Ezayà 8
8
Ezayà be èvia be nyikɔ gɔ̃mèɖèɖe
1Tɔhonɔ̀ gblɔ̃ na mù be: “Sɔ ènuŋlɔ̀kpe gã ne wòa ŋlɔ̀ ɖo e ji be: “Kaba àɖùflui be àdɔ̀kùnuwo mu nɔ̀nàtè ò”. 2Eye mù sɔ ènuŋlɔ̀kpea sɔ fiɔ ɖaseɖùtɔ àdodoe èvè kèwo nyi hũbonɔ Urìa kudo Yèberekìa be vi Zakarìa. 3E yomè a, mù yì dɔ̃ kudo nyɔ̃nù gblɔ̃ɖɛtɔa. E fɔ èfu eye e jì èvi ŋusù ɖèka. Eye Tɔhonɔ̀ gblɔ̃ na mù be: “Ɖo nyikɔ na ɛ̀ be 'Kaba àɖùflui be àdɔ̀kùnuwo mu nɔ̀nàtè ò'”. 4Ɖo gbɔ̀xue ɖèvia la tɔ “mamã” “pàpa” gbɔ̃gblɔ̃a, wo la lɔ Dàmaskò be ènu xɔ̀asìwo kudo Sàmarìa be àdɔ̀kùnuwo va na Àsirìa be èfìɔa.”
Wo la va xa èdùa sìgbè ètɔ̀ ɖɔɖɔ nène
5Tɔhonɔ̀ gbà gblɔ̃ na mù be:
6“Ekè dùkɔ̃ kèa gbe ènu lè
Silò be èsì kè srànà blɛ̀wù,
eye e gbɔjɔ lè èfìɔ Rɛsìn
kudo Rèmalìa be via be wɔ̀nawo be ŋùkɔ̀a,
7eŋuã, Tɔhonɔ̀ la na Efratà be èsì gbogbo wɔ̀adã,
la xa ɛ̀, ɛ̃ɛ Àsirìa be èfìɔa ku yebe ŋusɛ̃ gã ŋua.
Efratà la sitè lùlùlù kaka e la gbã pòhla.
8E la gbã yì xa Yudà,
e la ɖɔ ɛ̀ kaka yì èkɔ̀ gbɔ ke.
E la gbã yì àzɔ̀ge boo
kãkã ɖo àpo ànyigbã kpata ji, Oò Èmanuɛ̀l.”
Dùkɔ̃ ɖekpe mu la teŋu kpe Mawu be dùkɔ̃a ji ò
9Dùkɔ̃wo mì vɔ̃ kaka mìa ku bèɖè.
Mìa ànyigbã be nukpòpewo, mì ɖo èto mù.
Mì teŋu bla àhùakpa co, vɔ̃vɔ̃ la jè mìa ji.
Ɛ̃ɛ, mì la bla àhùakpa co, vɔ̃vɔ̃ la ɖo mì!
10Ne mì ɖo àɖàŋùa, e la gble,
ne mì ɖo ègbè èdua, ma va e mè ò.
Ɖo Mawu lè kudo mi.
Vɔ̃ Mawu kpò
11Tɔhonɔ̀ dà àsi ɖo ji nyè eye e do ègbè àsi na mù be nyè mu gbà kplɔ̀ Yudà be dùkɔ̃a do ò. E gblɔ̃ na mù be:
12“Mì mu gbà gblɔ̃ sebla be ènyà wàlɛbɛ kè
àmè kèawo le gblɔ̃ sebla be ènyà ò.
Ènu kè le do vɔ̃vɔ̃ ji na woa
mu gbà ɖo vɔ̃vɔ̃ na mì ò.
Mì mu gbà vɔ̃ wo ò.
13Mì do è jèsi be Tɔhonɔ̀
ŋusɛ̃ kpatatɔa ye nyi àɖèsã.
E ye mì ɖo la bù, e ye mì ɖo la vɔ̃.
