Ezayà 55
55
Mawu na hlùɛ̃gã be èmɔ̃nu àmè sia àmè
1Kùwui! Mì, àmè kèwo kpata sìkɔ le tìa,
mì va èsìa gbɔ. Mì va, ne mì mu gbà ɖo
ègà la sɔ plè ènu ò cã, mì va kpò.
Mì va plè ènu ne mìa ɖù yàkà, èfɛ̃ ɖekpe màtu.
Mì va jè vɛ̃ ku nyìnɔsi ne mìa nù
àsipuplu, ègà ɖe màna.
2Nukɛ ŋuti ye mì le zã ègà gbogbo ɖe
na ènu ɖùɖu kè mu nyìnà àmè ò?
Nukɛ be àgbàgba gbalo mì le jè
na ènu kè mu ɖɔnapò ò?
Mì ɖoto nyuɛ̃ ɖe, mì ɖoto mù
ne mìa kpɔ ènu nyuɛ̃ ɖù.
Eŋuã, mì la ɖɔ ènu viviwo kpɔ.
3Mì ɖoto ne mìa va gbɔ nyè.
Mì sè ètonu, ne mìa nɔ̀ àgbè.
Mù la wɔ̀ zòɖùɖu ɖe kè la nɔ̀anyi tɛ̀gbɛ̀a kudo mì.
Ɛ̃ɛ, mù la sɔ nyɔna kè mù fìã
na David be hɛ̃nua, na mì.
4Kpɔɖa, mù sɔ ɛ̀ wɔ̀ àpe ŋusɛ̃
be ɖaseɖùtɔ na dùkɔ̃wo,
e la nyi èga na àmèhawo.
5Èwò Izràɛl, wò le yɔ dùkɔ̃ kè wò mu jèsi òa
eye dùkɔ̃ kè wò mu jèsi sã òa,
pu dù va gbɔ wò ɖo Tɔhonɔ̀ ye nyi àpo Mawu.
Ɛ̃ɛ, wo la va, ɖo Izràɛl be àɖèsã
kè do bùbu ŋuti wòa ŋuti.
Tɔhonɔ̀ be ènyàa wɔ̀nà yebe èdɔ
6Mì ji Tɔhonɔ̀ wàlɛbɛ kè e gbà kpɔ̀tɔ̀ lèa.
Mì yɔ ɛ̀ kaka kè e gbà kpɔ̀tɔ̀ gogo mìa.
7Àmè bàɖàwo ɖo la trɔ lè èmɔ̃ vuɛ̃ a ji.
Àmè kè le wɔ̀ ènudrãa,
ne trɔ lè yebe sùsu drãwo yomè.
Wo ne trɔ va Tɔhonɔ̀ miabe Mawu a gbɔ,
ɖo e la ku ŋuzĩzĩ na wo
eye e la sɔ àgɔ̀ kè wo lè gbɔsùsu mè.
8Tɔhonɔ̀ gblɔ̃ be: “Mìabe sùsuwo
mu nyi àpe sùsuwo ò,
eye èmɔ̃ nyèwo mu nyi mìabe èmɔ̃wo ò.
9Sìgbè àlekè jiŋùkusi dìdì lè ànyigbã gbɔa,
nèneake ye èmɔ̃ nyèwo dìdì boo lè mìabe èmɔ̃wo gbɔ
eye àpe sùsuwo cã lè boo lè mìa tɔ̀awo gbɔ.
10Sìgbè àlekè ne èji àlo àhũ jànà so ji hũi,
wuna èsì ànyigbã a eye e nana ènukuwo wɔ̀nà
sɔ jina ènuɖùɖu gbɔ̀xue trɔ yìnà jiŋùkusia,
11nèneake ye àpe ènyà cã lè yeŋu.
Ne e to lè àpe ènu mèa,
e la wɔ̀ yebe èdɔ do àsia
godo gbɔ̀xue la trɔ va.”
12Nyàwo, mì la to
lè jìjɔɛ gã ɖe mè so Babɛ̀l nyigbãa ji
eye wo la kplɔ̀ mì va mìa de
lè ŋuti fàfa mè.
Èto ku ètokɔ̃ɛwo la wo ku jìjɔɛ
eye àgblèji be àtiwo kpata
la pò àsikpe sɔ do jàa na mì.
13Àti na fàfawo ye la mìɔ̃ ɖo àŋɔ̀kawo tèpe
eye flawàti huɛ̃ gbigbliwo la mìɔ̃ ɖo àŋùjatiwo tèpe.
Ekèawo la jɔ̀ sɔ do bùbu Tɔhonɔ̀ ŋuti.
E la nyi ŋùkuɖojinu tɛ̀gbɛ̀.
Mina Bible © Bible Society of Togo, 2014.