Ezayà 60
60
Yèruzàlɛm: Xixea be kɔ̀kɔ̀ɛ
1Sitè, Yèruzàlɛm ne wòa klɛ̃.
Ɖo kɛ̃klɛ̃ wòa gbãnà,
Tɔhonɔ̀ be gogoa kɔ̀ ɖo ji wò.
2Kpɔɖa èzã do ɖo ànyigbã ji
eye àhũ jàja cɔ̃ dùkɔ̃wo kpata ji.
Vɔ̀a, Tɔhonɔ̀ le klɛ̃ na wò eye
yebe gogoa le kɔ̀ ɖo ji wò.
3Dùkɔ̃wo la zɔ̃ va kɔ̀kɔ̀ɛ wòa gbɔ
eye èfìɔwo la ɖota àpo kɛ̃klɛ̃ be totoa mè.
4Kɔ ŋùkumè yì ji ne wòa kpɔ ènu pòxla ɖokoe wò gòdò.
Àmèwo kpata bɔ̀ gbãnà gbɔ wò.
Èvi wò ŋusùwo la gbɔ̀ so dìdìpe,
wo la kɔkɔ èvi wò nyɔ̃nùwo ɖo àbɔwo mè va.
5Ne ekèa jɔ̀ a, wò la kpɔ be wò la klɛ̃ ku jìjɔɛ,
àpo èjì la ɖɔ ku jìjɔɛ. Ɖo wo la lɔ
àpù mè be àdɔ̀kùnuwo va na wò,
dùkɔ̃wo be àdɔ̀kùnuwo kpata la va zɛ̃ gbɔ wò.
6Èsɔ èkpovènɔ̀wo be ha la va cɔ̃ wò,
Madìan ku Efà be èsɔ èkpovènɔ̀-viwo.
Woa kpata la so Sabà#60.6 SabàSabà tovò na Sebà àlo Sevà. Sabà lè Àrabìa gbɔ lè àpùgo va.
Wo la hɛ̃ sìka kudo lifi eye
wo la kafu Tɔhonɔ̀ lè àmèwo be ŋùkɔ̀.
7Wo la bɔ̀ Kedàr be èlãha kpata na wò.
Wò la teŋu zã Nèbayɔtè
be àgbòwo na àpo vɔ̀sawo.
Wo la sɔ wo dà ɖo àpe vɔsakpea ji
eye woabe vɔsa la jè ŋùmè na mù.
Ɛ̃ɛ mù la do bùbu mawuxɔ nyèa ŋuti.
8Àmè kɛwo ye nyi àmè kèwo le zrò sìgbè lilikpowo nène,
sìgbè àhɔ̃ne kèwo zrò le yì woabe nɔ̀pewo nène ò?
9Ɛ̃ɛ, ètɔ̀dòmèkɔ̃ɛ̃wo kudo èdù lè àzɔ̀ge boo
le kpɔ àpe àsinu kudo ŋùɖo gã ɖe.
Tarsò be àpùjihũwo jè ŋùkɔ̀.
Wo hɛ̃ èvi wòwo gbãnà so èdù mà-sɔɛwo mè
ku woabe sìka kudo klòsalò.
Wo gbãnà la va na mù gogo,
ènyè àpo Mawu, Izràɛl be àɖèsãa ye.
10Àmèjroviwo ye la trɔ tù àpo èglìwo
eye woabe èfìɔwo la nɔ̀ àpo ŋusɛ̃ gɔ̃mè.
Ɖo mù pò wò lè àpe àdɔ̀mèze mè sãa,
vɔ̀a, lè àpe àdɔ̀mè nyuɛ̃ wɔ̀wɔ mèa,
mù la ɖè lɔ̃lɔ̃ nyèa fiɔ wò.
11Àpo àgbowo la nɔ̀ hũhũ ɖotè gbàa
èzã kudo ŋùkèkè, eye àmè ɖe mu la tu wo ò.
Nène a ye wo la lɔ dùkɔ̃wo be àdɔ̀kùnuwo va na wò
eye woabe èfìɔwo ŋutɔ ye la nɔ̀ ŋùkɔ̀ na wo va.