14E la nyi tèpe kɔ̀kɔ̀ɛ kudo
àfɔ̀klɛ̀kpe na Izràɛl be àxuedo èvèa.
E la nyi gàmɔ kudo èɖɔ kèwo mè
Yèruzàlɛmvi sùgbɔ la jè.
15E la na àmè sùgbɔ la klɛ̃ àfɔ̀,
la jè ànyi eye wo la ŋɛ̃.
Wo la gɛ̃ jè èmɔ̃ mè eye
wo mu la teŋu ɖè woa ɖokoewo ò.”
Ènu bɔ̀ kpo ku ŋutènɔ̀nɔ be hùenu
16Mù la wla ènyà kèa ɖo ènu gɔ̃mè; mù la sɔ ènufiɔfiɔ kèa dà ɖo fikè àmè mu la teŋu kè ɖo e ŋuti lè kaba òa, lè ènukplavi nyèwo dòmè. 17Mù nɔ̀tè kpɔ Tɔhonɔ̀ sinu, e ye kè ɖè èkɔ̀ lè Izràɛl ŋuti gbɔ̀xuea. Vɔ̀a, mù le ɖoŋù ɖo e ŋuti. 18Ènyè ŋutɔ kudo ɖèvi kèwo Tɔhonɔ̀ na mù a, mi nyi jèsìdo ku àmèsìasia lè Izràɛl. Mi lè sìgbè dosia nène na Tɔhonɔ̀ ŋusɛ̃ kpatatɔ kè sò nɔ̀pe ɖo Ziɔ̀n be èto kɔ̀kɔ̀ɛa jia.
19Ne wo gblɔ̃ na mì be: “Mì yì ènukãtɔwo gbɔ ne mìa yì kã ènu, mì yì èxɔ̀yɔtɔwo ku èsɔ̀mèkpɔtɔwo gbɔ, ɖo e nyɔ be dùkɔ̃ ne yì kã biɔ lè yebe vòduwo gbɔ, ne biɔ ènukã sè lè tɔgbewo gbɔ na àmè kèwo lè àgbèa be nyɔna.”
20Ne wo gblɔ̃ ekèa na mìa, mì ɖo e ŋuti be: “Ènyàa kudo ènufiɔfiɔa kpò gbɔ ye àgbètɔwo ɖo la va.” Àmè kè mu le wɔ̀ ekèa òa, mu la teŋu kpɔ gomè lè kɛ̃klɛ̃ kè gbãnà mè ò.
Vìvìti mè zɔ̃zɔ̃
21Wo ɖìsà to ànyigbã kpata ji,
wo zĩ wo ɖo ànyi eye àdɔ̀ le wù wo.
Àdɔ̀wùamèa na kaka wo le sɛ̃kpɛ̃
na woabe èfìɔ ku woabe Mawu.
Wo la trɔ ŋùmè ɖoɖa jiŋùkusi,
22e yomè a, wo la trɔ kpɔ ànyigbã a.
Gbledo, vìvìti cicri, vɔ̃vɔ̃ gã ɖe
kudo èzãjiŋɔ ye wo la kpɔ.
Ŋuti fàfa fìɔɖùɖu kè gbãnàa
23Vɔ̀a, mu la gbà nyi vìvìti cicri na dùkɔ̃ kè vɔ̃vɔ̃ gã ɖe ɖɔ ò.
Sãa, Tɔhonɔ̀ na àkpɔ̃ ɖɔ Zabulɔ̀n kudo Neftalì be èdùwo.
Vɔ̀ sɔ̀sɔɛɖe kèa, e la sɔ bùbu tɔ̀hɛ na èmɔ̃ kè to àpù toa,
lè Yɔrdàn be ètɔ̀a be èwèzɛ̃pe goji ku Galilea, àmèjrowo be àgowo ji.
Mina Bible © Bible Society of Togo, 2014.