Ezayà 56
56
Àkpa ètɔ̃gɔ̃a
(So èta 56 yì èta 66)
Àmè sia àmè ɖo tèpe lè mawuxɔa mè
1Tɔhonɔ̀ gblɔ̃ be:
“Mì wɔ̀ ènu kè jɔ̀ a eye mìa le jɔ̀jɔɛ wɔ̀wɔ ɖo àsi.
Hlùɛ̃gã kè mù hɛ̃ gbãnàa gogo,
eye mì la nya be mù wɔ̀nà ɖo fìãfiã nyèa ji nyàwo.
2Sìtuɖèɖe ye la nyi na àmè kè
lebè na ènu kè mù le gblɔ̃
eye e le wɔ̀ ɖo e jia.
Sìtuɖèɖe ye la nyi na
àmè kè le kpɔ jɛ̃gbɔ̃zãa ji,
gbà na àsà ènu drã ɖekpekpe wɔ̀wɔa.”
3Àmèjro kè sɔ ye ɖokoe
tɛ ɖo Tɔhonɔ̀ ŋutia,
mu gbà yì gblɔ̃ be:
“Tɔhonɔ̀ la ɖè mù jo lè
yebe dùkɔ̃ dòmè kòkòkò ò.”
Kobonɔ̀a mu gbà gblɔ̃ be:
“Àti pupu kpò mù nyi ò.”
4Nyàwo, Tɔhonɔ̀ ŋutɔ ye gblɔ̃ be:
“Kobonɔ̀ ɖewo le kpɔ jɛ̃gbɔ̃zã nyuɛ̃wo ji.
Wo le wɔ̀ ènu kè jɔ̀nàjì na mù a
eye wo le zòɖùɖu nyèa ɖo àsi.
5Mù la na wo tèpe lè mawuxɔ nyèa mè
eye mù la ŋlɔ̀ woabe nyikɔwo ɖo funu.
Nyikɔ kèwo la nɔ̀ ànyi tɛ̀gbɛ̀dò
eye wo la xɔ̀asì wu èvi ŋusù
kudo nyɔ̃nùwo ŋutɔ klua.”
6Àmèjro ɖewo jo woa ɖokoewo na Tɔhonɔ̀.
Wo bɔ̀bɔ̀ woa ɖokoe na ɛ̀, le lɔ̃ ɛ̀
eye wo nyi yebe sumɔ̃viwo.
Tɔhonɔ̀ gblɔ̃ so woa ŋuti be:
“Àmè kèwo kpata le jɛ̃gbɔ̃zãa ɖo àsi
eye wo le kpɔ zòɖùɖu nyèa jia,
7mù la kplɔ̀ woa kpata va èto kɔ̀kɔ̀ɛ nyèa ji.
Mù la do jìjɔɛ na wo lè kuefã-xue nyèa mè.
Mù la xɔ̀ woabe vɔsa kudo
ènu nanawo lè vɔsakpea ji.
Ɛ̃ɛ, wo la yɔ àpe àxuea be
“Dùkɔ̃wo kpata be kuefã-xue.”
8Tɔhonɔ̀ Mawu, kè bɔ̀ Izràɛl
be àmè-siahùawoa, gblɔ̃ be:
“Mù bɔ̀ àmèwo sɔ trɔ do wo gòdò
eye mù la gbà bɔ̀ àmè buwo ke.”
Ŋuti fàfa mu lè na ènu bàɖàwɔ̀tɔ ò
9Mìa ègbemèlã kudo
àvemèlãwo kpata, mì va ɖùnu!
10Izràɛl be kplɔ̀tɔwo kpata nyi ŋùvìnɔ̀wo.
Wo mu le nya ènu ɖekpe ò, wo ci bòlìmè.
Wo le sìgbè àvũ àmumuiwo nène.
Wo mu teŋu gbona cã tètè ò.
Wo vlũna lòmì, la nɔ ku èdrɔ̃.
Àlɔ̃ dɔ̃dɔ̃ jɔ̀nàjì na wo.
11Vɔ̀a, wo gbà lè sìgbè àvũ
kèwo ènuɖùɖu mu sùnà òa nène.
Co, wo nyi dùkɔ̃ nyèa be kplɔ̀tɔwo
gãke wo mu ŋɔnajè ènu mè ò.
Àmè sia àmè le wɔ̀ ènu kè jè ŋùmè na ɛ̀a,
sɔ le ji ye ŋutɔ be àlè ɖèɖe kpò.
12Wo gblɔ̃nà be:
“Mì va ne mia yì kù vɛ̃.
Mi la nù vɛ̃ kaka la sìɔ̃ ɛ̀.
Eye èsɔ̀ la gbà nɔ̀ kpò
sìgbè egbè ke nène:
vɛ̃ la kpɔ̀tɔ̀ sùgbɔ.”
Mina Bible © Bible Society of Togo, 2014.