Ezayà 5
5
Lɔ̃lɔ̃tɔ nyuɛ̃ ku yebe vɛ̃-gble
1Mì na mù èmɔ̃ ne ma jìhà na èxlɔ̃ nyè. Lɔ̃lɔ̃tɔ nyè kudo yebe vɛ̃-gble be èhà ye.
Èxlɔ̃ nyè ɖo vɛ̃-gble lè ètokɔ̃ɛ nyigbã nyuɛ̃ ɖe ji.
2E gùdù ànyigbã a, cã èkpewo kpata lè e ji
e do vɛ̃ku àdodoewo ɖo ànyigbã ji.
E tù èmɔ̃jikpɔxɔ ɖèka ɖo dòdòmè
eye e gbà tù vɛ̃fiɔ̃nu ɖo e mè.
Eye e le nɔ̀tè kpɔ vɛ̃kusɛ̃sɛ̃ àdodoewo
vɔ̀a, vɛ̃kusɛ̃sɛ̃ gbegblewo sɔ̃ŋu ye be kpɔ.
3E gblɔ̃ be fifìa mìa Yèruzàlɛm kudo Yudà viwo,
mì sò ènyà na nyè kudo vɛ̃-gble nyèa.
4Nukɛ kpɔ̀tɔ̀ ye mù ɖo la gbà wɔ̀
wu ekèa na vɛ̃-gblea ò?
Co vɛ̃kusɛ̃sɛ̃ gbegblewo kpò be na mù.
5E nyɔ, mù nya ènu kè
mù la wɔ̀ kudo vɛ̃-gble nyèa:
Mù la gbã èkpa kè mù tɔ̃ trɔ do èa, jo
ne èlãwo woa va ɖù yebe àmàkpawo.
Mù la mù èglì kè trɔ do èa, eye àmèwo la zɔ̃ to e ji, eye wo la nyàmà ɛ̀.
6Mù la sɔ ɛ̀ wɔ̀ àve nyigbã.
Àmè ɖe mu la yì sò yebe àtiwo be àlɔ̀zɛ̃wo
kaka la gã ègbewo lè e ji ò.
Àŋùja kudo àklãtiwo ye la mìɔ̃ ɖo e ji
eye mù la do èse na lilikpowo be wo mu gbà
na ne èsì ne jà kɔ̀ ɖo e ji ò.
7Tɔhonɔ̀ ŋusɛ̃kpatatɔa be vɛ̃-gble ye nyi Izràɛl.
Yudà nyi àgblè kè dona jìjɔɛ na ɛ̀a.
Tɔhonɔ̀ le nɔ̀tè kpɔ yebe ènyàsòso kè jèa
vɔ̀a, màjɔ̀ màjɔ kpò be lebè na.
E le nɔ̀tè kpɔ yebe jɔ̀jɔɛwɔ̀wɔ
vɔ̀a, àmè mà-ɖo àmè be ènuxàxa sɔ̃ŋu ye bɔ.
Hùɛgbledo àdɛ̃wo ɖo Yudà be ègawo ŋuti
8Bàbà na àmè kèwo le ca
àxue ɖo àxue nu, àgblè ɖo àgblè nu.
Wo le xɔ̀ àmèwo be nɔ̀pewo kaka
èdù bliboa la trɔ zũ woa ɖèka pɛɛ tɔ̀.
9Àhùadù Tɔhonɔ̀a kã àtãŋu kèa na mù be:
“Mù tà ènu kèa be àxue kèawo kpata la crɔ̃.
Wo la gbã gudu-gudu ɖo,
àmè ɖekpe mu la gbà nɔ̀ woa mè ò.
10Ànyigbã èbò èwo be vɛ̃-gble
mu la na wu vɛ̃ lità èkàciwo ò.
Ne wo do èlù kìlo èkàvè takpoa,
wo mu la ɖè wu kìlo èwo ò.”
11Bàbà na àmè kèwo la fɔ̃ ŋùdekɛ̃nyɛ fùtù,
la nɔ̀ àhà sɛ̃sɛ̃ nùnu yomè kaka èzã la sĩa.
Ɖo, e la sɔ vɛ̃ sɔ wɔ̀ àwù do.
12Wo ɖùnà gbà nùnà lè èhàjìnu
vòvòvòwo: èkàsãŋùgu, àsihũvi, gàkokoe, àya, àsɔ̀goe, èkpɛ̃, èhɛ, be ègbè ɖèɖe mè.
Vɔ̀, wo mu le nya ènu kè Tɔhonɔ̀ le wɔ̀ ò
eye wo mu le kpɔ ènu kè
yebe àbɔ sɛ̃sɛ̃a le wɔ̀ ò.
13Ekèa ŋuti ye Tɔhonɔ̀ gblɔ̃ be:
“Wo la kplɔ̀ dùkɔ̃ nyèa yì
àmèjronugbe, ɖo mu ji la sè ètonu ò.
Àmè ŋùkutawo la ku àdɔ̀ku
eye èsìkɔ la tì àmèha kaka e la crɔ̃.
14Eye èkuwode be èdowo la kè ènu mè bàa
eye àmè ŋùkutawo kudo àmèhawo
la yì ɖo e mè vlì vlì vlì lè
woabe àzãɖùɖu mà-ɖokɔpea mè.
15Àgbètɔwo kpata ɖo la bɔ̀bɔ̀
woa ɖokoe sìgbè ɖèviwo nène
eye ègòyitɔwo be àdɔ̃ la jè ègũ.
