Ezayà 7
7
Mawu be ègbè na Àkaz: “Mù gbà vɔ̃ ò!”
1Lè hùe kè nu ye Àkaz kè nyi Yotàm be vi, Òzias be tɔgbeyɔvi ɖùfìɔ lè Yudà nyigbã jia, Aràm be èfìɔ Rèsin kudo Izràɛl be èfìɔ Pekà kè nyi Rèmalìa be via, wo yì do èxa na Yèruzàlɛm la sɔ wɔ̀ àhùa kudo è. Vɔ̀a, wo mu teŋu kpɔ xa ɛ̀ ò. 2Wo yì gblɔ̃ ɛ̀ na èfìɔ Àkaz kè lè David be fìɔzìkpea jia kudo yebe cãmìwo keŋu be: “Sirìa be àhùakɔ̃a yì ɖo àsàɖa ɖo Efràyim nyigbã ji.” Èfìɔa kudo yebe dùkɔ̃a tɔ̀zĩ#7.2 Tɔ̀zĩ àlo hũhũ: Vɔ̃vɔ̃ ɖo èfìɔ kudo dùkɔ̃a ɖo àhùa lili wo eye wo ɖo la ji àmè kèwo la kpe ɖo woa ŋutia. gbà hũhũ sìgbè àlekè àya hũhũna àtiwo lè àve mèa nène.
3Tɔhonɔ̀ gblɔ̃ na Ezayà be: “Kplɔ̀ èvi wò Ceà-Yàsuv ɖo ŋuti ne mìa yì kpɔ èfìɔ Àkaz lè èsìdo kè wo kùa be ètagbe lè èmɔ̃ kè yì ènunyàtɔwo be àgblè jia ji. 4Wò la gblɔ̃ na ɛ̀ be: “Dayè-xòmè ne wòa nɔ̀ kpoo. Mù gbà vɔ̃ ò. Èjì wò mu gbà hũhũ ɖo Rèsin so Aràm kudo Rèmalìa be via be àdɔ̀mèze dodo ŋuti ò. Ɖo èfìɔ èvè kèawo lè sìgbè èzòtikpo èvè kèwo kpɔ̀tɔ̀ le tù àzìzɔ kpòa nène. 5Nyàwo, Aràmviwo kudo Pekà gbàkudo Efràyim be àhùakɔ̃wo jro la crɔ̃ wò. Wo gblɔ̃ be: 6'Mì na mia yì xa Yudà nyigbã ne mia do vɔ̃vɔ̃ na wo. Mia tɛ̃ŋùku do wo ne woa wɔ̀ ɖèka kudo mi. Eye mia sɔ Tavɛ̀l be vi ɖo èfìɔ ɖo woa nu.' 7Vɔ̀a, ènu kè Tɔhonɔ̀ Mawu gblɔ̃a ye nyi be: 'ekèa mu la jɔ̀ ò, ekèa mu la va e mè kpɔ ò.
8Ɖo Arɔ̀n be èdùgã ye nyi Dàmaskò
eye Dàmaskò ji kpò ye Rèsin ɖùfìɔ ɖo.'
E gbà kpɔ̀tɔ̀ èpè èkà takpoci àtɔ̃
ne Efràyim be èdùa bèa crɔ̃ keŋu-keŋu
9Efràyim be èdùgã ye nyi Sàmarìa
Efràyim ji kpò Pekà Rèmalìa be via ɖùfìɔ ɖo.
Ne mì mu xɔ̀sè ɖo Tɔhonɔ̀ ji òa,
mì mu la teŋu nɔ̀ àgbè ò.”
Èmanuɛ̀l be jìji jèsìdowo
10Tɔhonɔ̀ gbà pò nupo na èfìɔ Àkaz gblɔ̃ be: 11“Biɔ Tɔhonɔ̀ àpo Mawu a jèsìdo ɖe. Biɔ ɛ̀ so kaka èkuwode, àlo so kaka jiŋùkusi ke.”
12Vɔ̀ Àkaz ɖo e ŋuti gblɔ̃ be: “Aò, nyè mu la biɔ ènu ɖekpe ò, ɖo nyè mu ji la do Tɔhonɔ̀ kpɔ ò.”
