Ezayà 62
62
Mawu trɔ gbɔ̀ àgbè Yèruzàlɛm
1Ɖo lɔ̃lɔ̃ kè mù ɖo na Yèruzàlɛm ŋutia,
nyè mu la fɔ̀ àlɔ̀ ɖo àta mè ò.
Ɖo lɔ̃lɔ̃ kè mù ɖo na Ziɔ̀n ŋutia,
nyè mu la bɔ̀ ènu kaka ma na
yebe jɔ̀jɔɛ nyinyia bèa ze glãlã ò.
Mù la na yebe hlùɛ̃gã
la kɔ̀ sìgbè èwè jàse nène.
2Dùkɔ̃ pòpuwo la kpɔ àpo jɔ̀jɔɛ nyinyi
eye èfìɔwo la kpɔ àpo gogo.
Nène a ye wo la yɔ nyikɔ yeye
kè Tɔhonɔ̀ ŋutɔ ɖoa, na wò yeŋu.
3Wò la nɔ̀ sìgbè jègbà ɖìnyi nène
lè Tɔhonɔ̀ be àlɔ̀ mè,
sìgbè èfìɔwo be dàbla nène
lè àpo Mawu be àlɔ̀ mè.
4Wo mu la gbà gblɔ̃ na wò be 'wo ɖèkɔ̀ lè ŋuti wò ò'.
Wo mu la gbà yɔ àpo ànyigbã be 'èkònɔ̀-nyigbã ò'.
Vɔ̀a, wo la yɔ wò be 'jìjɔɛ donu',
eye wo la yɔ ànyigbã wòa be 'Èsrɔ̃ nyuɛ̃'.
Ɖo wò nyi jìjɔɛ donu na Tɔhonɔ̀
eye e la na ànyigbã wòa la kpɔ èsrɔ̃ la ɖè.
5Nyàwo sìgbè lekè ɖèkajɛ ɖènà tùgbɛ̀jɛ àgɔ̀sɔa,
nènea ye àmè kè la trɔ tù wòa,
la nɔ̀ èsrɔ̃ tèpe na wò.
Sìgbè lekè nyɔ̃nù yeye kè wo kplɔ̀a
dona jìjɔɛ na èsrɔ̃a,
nènea ye wò la do jìjɔɛ na àpo Mawu a yeŋu.
6Mù sɔ èdùɖiatɔwo dà ɖo
àpo àgbògbòawo ji, Yèruzàlɛm.
Wo le ɖia èdùa èzã ku kedè ètèmàtɔ.
“Mìa èzãɖiatɔ kèwo le na ye
Tɔhonɔ̀ le ɖoŋù Yèruzàlɛm jia,
mì yì èdɔ ji kpoo!
7Eye mì mu gbà na ne Mawu ne nɔ̀tè,
kaka bèa sɔ ètomè fàfa kè jèa na Yèruzàlɛm
eye bèa gbà nyi kàfù kafu be ènu na ànyigbã kpata ò.”
8Tɔhonɔ̀ ŋutɔ ye kã àtãŋu kèa be:
“Kaka kè mù kpɔ̀tɔ̀ ɖo ŋusɛ̃a,
nyè mu la gbà na àpo kɛ̃tɔwo la ɖù àpo èlù ò.
Gbèɖe àmèjroviwo mu la gbà nù
àpo vɛ̃ kè ŋuti wò jè àgbàgba ɖo ò.
9Vɔ̀a àmè kèwo jè àde, lɔ èlùawo ɖo
àvà jia ye la ɖù woabe àlɔ̀nudɔ.
Àmè kèwo ye gbã vɛ̃kusɛ̃sɛ̃awo ye
la nù vɛ̃a lè àpe mawuxɔ kɔ̀kɔ̀ɛa mè.”
10Mìa Yèruzàlɛm-tɔwo,
mì to àgboawo mè yì,
mì to wo mè yì!
Mì yì jrà èmɔ̃a ɖo na dùkɔ̃a,
mì do èmɔ̃a ne mìa tu èdowo.
Eye mì ɖo èkpewo ɖo èmɔ̃a ji,
ne mìa kɔ àplãŋuga yì ji
lè dùkɔ̃wo be ŋùkɔ̀.
11Tɔhonɔ̀ ɖè ègbè yì kaka
ànyigbã be nukpòpewo be
mì gblɔ̃ na Ziɔ̀n be èdùa be:
“Kpɔɖa àpo hlùɛ̃gã be ŋùkèkèa gbãnà,
yebe fɛ̃tu cã bɔ̀ ɖo e ŋuti
eye yebe àlè jè ŋùkɔ̀ na ɛ̀.
12Wo la yɔ wo be: “Dùkɔ̃ kɔ̀kɔ̀ɛ”,
“Tɔhonɔ̀ be àmè xɔ̀plèwo”,
eye wo la yɔ wò be “Àmè jojo”,
“Èdù kè jro àmèa”.
Mina Bible © Bible Society of Togo, 2014.