16Àhùadù Tɔhonɔ̀a la ɖè yebe gãnyinyia fiɔ
lè yebe jèna be ànyi ɖoɖo mè.
Àɖèsã Mawu la ɖè yebe kɔ̀kɔ̀ɛnyinyi fiɔ
to àmèwo be bèlele na jɔ̀jɔɛwɔ̀wɔ mè.
17Àlɛ̃wo la sɔ èdù kè gbã fɔtɔa, wɔ̀ ènuɖùpe
eye wo la nyì gbɔgbɔɛ doàmìwo lè funu.
18Bàbà na àmè kèwo
àjèɖàɖa gbà bla ɖo àgɔ̀jèje mèa,
woabe vuɛ̃wo kplɔ̀ wo do
sìgbè àlekè wo dɔ̃nà kèkevia nène.
19Wo gblɔ̃nà be: “Tɔhonɔ̀ ne wɔ̀ ènu kè be gblɔ̃a kaba.
Yebe àlɔ̀ kpɛ̃kpɛ̃a ne ze kaba.
Mi jro la nya yebe ŋusɛ̃a.”
20Bàbà na àmè kèwo gblɔ̃nà be gbegble ye nyi gbegblea.
Wo trɔna èzã vìtìa sɔ wɔ̀nà kɛ̃klɛ̃,
eye kɛ̃klɛ̃ sɔ wɔ̀ vìvìti.
Wo trɔna ènu kè vea, sɔ wɔ̀nà ènu vivi
eye ènuvivia sɔ wɔ̀nà ènuveve.
21Bàbà na àmè kèwo le susu be yèwo ɖo ènunya
eye wo gbà susu be yèwo sènà ènugɔ̃mèa.
22Bàbà na àmè kèwo nùnà àhà
muna kaka kuna ci e mèa,
àmè kèwo cakana àhà sɛ̃sɛ̃wo lekè wo jro a.
23Wo lɔ̃nà èzãnuɖùɖu sɔ ɖènà ègà àgɔ̀jètɔ.
Vɔ̀a, wo gbena kòjo jɔ̀jɔɛ sòso na àmè mà-nyã ɖewo.
24Ekèa ŋuti ye wo la nɔ̀ sìgbè èbèyɔɛ kè èzò le fiɔ̃a nène
àlo ègbe pupu kè èzò be àɖe le fiɔ̃a nène.
Wo la nyìnyɔ̀ so èkè nu ke,
àya la sɔ woabe èsepòpowo
yì sìgbè hũhũ nène.
Ɖo wo trɔ ŋùgbe do àhùadù Tɔhonɔ̀a be ègbè do àsiwo.
Wo crì Mawu Izràɛl be àɖèsã be ènyà.
Tɔhonɔ̀ be àdɔ̀mèze
25Ènu kèa ŋuti ye Tɔhonɔ̀ be jìbi be àdã la sitè ɖo yebe dùkɔ̃a ŋuti.
E kɔ yebe àbɔ sɛ̃sɛ̃a yì ji sɔ pò è.
Ètowo hũhũ eye woabe ŋutilã kukuwo
ci èmɔ̃wo to sìgbè ègbeɖiɖɔɛwo nène.
Vɔ̀a, lè ekèa kpata be ŋùkɔ̀a,
yebe jìbibia nu mu fa ò
eye yebe àbɔ sɛ̃sɛ̃a gbà lè àya mè sɔ gblenu.
26E kɔkɔ dùkɔ̃ lè àzɔ̀ge boa be àplãŋuga yì ji.
E lìɔ àkui yì ànyigbã be nukpòpewo
eye kpɔɖa, dùkɔ̃a ɖèbla va kɛɖɛ kɛɖɛ.
27Lè woa dòmèa, ènu mu tìkɔ̀ na àmè ɖekpe ò,
ɖekpe cã be àfɔ̀ mu ɖɔ̀lì ò.
Àmè ɖe cã mu le dɔ̃ èkɔ̀lɔ̃ɛ̃ ò, woa kpata lè ŋùzɔ̃.
Àmè ɖekpe cã mu tu yebe
ègojiblakà kaka la va ɖè àfɔ̀kpawo ò.
28Woabe àŋùtiwo be nu wɔ̀ piɖoe nyuɛ̃ ɖe
eye woabe àŋùdàtiwo lè ègbèji.
Woabe èsɔ be àfɔ̀kpawo sɛ̃ŋu sìgbè èkpe nène
eye woabe àhùakèkevi be àfɔ̀kuwo le tro
sìgbè àya sɔsɔ kè le troa nène.
29Gbãdãgbãwo le do àpa sìgbè jãŋùta-nɔ nène.
Wo le wo sìgbè jãŋùta viwo nène.
Wo le wɔ̀ sìgbè ègbemèlã
kè le yebe àdè be èlãa nène.
Àmè ɖe mu lè kè la xɔ̀ ɛ̀ lè ènumè na ɛ̀ ò.
30Vɔ̀, le gbèŋuãgbèa,
ègbèɖèɖe ɖe la sitè ɖo dùkɔ̃a ŋuti
sìgbè àpù be ègbèɖèɖe nène.
Ne wo trɔ kpɔ ànyigbã a,
vìvìti kudo gbledo sɔ̃ŋu ye ɖɔ ɛ̀.
Lilikpo yìbɔwo cɔ̃ ŋùkèkè be kɛ̃klɛ̃a.
Mina Bible © Bible Society of Togo, 2014.