12Dùkɔ̃ àlo fìɔdu kèwo la gbe be yèwo mu la sumɔ wò òa, la crɔ̃. Wo la crɔ̃ dùkɔ̃ kèawo keŋu-keŋu.
13Libàn be àti xɔ̀asì kèwo
nana ɛ̀ gogoa kpata la va gbɔ wò.
Wo la sɔ ɖo àcɔ na àpe Nɔ̀pe Kɔ̀kɔ̀ɛ;
Eye mù la na gogo nɔ̀pe kè àfɔ̀ nyèwo zìɔ̃ ɖoa.
14Àmè kèwo ɖì wò gbɔa be viwo
la sɔ èta do ègũ va gbɔ wò.
Wo la va do ènu ègũ lè ŋùkɔ̀ na wò,
àmè kèwo kpata ɖè èkɔ̀ lè ŋuti wò sãa.
Eye wo la yɔ wò be “Tɔhonɔ̀ be èdù”,
“Ziɔ̀n, Izràɛl be àɖèsãa”.
15Wo ɖèkɔ̀ lè ŋuti wò sã, wo crì wò
eye àmè ɖekpe mu tona àpo èxɔ̀ gbàde nu ò.
Vɔ̀a, mù la ɖo àcɔ na wò, ne woa kpɔ jìjɔɛ so
ŋuti wò so jìjimè yì jìjimè.
16Wò la nù dùkɔ̃ kpɔ̀tɛawo be nyìnɔsi,
wò la sɔ èfìɔwo be àdɔ̀kùnuwo ɖù ècrɔ̃.
Nène a wò la nya ɛ̀ be: ènyè Tɔhonɔ̀ ye nyi àpo hlùɛ̃tɔ,
be Yakɔb be Mawu ŋusɛ̃kpatatɔa ye na yè vòvo.
17Eye mù la hɛ̃ sìka va ɖo gàjɛ̃ tèpe,
Klòsalò ɖo àti tèpe eye gàyìbɔ ɖo èkpe tèpe.
Hàɖo ŋuti nyèa, mù la na ŋuti fàfa la ɖùfìɔ
eye jɔ̀jɔɛ nyinyi ye la nɔ kplɔ̀ wò.
18Wo mu la gbà sè èkunyànyrã lè àpo ànyigbã ji,
àlo ènugbãgbã ku tùkaɖawo lè àpo àgbowo mè ò.
Wò la yɔ àpo glìkpowo be “Hlùɛ̃gã”,
àgbo wòawo be “Gogo”.
19Dɔ̃ŋùkusu mu la gbà na wò kɔ̀kɔ̀ɛ lè kedè ò,
wètri mu la gbà na wò kɔ̀kɔ̀ɛ lè èzã mè cã ò;
Tɔhonɔ̀ ŋutɔ ye la nɔ na wò kɔ̀kɔ̀ɛ wè sia wè.
Àpo Mawu a ye la nɔ na wò gogo tɛ̀gbɛ̀.
20Gbèɖe-gbèɖe àpo èwèa mu la gbà ɖo èxɔ̀ ɖe ò.
Àpo wètria mu la gbà bu ɖe ò, ɖo Tɔhonɔ̀ ŋutɔ
ye la nyi àpo kɔ̀kɔ̀ɛ kaka sɔ yì;
Eye èfũlòzã wòwo nu la ci.
21Àpo dùkɔ̃-mèviwo kpata la nyi àmè jɔ̀jɔɛwo
eye wo la ɖù ànyigbã be crɔ̃.
Wo nyi àpe àlɔ̀nudɔwo, ne woa ɖè gogo nyèa fiɔ.
Nyè ŋutɔ mù na wo la nɔ̀ sìgbè àti kèwo le jèa nène.
22Xòmè kè hùea, la sɛ̃ku fuu
eye kè ŋuti ŋusɛ̃ mu lè òa,
la trɔ zũ dùkɔ̃ sɛ̃ŋu sùgbɔ;
Nyè ŋutɔ mù la na ekèa
la va e mè kaba lè yebe hùenu.
Mina Bible © Bible Society of Togo, 2014.