Ezayà 61
61
Mawu do ŋusɛ̃ yebe àmèdɔ̃dɔ̃a
1Tɔhonɔ̀ Mawu be gbɔ̃gbɔ̃a lè ji nyè.
Nyàwo e ɖè mù ɖovò be ma sɔ
àŋɛ̀ nyuɛ̃a yì na àmè gbɔjɔgbɔjɔwo.
E dɔ̃ mù be ma yì ɖo àsi àkɔ na
àmè kèwo be èjì gbãawo,
ne ma to na àhùalewo be: “Mì vò!”
Eye ma gbà to na àmè kèwo lè gàkpawo
mèa be mì la trɔ kpɔ ŋùkèkè be kɛ̃klɛ̃.
2Ne ma do Tɔhonɔ̀ be ŋuzĩzĩkuku be èpèa be àŋɛ̀,
ŋùkèkè kè ji miabe Mawu a la biɔ èhlɔ̃ miabe kɛ̃tɔwoa.
Ne ma ɖo àsi àkɔ na àmè kèwo kpata le lòfũa.
3Ziɔ̀n ŋuti ye wo le lòfũ ɖo.
Vɔ̀a mù la tà àvɔ na wo ɖo àfi kè wo sìa tèpe.
Mù la sì àmì xɔ̀ èci na wo ɖo èfũlòlo tèpe.
Eye mù la do àwù yeye na wo ɖo gbɔ̀jɔ̀ gbɔjɔ tèpe.
Wo la sɔ wo sɔ̀ kudo àti kèwo ɖènà Mawu be gogo fiɔa
ku àvesu kèwo dona bùbu Tɔhonɔ̀ ŋutia.
4Woawo ye la trɔ va tù gbèɖegbè be èglìkpo gbãgbãwo.
Wo la trɔ fɔ̃ tɔgbewo be àxuewo ɖotè.
Eye èdù kèwo ci gbalo so gbèɖegbèwo, la trɔ gbɔ̀ àgbè.
5Àmèjrowo ye la kplɔ̀ mìabe àlɛ̃ kudo ègbɔwo.
Wo la so àzɔ̀ge boo la va dà àgblèwo na mì
eye wo la gbà kpɔ mìabe vɛ̃-gblewo ji.
6Co wo la yɔ mì be “Tɔhonɔ̀ be hũbonɔwo”,
wo la ɖo nyikɔ na mì be “miabe Mawu be sumɔ̃viwo”.
Dùkɔ̃wo be àdɔ̀kùnuwo la trɔ zũ mìa tɔ̀
eye mì la sɔ woabe àcɔɖonuwo wɔ̀glo.
7Kè wo la kpɔ̀tɔ̀ nɔ do mì ŋùkpɛ̃ kudo èzũ vòvòvòwoa,
mù la na mì àjɔ̀ àkpa èvè lè woabe ànyigbã ji
eye mì la nɔ̀ àgbè lè jìjɔɛ mà-vɔ mè.
8Ɖo nyàwoa, ènyè Tɔhonɔ̀ Mawu,
mù lɔ̃nà jɔ̀jɔɛ eye mù crì èfĩ kpòtoe.
Mù la trɔ sɔ ènu kè wo tafu mì xɔ̀ lè mìa sia na mì.
Eye mù la wɔ̀ zòɖùɖu kòkòɖàbì kudo mì.
9Mìabe viwo la trɔ zũ huɛ̃yiwo lè dùkɔ̃wo dòmè
eye wo la jèsì mìabe tɔgbe tɔ̀gbè yɔviwo.
Wo la nya be wo nyi Tɔhonɔ̀ be dùkɔ̃ cãcã.
10Ènu ku na mù ɖo Tɔhonɔ̀ ŋuti,
Ɛ̃ɛ, èkla nyèa ɖɔ ku jìjɔɛ ɖo Mawu nyèa ŋuti.
Ɖo e hlùɛ̃ mù gã, e sɔ jɔ̀jɔɛ be àwù do na mù
sìgbè nyɔ̃nùkpetɔ àlo hũbonɔ kè cɔ̃ jègbàa nène.
E lè sìgbè àgɔ̀sɔ kè wo ɖo àcɔ na a nène.
11Ɛ̃ɛ, sìgbè lekè ànyigbã ɖènà
àti kèwo le jèa be ènu toa,
sìgbè lekè àbɔ nana ènuwo be èkusɛ̃sɛ̃ jènàa,
nènea Tɔhonɔ̀ la na jɔ̀jɔɛ nyinyi kudo
kàfù kafu la mìɔ̃ lè dùkɔ̃wo kpata be ŋùkɔ̀ yeŋu.
Mina Bible © Bible Society of Togo, 2014.