Kòjoɖotɔwo Kpɔ̀kplɔ̀sɔyìemè
Kpɔ̀kplɔ̀sɔyìemè
Kòjoɖotɔwo be xoma kèa le pò nupo so tìtɔ̀titɔ hùenu kè mè Izràɛl nɔ̀ lè Yosùa be èku yomè, wàlɛbɛ kè wo xɔ̀ Kanàn vɔ̀a, kaka na èfìɔɖùɖu be hùenu. Kòjoɖotɔ kèwo na be nyikɔ kèa ci xoma a sia, nyi àmè kèwo Mawu ŋutɔ na ŋusɛ̃ ne woa kplɔ̀ dùkɔ̃a, àlo woa hlùɛ̃ kɔ̀ta ɖewo gã na gàmè ɖewo kpò. Wo gbà nyi àmè kèwo sònà ènyà na dùkɔ̃a. Lè tìtɔ̀titɔ be hùenu ye Mawu nana ŋusɛ̃ yebe àmè ɖèɖovò kèawo.
Xoma a mã ɖo àkpa gã ètɔ̃ mè:
Àkpa cucugbãa, pò nupo so ènu kèwo jɔ̀ lè Kanàn nyigbã xɔ̀xɔ mè kaka na Yosùa be èku (Èta 1.1—2.10).
Àkpa èvègɔ̃a, le ɖè àlekè Mawu hlùɛ̃nà yebe dùkɔ̃a ɖo, to ŋusù ku nyɔ̃nù kèwo E cã sɔ ɖè yebe dùkɔ̃a lè kɛ̃tɔwo sia (2.11—16.31).
Àkpa ètɔ̃gɔ̃a, pò nupo so nɔ̀nɔmè èvè ɖewo, kèwo ɖè gbegble kè zɛ̃ àxue na Izràɛl gbɔ̀xue wo va ɖo èfìɔ ɖoɖo hùenua ŋuti (Èta 17–21).
E ze lè xoma kèa mè be ènu kè jɔ̀nà ɖo Izràɛl jia, nyina èkàdodo kè lè ye ku yebe Mawu dòmèa be emè sonu àlo èkusɛ̃sɛ̃. Ne dùkɔ̃a mu le sètonu òa, kɛ̃tɔwo va tɛna wo ɖo ànyi. Eye ne e do jèsìdo yebe vuɛ̃ eye e do àpa yɔ Mawu a, E gbà va hlùɛ̃nà wo gã. Vɔ̀a, eji-ejia, wo kplɔ̀nà dùkɔ̃ kèwo trɔdo woawo do yì sumɔna woabe vòduwo. Ekèa kplɔ̀nà wo do gbegblewo mè. Àkpa ètɔ̃gɔ̃ kèa, ɖè ènu kè dùkɔ̃a la va trɔ zũ ne e kpɔ̀tɔ̀ le wɔ̀ ènu kè jro èa, fiɔ. Eŋuã, e lè be Mawu be dùkɔ̃ cãcãa ne nya ŋusɛ̃ kè ɖo la nɔ kplɔ̀ ɛ̀a.
Xoma a mè-nyàwo
Ènu kèwo jɔ̀ kaka so Yosùa be èku yomè a (1.1—2.10)
Izraɛ̀l be kòjoɖotɔwo (2.11—16.31)
Ènu vòvò kèwo jɔ̀ a (17.1—21.25)
Currently Selected:
Kòjoɖotɔwo Kpɔ̀kplɔ̀sɔyìemè: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.