Ezayà 6
6
Tɔhonɔ̀ yɔ Ezayà ne bèa nyi yebe gblɔ̃ɖɛtɔ
1Lè èpè kè mè èfìɔ Òzias ku lèa, mù kpɔ Tɔhonɔ̀ nɔ̀ ànyi lè yebe fìɔzìkpe gãa ji. Yebe àwù vlàyà be gɔ̃mè ɖɔ mawuxɔa pɔpɔpɔ. 2Sèrafìwo lè àya mè lè èta mè na ɛ̀. Woa dòmètɔ ɖe sia ɖe ɖo àwàda àdɛ̃. Wo sɔna èvè cɔ̃na ŋùkumè, èvè sɔ wlana àma eye èvè kpɔ̀tɛawo sɔ zrònà. 3Wo le do àpa ɖoɖa woa nɔ̀nɔwo be:
“Kɔ̀kɔ̀ɛ, kɔ̀kɔ̀ɛ, kɔ̀kɔ̀ɛ,
ye nyi Àhùadù Tɔhonɔ̀a!
Ànyigbã kpata ɖɔ kudo yebe gogo!”
4Èxɔ̀wo be dodoewo hũhũ lè àpa dodowo be ègbè ɖèɖe nu eye Tɔhonɔ̀ be àxuea ɖɔ kudo àzìzɔ gɛ̀ɛ. 5Nène a ye mù gblɔ̃ be: “Bàbà na mù! Mù crɔ̃ ɖo mù nyi àgbètɔ kè be ènu mu kɔ̀ ò, eye mù gbà lè dùkɔ̃ kè be nuyuwo mu kɔ̀ òa, dòmè. Àpe ŋùkuviwo kpɔ èfìɔ, àhùadù Mawu a!”
6Vɔ̀ Sèrafìwo dòmètɔ ɖèka zrò va gbɔ nyè. E le èzòka hɛ̀ kè be sɔ lè vɔsakpea ji kudo èzòkalenua#6.6 Èzòkalenu: Wo gbà yɔna ɛ̀ be àbɛ. ɖo àsi. 7E sɔ ɛ̀ tɔ ènu na mù gblɔ̃ be:
“Fifì kè èzòka kèa tɔ ènu na wòa,
wo ɖè àgɔ̀jèje wòa jo,
eye wo tutu èvuɛ̃ wòa keŋu.”
8Eye mù sè Tɔhonɔ̀ be ègbè gblɔ̃ be: “Àmè kɛ mù la dɔ̃ ò? Àmè kɛ ye la yì na mi ò?” Mù ɖo e ŋuti gblɔ̃ be: “Ènyè ye kè, dɔ̃ mù!”
9Tɔhonɔ̀ gblɔ̃ na mù be:
“Yì gblɔ̃ na dùkɔ̃ kèa be:
“Mì la ɖo èto nyuɛ̃ ɖe,
vɔ̀ mì mu la sè ènu ɖe gɔ̃mè ò;
mì la kpɔ ènu nyuɛ̃ ɖe,
vɔ̀ mì mu la ŋɔjè ènu ɖe mè ò”
10Trì èjì na wo, woabe ètowo ne tu
eye wo mu gbà kpɔ ènu cã ò.
Cɔ̃ ènu woabe ŋùkuviwo ji
ne wo mu gbà kpɔ ènu ò;
woabe ètowo, ne wo mu gbà sè ènu ò,
woabe èjìwo, ne wo mu gbà ŋɔjè ènu mè ò.
Nène a, wo mu la teŋu trɔ va gbɔ nyè ne woa gã ò!”
11Mù gblɔ̃ be: “Tɔhonɔ̀, kaka va na gà kɛ mè ò?” E gblɔ̃ be: “Kaka va na gà kè mè ye èdùgãwo la gbã, èglìkpowo ɖèɖewo la kpɔ̀tɔ̀ eye àmè be àgbè la bua. Ànyigbã la trɔ zũ ŋuzĩzĩ be zògbè.”
12Tɔhonɔ̀ la ɖo àmèwo ɖoɖa àzɔ̀ge boo.
Eye àgblè sùgbɔ la ci gbalo lè ànyigbã ji.
13Ne e kpɔ̀tɔ̀ dùkɔ̃a be àkpa èwogɔ̃a lè ànyigbã jia
èzò la bì wo sìgbè àti kè wo sò pu ànyi a nène.
Àti be ègũnu kudo èkèawo kpò ye la kpɔ̀tɔ̀.
Vɔ̀a, ègũnu kèa la trɔ jè ɖo Mawu be jro ji.
Mina Bible © Bible Society of Togo, 2014.