Kòjoɖotɔwo 2

Tɔhonɔ̀ sitè ɖo Izràɛlviwo be àgbè nɔ̀nɔ ŋuti

1Tɔhonɔ̀ be àtikplɔtɔa so Gilgàl va Bokìm, gblɔ̃ be: “Mù ɖè mì to lè Ejiptè eye mù kplɔ̀ mì va ànyigbã kè mù fìã na mìa tɔgbewoa ji. Mù ɖè è gblɔ̃ be nyè mu la gble zòɖùɖu nyè kè mù wɔ̀ kudo mìa gbèɖe ò. 2Eye mìawo ya, mì mu la wɔ̀ zòɖùɖu ɖekpe kudo èdù kèa mètɔwo ò, vɔ̀ mì la mù woabe vɔsakpewo. Co mì mu sètonu na mù ò! Nukɛ ŋuti mì wɔ̀ ekèa ɖo ò? 3Eŋuã mù le gblɔ̃ be nyè mu la nyà wo lè ŋùkɔ̀ na mì ò. Wo la nyi mìabe àfɔ̀klɛ̃nu eye wo la na mì la sumɔ woabe vòduwo.” 4Wàlɛbɛ kè Tɔhonɔ̀ be àtikplɔtɔa gblɔ̃ ènyà kèawo na Izràɛlviwo vɔ̀ kpòa, woa kpata tɔ àlenana ku àvifãfã blòblòblò. 5Wo ɖo nyikɔ na tèpe kèa be Bokìm àlo àvifãtɔwo eye wo wɔ̀ vɔ̀sawo na Tɔhonɔ̀. 6E va jɔ̀ be, wàlɛbɛ kè Yosùa ɖo dùkɔ̃a, Izràɛlviwo kpata trɔ yì àjɔ̀gbè fìãfiã be ànyigbã kè e mã na woa ji àmètɔ̀ àmètɔ̀ ne woa yì xɔ̀ ɛ̀ lè woa si. 7Wo sumɔ Tɔhonɔ̀ lè Yosùa be àgbènɔ̀zã kpata mè; eye kè be kua, wo gbà sumɔ Tɔhonɔ̀ lè ŋùkɔ̀nɔ̀tɔ kèwo keŋu kpɔ ŋùdãnu kèwo Tɔhonɔ̀ wɔ̀ na Izràɛl be dùkɔ̃a be hùenu. 8Tɔhonɔ̀ be sumɔ̃vi, Nun be vi Yosùa ku lè yebe èpè àlɔ̀ ɖèka ci èwo (110) mè. 9Wo yì ɖì ì ɖo ànyigbã kè wo sɔ na ɛ̀ lè Efràyim be èto-nyigbã ji, lè Timnà-Herɛ̀s, lè Gaas be ètoa be èvègo. 10Nène a ye jɔ̀jɔ mè kèa keŋu ku eye wo ɖì. Eye jɔ̀jɔ mè kè jè e yomè a mu gbà nya Tɔhonɔ̀ nyuɛ̃ ɖe kaka la va nya èdɔ jɔ̀ àsu kèwo be wɔ̀ na Izràɛlviwo ò.

Izràɛl dùkɔ̃a gbe Tɔhonɔ̀ sɛ̃sɛ̃

11E va e mè be Izràɛlviwo wɔ̀ ènu kè mu jè Tɔhonɔ̀ be ŋùmè òa, eye wo tɔ Kanàntɔwo be vòduwo sɛ̃sɛ̃. 12Wo gbe tonusèse na Tɔhonɔ̀, woa tɔgbewo be Mawu kè kplɔ̀ wo to lè Ejiptè a. Eye wo le sumɔ àmè kèwo dòmè wo lèawo be vòduwo. Wo dona ètagũ na vòdu kèawo sɔ do àdɔ̀mèze na Tɔhonɔ̀. 13Nène a ye Izràɛlviwo gbe Tɔhonɔ̀, yì le sɛ̃ vòduwo. 14Eye Tɔhonɔ̀ be jìbibi be àdãa sitè ɖo Izràɛlviwo ŋuti. E gble wo ɖo àjòtɔwo be àsi mè, àmèta mà hlùɛ̃ eye e ɖè wo na àmè kèwo dòmè wo lèa. Wo mu gbà teŋu nɔ̀nàtè lè woabe kɛ̃tɔwo be ŋùkɔ̀ ò. 15Tɔhonɔ̀ ɖènà yebe jìbi be àdãa ɖo woa ji lè woabe àhùa wɔ̀wɔwo mè eye wo ɖùnà woa ji sìgbè àlekè Tɔhonɔ̀ ŋutɔ gblɔ̃ ɛ̀ gbà tà ènu ɖo e jia nène. Eye wo jè ènu xàxa blibo mè. 16Ekèa na be Tɔhonɔ̀ sɔna kòjoɖotɔwo ɖona ŋùkɔ̀ na wo. Kòjoɖotɔ kèawo hlùɛ̃nà dùkɔ̃a lè àjòtɔwo si. 17Vɔ̀, e yomè a Izràɛlviwo mu sènà ègbè na kòjoɖotɔawo cã ò, ɖo wo gbà yì sɛ̃nà vòduwo, dona ènugũ na wo. Nène a ye wo gbà jona lè woa tɔgbe be èmɔ̃ kè ji wo sɛ̃ Tɔhonɔ̀ be ɖoɖowo lèa ji. Ɖo wo mu do àfɔ̀ woabe àfɔ̀dowo mè ò. 18Ne Tɔhonɔ̀ cã kòjoɖotɔ ɖe na Izràɛlviwoa, e nɔ̀nà kudo e lè yebe àgbèzã keŋu mè, kpena ɖo e ŋuti sɔ ɖùnà Izràɛl be kɛ̃tɔwo ji. Nyàwo ye be nyi be Tɔhonɔ̀ kuna ŋuzĩzĩ na wo ne wo le ŋɛ̃ lè kɛ̃tɔwo be tɛtɛ ɖo ànyi mèa. 19Vɔ̀, ne kplɔ̀tɔ ŋua gbe ku kpòa, wo gbà trãnà èmɔ̃ wu woa tɔgbewo. Wo gbà yì sumɔna vòdu buwo eye wo dona ètagũ na wo. Wo mu gbà jina ŋutɔ la trɔ va Tɔhonɔ̀ gbɔ ò eye wo drina lè woabe àglajèjea mè.

20Tɔhonɔ̀ do àdɔ̀mèze ɖo Izràɛlviwo ŋuti ɖè gblɔ̃ be: “Kè e nyi be dùkɔ̃ kèa gble zòɖùɖu kè mù wɔ̀ kudo woa tɔgbewo eye wo mu sè àpe ègbè òa, 21gbèɖe, nyè cã nyè mu la gbà nyà dùkɔ̃ ɖekpe lè ŋùkɔ̀ na mì ò, dùkɔ̃ kèwo Yosùa mu teŋu nyà gbɔ̀xue ku ò. 22Dùkɔ̃ kèawo ye mù la zã, la sɔ do mì kpɔ be nyàwo ye mì la sè ètonu la wɔ̀ ɖo àpe èjrowo ji, sìgbè mìa tɔgbewo nène mà a.” 23Eye Tɔhonɔ̀ na dùkɔ̃ kèwo mu ɖè do àsi na Yosùa òa, nɔ̀ Izràɛlviwo dòmè eye mu ciji ɖo woabe nyànya ŋuti klua ò.

Currently Selected:

Kòjoɖotɔwo 2: GEN

Highlight

Copy

Compare