̀ nɔ̀ kudo wo. 23Wo dɔ̃ bèkpɔɛwo ɖoɖa Betɛ̀l jè ŋùkɔ̀. Betɛ̀l ye wo yɔna sã be Luz. 24Bèkpɔɛ kèawo kè ɖo àmè ɖe kè le to lè èdùa mèa ŋuti eye wo gblɔ̃ na ɛ̀ be: “Fiɔ mi àlekè mi la wɔ̀ la ɖo èdùa mèa eye mi mu la wɔ̀ ènu bàɖà ɖe kudo wò ò.” 25Eye ŋusùa fiɔ wo èmɔ̃a. Nène a ye Efràyim kudo Manasè be viwo teŋu yì crɔ̃ èdùa kudo èwui, vɔ̀ wo mu tɔ àsi ŋusùa kudo yebe xòmèa ò. 26Ŋusù kèa trɔ jo yì Hitìtɔwo be ànyigbã ji, yì sò èdù yeye ɖo funu. E ɖo nyikɔ na èdùa be Luz, nyikɔ kèa ci èdùa si kaka va na egbè.
27Manasè be viwo mu teŋu xɔ̀ Bɛt-Sehàn, Tanàk, Dɔr, Jìbleàm kudo Mègidò kaka la va xɔ̀ woabe kɔpewo ò. Eye Kanàntɔwo kpɔ̀tɔ̀ lè ànyigbã kèawo ji. 28Vɔ̀ kè ye Izràɛlviwo va ɖo ŋusɛ̃ ɖo dùkɔ̃wo ji cã, wo mu teŋu nyà Kanàntɔwo ò. Vɔ̀a ɖe kpò ye wo sɔ wo ɖo kluvi nyinyi be èbònu eye wo wɔ̀nà àmègbɔnɔ̀vi be èdɔwo.
29Efràyim be viwo cã mu teŋu nyà Kanàntɔwo lè Gezɛ̀r be èdùa mè ò, eye wo kpɔ̀tɔ̀ lè Gezɛ̀r lè Efràyim-viwo dòmè.
30Zabulɔ̀n be viwo mu teŋu nyà Kanàntɔwo lè Kitrɔ̀n kudo Nàhalàl ò, eye Kanàntɔwo kpɔ̀tɔ̀ lè ànyigbã ji. Vɔ̀ Zabulɔ̀n be viwo sɔ wo wɔ̀ kluviwo.
31Àsɛr be viwo cã mu teŋu nyà àmè kèwo lè Akò be èdùa mè kaka la va nyà kèwo lè Sidɔ̀n, Ahlàb, Àkzib, Hɛlbà, Afìk kudo Rehɔ̀b ò. 32Àsɛr be viwo nɔ̀ Kanàntɔwo dòmè ɖo wo mu teŋu nyà Kanàntɔwo ò.
33Neftalì be viwo mu teŋu nyà àmè kèwo lè Bɛt-Semès kaka la va nyà lè Bɛt-Anàt ò. Wo nɔ̀ Kanàntɔwo dòmè, ɖo wo mu teŋu nyà wo ò, vɔ̀ Neftalì be viwo sɔ wo wɔ̀ kluviwo.
34Àmorìtɔwo tùtù Dàn be viwo ɖoɖa èto ji, eye wo mu nana wo èmɔ̃ ne woa ɖì va bàlìa mè ò. 35Nène a, Àmorìtɔwo kpɔ̀tɔ̀ nɔ̀ Hàrherɛ̀s, Ayalɔ̀n kudo Kalbìm. Vɔ̀a, kè ye Yosɛ̀f be viwo va ɖo ŋusɛ̃a, wo sɔ Amɔrìtɔ kèawo wɔ̀ kluviwo. 36Àmorìtɔwo be ànyigbã lè àpùgo, to Edɔ̀mtɔwo be lipòa ŋuti lè èwèzɛ̃pe, lia àkpãa jo yì.
Currently Selected:
Kòjoɖotɔwo 1: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