13Eye Ezayà gblɔ̃ be: “Mì ɖo èto, mìa David be àxuedo a, mì le do tùkaɖa na àmèwo kaka gbà le do tùkaɖa na àpe Mawu a? 14Eŋuã Tɔhonɔ̀ ŋutɔ la na mì jèsìdo ɖe be: Tùgbɛ̀jɛvi lè àlɔ̀jia la fɔ èfu eye e la jì èvi ŋusù ɖèka. E la yɔ ɛ̀ be Èmanuɛ̀l#7.14 Èmanuɛ̀l: Mawu lè kudo mi. 15E la nɔ nù ànɔsi kpɛ̃kpɛ̃ ku ànyisì kaka sɔ na gà kè mè be la nya èvuɛ̃ lè ènyuɛ̃ gbɔ eye be la cã ènyuɛ̃ wɔ̀wɔ. 16Fifìa, wò le vɔ̃ Arɔ̀n kudo Izràɛl be èfìɔwo. Vɔ̀a, gbɔ̀xue ɖèvi ŋusù kèa la nya èvuɛ̃ cìcri, eye e la cã ènyuɛ̃ wɔ̀wɔa, èdù èvè kèawo mètɔwo la si gble woabe ànyigbãwo ɖɛ. 17Vɔ̀a, Tɔhonɔ̀ la na àyàɖùɖu hùenu sɛ̃sɛ̃wo la va na wò, kudo àpo dùkɔ̃a gbàkudo àpo àxuedo a. Hùenu sɛ̃sɛ̃ kèawo ɖekpe mu va kpɔ so kaka kè ye Izràɛl be fìɔdua ma lè Yudà tɔ̀a ŋuti ò. Eye Aràm be èfìɔa ji be la to va fifì.”
Todɔ̃ la va to Aràm viwo ji
18E la va e mè lè àzã ŋuawo ji be
Tɔhonɔ̀ la plu tɔ̀bɔ̀su kèwo lè fikè ye
Ejiptè be ètɔ̀gã do ènu àpù mè lèa
kudo ànyi kèwo lè Aràm nyigbã jia.
19Woa kpata la va jè ɖo bàlì wɔ̀ èkpewo mè,
lè àkpã fɛ̃fɛ̃wo mè, lè ègbe do àmàwo ji,
gbà jè ɖo èsìnùpewo kpata.
20Gà ŋuã mèa,
Tɔhonɔ̀ la dà ègɛ̃plɔnu so
ètɔ̀ Efratà be àgo ɖèa ji.
Ɛ̃ɛ, e la plɔ èta na mì,
la plɔ èfuwo lè mìa ŋuti
kaka jè mìabe ègɛ̃wo ji.
21Gà ŋuã mè kèa, àmè sia àmè la nyì
ènyìnɔ ɖèka kudo ègbɔnɔ èvè.
22Wo la nɔ na ànɔsi sùgbɔ kaka be
wo la teŋu nɔ ɖù ànɔsi kpɛ̃kpɛ̃.
Ɛ̃ɛ, àmè kèwo keŋu la kpɔ̀tɔ̀ ci ànyigbã jia,
la nɔ ɖù ànɔsi kpɛ̃kpɛ̃ kudo ànyisì.
23Gà ŋuã mè ke ye
vɛ̃-gble kè mè ye vɛ̃ka hotu hotuwo bɔ lèa,
la ci gbalo ye àŋùja la vũ cɔ̃ e ji.
24Àŋùja la vũ cɔ̃ ànyigbã a
eye àmèwo la va dà àdè lè
funu ku àŋùtiwo kudo àŋùdàti.
25Eye haɖo àŋùjawo ŋutia,
àmè ɖe be àfɔ̀ mu la teŋu gbà jè ètokɔ̃ɛ
kèwo ji wo dènà àgblè lè sãwoa ji ò.
Wo la trɔ zũ ènyìwo be ènuɖùpewo
kudo àlɛ̃wo be èkpamè.
Mina Bible © Bible Society of Togo, 2014.