Ezayà 4
4
1Gbè ŋua gbèa, nyɔ̃nù adrɛ̃
la kù kpla ŋusù ɖèka gblɔ̃ be:
“Mia ŋutɔ mi la kpɔ
miabe ènuzãzã be ènyàwo gbɔ.
Tɔ̀wòjɔ̀ ɖè ŋùkpɛ̃ na mi
ne wòa sɔ mi wɔ̀ èsrɔ̃ wòwo kpò.”
Tɔhonɔ̀ la cɔ̃ àsi àmè ci àgbèwo ji lè Yèruzàlɛm
2Gbè ŋua gbèa, bùbu kudo gogo ye Tɔhonɔ̀ la na. Àmè ci àgbèwo la kpɔ jìjɔɛ lè Izràɛl eye wo la do bùbu woa ŋuti ɖo ènu kè ànyigbã la na a ŋuti. 3Nène a ye wo la yɔ àmè kèwo la ci àgbè lè Yèruzàlɛm, Ziɔ̀n be àmè kpɔ̀tɛawo be àmè kɔ̀kɔ̀ɛwo. Wo la ŋlɔ̀ woabe nyikɔwo ɖo àgbè xɔma mè lè Yèruzàlɛm ne woa nɔ̀ àgbè kaka sɔyì. 4Wàlɛbɛ kè Tɔhonɔ̀ la lè Ziɔ̀n be nyɔ̃nùwo kpata ɖì eye be la klɔ Yèruzàlɛm be èhũ kè wo kɔ̀ ɖo ànyi to yebe àmè ŋuti kɔ̀kɔ mè ku kòjoɖoɖo jia, 5e la na be Ziɔ̀n be èto kudo èto kèwo bɔ̀ do èa, la kpɔ lilikpo lè ŋùkèkè mè eye lè èzãa, àzìzɔ kudo èzò be àɖe kɛ̃klɛ̃wo la ze. Tɔhonɔ̀ be gogo la cɔ̃ ènuwo keŋu ji. 6E la cɔ̃ wo sìgbè ègòxɔ gãaɖe, sìgbè àmàkpawo be èxɔ̀ gbagba kè la na fàfa lè zòzo sɛ̃sɛ̃ hùenu nène. E la nyi èsìbèpe kudo tabèpe na àmèwo lè àya sɛ̃sɛ̃ kudo èsìjàja be hùenu.
Mina Bible © Bible Society of Togo, 2014.