Ezayà 9
9
1Dùkɔ̃ kè le zɔ̃ lè vìvìti mèa
kpɔ kɛ̃klɛ̃ gã ɖe.
Kɛ̃klɛ̃ be èŋù ɖe kè na
àmè kèwo lè vìvìti be ànyigbã jia.
2Tɔhonɔ̀, wò ɖɔ wo kudo nyɔna
eye woabe jìjɔɛa gbãgo.
Wo le kpɔ jìjɔɛ lè àpo ŋùkɔ̀ sìgbè
àlekè wo kpɔna ɛ̀ lè nukuyàya
àlo àmɔ̀nyɔ̀nuwo be mamã hùenu nène.
3Ɖo wò ɖè àpo dùkɔ̃a to lè àmè zĩ ɖo ànyi mè,
lè èkpò kè le do àbì àbɔta na ɛ̀a si,
lè èba kè le pò èa si.
Wò gbã ekèawo sìgbè àlekè wò wɔ̀ ɛ̀
lè Madìantɔwo be ètèsisi mèa nène.
4Kɛ̃tɔwo be àfɔ̀kpa kèwo na ànyigbã hũhũ
kudo àwù kèwo pò èhuãwo kpata nyɔ ne
woa tɔ wo èzò. Wo nyi èzò be nuɖùɖu.
5Ɖo wo jì èvi ɖe na mi,
wo na mi ɖèvi ɖèka.
Wo na ɛ̀ jiɖùɖu.
Wo dà nyikɔ ɖo e ji be:
“Ètopòɖotɔ nyuɛ̃, Mawu ŋusɛ̃tɔ,
ètɔ mà-vɔ, fàfa be fìɔvi.”
6Yebe àcɛ̀a la kèkèta
eye yebe fàfa la nɔ̀ ànyi tɛ̀gbɛ̀.
E la ɖùfìɔ lè David be fìɔzìkpea ji
eye e la le fìɔdua ɖotè.
E la na bèlele la nɔ̀ jèna
kudo jɔ̀jɔɛwɔ̀wɔ ŋuti kaka sɔyì.
Tɔhonɔ̀ ŋusɛ̃ kpatatɔ be lɔ̃lɔ̃ ye la wɔ̀ ekèa.
Tɔhonɔ̀ be àdɔ̀mèze ɖo Sàmarìa ji
7Tɔhonɔ̀ gblɔ̃ ènyà ɖo Yakɔb be jìjimèviwo ŋuti,
ènyàa yì jè Izràɛl be àkpa ɖèka ji.
8Dùkɔ̃a kpata nya ekèa.
Efràyim ku Sàmarìatɔwo kpata gblɔ̃nà ègòyinya be:
9“Èkpe sòso be èglìwo mù,
mi la tù èxɔ̀ kudo èkpe kpàkpawo,
lokòti be èxɔ̀tiwo mù,
mi la ɖɔ̀lì wo kudo èjèti be àtikpowo.”
10Nène a, Tɔhonɔ̀ na ŋusɛ̃
Rɛsìn be kɛ̃tɔwo ɖo Izràɛl ji.
E do àdã ètamè na yebe kɛ̃tɔwo,
11Aràmtɔwo sitè so èwèzɛ̃pe,
Filistìtɔwo lè ŋùgbe na wo.
Eye wo trɛ̃ Izràɛl keŋu-keŋu.
Co Tɔhonɔ̀ be àdɔ̀mèzea nu mu ci ò
eye yebe àbɔ sɛ̃sɛ̃a gbà lè àdã ji kòkò.
12Lè e mèa, dùkɔ̃a mu trɔ va
àmè kè le pò èa gbɔ ò,
eye Izràɛlviwo mu ji Tɔhonɔ̀
ŋusɛ̃ kpatatɔa be ŋùmè ò.
13Nène a, lè ŋùkèkè ɖèka pɛ mèa,
Tɔhonɔ̀ gbã ènuwo kpata lè Izràɛl,
so èta kaka va gɔ̃mè.
14E pò àgbònùgla ku
cãmìwo pu ànyi so kaka èji,
eye àjè gblɔ̃ɖɛtɔwo so gɔ̃mè.
15Kplɔ̀tɔwo kplɔ̀ dùkɔ̃ trãmɔ
eye ŋùkɔ̀nɔ̀tɔwo gbà trã ɛ̀ ɖo ji.
16Ekèa ŋuti ye Tɔhonɔ̀ mu la sɔkè jìjimè kèa ò.
Mu la kpɔ ɖo e mè na woabe àhòsìwo ku cɔɛviwo ò,
ɖo àmè ɖekpe mu la nɔ̀ ègbèji ò, eye wo wɔ̀ ènuvuɛ̃.
Ènu kè wo le gblɔ̃a keŋu nyi bùsunya.
Co Tɔhonɔ̀ be àdɔ̀mèzea nu mu ci ò
eye yebe àbɔ sɛ̃sɛ̃a gbà lè àdã ji kòkò.
17Ɖo èkunyànyrã le bì sìgbè èzò nène,
le fiɔ̃ àklãti ku àŋùjawo
eye e fiɔ̃na àve be àtiviviwo kaka
èzòa yìnà èji boo ku àzìzɔ lìlìlì.
18Kù ɖo Tɔhonɔ̀ be jìbi be àdã ŋutia,
èdùa kpata lezò eye dùkɔ̃a trɔ zũ èzò be èlã.
Àmè ɖekpe mu hlùɛ̃ nɔ̀via gã ò.
19Wo hlà ènu ɖe ɖù lè ɖùsi mè
co àdɔ̀ gbà le wù wo.
Wo kã ènu ɖe ɖù lè èmìɔ̃ mè
vɔ̀a, wo mu ɖɔpò ò.
Àmè sia àmè le hlà nɔ̀via le ɖù.
20Manasè kudo Efràyim
wo le hlà woa nɔ̀nɔwo.
Wo yì wɔ̀ ɖèka ɖo Yudà ŋuti.
Co lè ekèa mèa, Tɔhonɔ̀
be àdɔ̀mèzea nu mu ci ò
eye yebe àbɔ sɛ̃sɛ̃a gbà lè àdã ji kòkò.
Mina Bible © Bible Society of Togo, 2014.