Ezayà 43
43
1Fifìa Izràɛl, Tɔhonɔ̀ kè ɖo wò
gbà wɔ̀ wòa le pò nupo na wò be:
“Mù gbà vɔ̃ ò, ɖo mù hlùɛ̃ wò plè,
nyikɔ wò ye mù yɔ, tɔ̀ nyè ye wò nyi.
2Ne wò le sò èsì wɔ̀gũa, mù lè kudo wò,
ne wò le to ètɔ̀ sàsrawo jia, wò mu la crɔ̃ ò.
Ne wò le zɔ̃ lè èzò be dòdòmèa, wò mu la fiɔ̃ ò.
Èzò be àɖewo mu la fiɔ̃ wò koɖi koɖi ò.
3Ɖo ènyè Tɔhonɔ̀ ye nyi àpo Mawu,
Izràɛl be àɖèsã ye nyi àpo hlùɛ̃tɔ.
Mù ɖè Ejiptè na ɖo èta wò,
Ètiopìa kudo Sebà, mù sɔ ɖɔ̀lì wò.
4Ɖo wò ɖo àsìxɔ̀xɔ tɔ̀hɛ lè àpe ŋùmè.
Wò ɖo kpɛ̃kpɛ̃ lè gbɔ nyè eye mù lɔ̃ wò,
Ekèa ŋuti mù sɔ àmè sùgbɔ sɔ ɖo tèpe wò,
dùkɔ̃ sùgbɔ sɔ ɖɔ̀lì wò ɖo.
5Mù gbà vɔ̃ ò, ɖo mù lè kudo wò.
Mù la trɔ kplɔ̀ jìjimèvi wòwo
so kaka èwèzɛ̃pe gbɔ̀
eye mù la bɔ̀ wo so èwèɖoxɔ̀pe ke.
6Mù gblɔ̃ na èvègo be “Jo wo kɔ̀ ɖɛ!”
Na àpùgo be “Mù gbà le wo ɖɛ ò!”
Mì trɔ kplɔ̀ èvi nyèwo gbɔ̀
so èdù mà-sɔɛ ŋuawo mè
ne tùgbɛ̀jɛvi nyèwo nɔ gbɔ̀
so ànyigbã be nukpòpewo.
7Mì kplɔ̀ àmè kèwo ŋuti wo yɔ àpe nyikɔ ɖo
eye mù wɔ̀ wo gbà ɖo wo na àpe gogoa.
8Mì ɖè dùkɔ̃ kè ɖo ŋùku co, mu le kpɔ ènu ò;
kè ɖo ètowo vɔ̀, mu le sè ènu òa, to va.”
9Dùkɔ̃wo ne bɔ̀ ɖo èdu ne èdùmètɔwo
kpata ne bɔ̀bɔ̀ nɔ̀ ànyi gòdò.
Àmè kɛ lè woa dòmè teŋu gblɔ̃ ènu kè la jɔ̀ a ò?
Àmè kɛ la teŋu gblɔ̃ ènu kè jɔ̀ va yì ò?
Eŋuã, wo ne sɔ woabe ɖaseɖùtɔwo va fiɔ,
kèwo la ɖo èkpe e ji be woabe ènyà jɔ̀.
Wo ne ɖoto wo eye woa gblɔ̃
ku èjìɖèɖe be “Nyàwo ye!”
10Tɔhonɔ̀ gblɔ̃ be: “Mìawo ye
nyi àpe sumɔ̃vi kè mù cã a,
ne to xɔ̀se ɖoɖo ɖo ji nyèa,
mìa gbà sè e mè be ènyè
ɖèka kpò ye nyi Mawu.
Mawu bu ɖekpe mu jè ŋùkɔ̀
na mù kaka èbu la jè yo nyè mè ò.
11Ènyè ɖèka pɛɛ kpò ye nyi Tɔhonɔ̀.
To vò lè ŋuti nyèa, hlùɛ̃tɔ ɖe mu lè ò.
12Ènyè ye hɛ̃ hlùɛ̃gã va.
Mù ɖè yebe ègbèfã eye mù ɖè e fiɔ.
Ènyè ye wo la kpɔ lè mìa gbɔ,
mu nyi vòdu buwo ò.”
Tɔhonɔ̀ gbà gblɔ̃ ke be:
“Mì nyi àpe ɖàseɖùtɔwo
eye mù nyi Mawu.
13Ɛ̃ɛ, nène mù lè so tɛ̀gbɛ̀dò:
'Àmè ɖekpe mu la teŋu xɔ̀ ènu kè mù lè ɖo àsi ò.
Àmè ɖekpe mu lè la gble ènu kè mù wɔ̀a cã ò'.”
14Izràɛl be àɖèsã, mìabe xɔ̀namètɔa gblɔ̃ be:
“Mìawo ŋuti ye mù ɖo àhùakɔ̃ ɖoɖa Babɛ̀l.
Mù la na woabe èdùgbowo la fo
eye mù la kplɔ̀ àmè kèwo si àhùa kpata gbɔ̀,
ɛ̃ɛ Kaldeatɔwo la do jìjɔɛ be àpa lelele lè àpùjihũwo mè.
15Mù nyi Tɔhonɔ̀, mìabe àɖèsã,
Izràɛl be ɖotɔ, mìabe èfìɔa.”
16Nène a ye Tɔhonɔ̀ gblɔ̃,
e ye kè ɖè èmɔ̃ to àpù be dòdòmè,
e ɖè àfɔ̀mɔ to èsì gbɛ̀lua be dòdòmè ke.
17E ye na àhùakèkeviwo kudo èsɔwo,
àhùakɔ̃ kudo àhùawɔ̀nu gbogbowo
sɔ̀gbè, na àhùawɔ̀wɔ.
Ha ɖèka, e mù wo pu ànyi
gblò ne wo mu gbà fɔ̃ gbèɖe ò.
E ci wo sìgbè kãligbɛ̃ be èkà nène.
18Tɔhonɔ̀ gblɔ̃ be: “Mì mu gbà ɖo ŋùku
ènu kèwo jɔ̀ va yìa ji ke ò,
mì ŋlɔ̀be ènu xoxoawo.
19Ɛ̃ɛ, mù la wɔ̀ ènu yeye ɖe,
ènu ɖe kè jè egɔ̃mè vɔ̀.
Mì mu le kpɔ ɛ̀ hàɖe òa?
Mù la ɖè èmɔ̃ yeye ɖe to zògbè ji.
Mù la na ètɔ̀wo la srà lè èkònɔ̀-nyigbã ŋua ji.
20Ègbemèlãwo, ègbevũ kudo
tatabòliwo la na mù gogo,
ɖo mù na èsì, ètɔ̀ srà lè
ànyigbã màsɛ̃ku nyuɛ̃a ji.
Ɛ̃ɛ, mù la na èsì dùkɔ̃ nyè kè mù cã a.
21Dùkɔ̃ kè mù wɔ̀ na ɖokoe nyè
ne bèa nɔ jì kafu-hawo na mù a.
Mawu hɛ̃ ènyà ɖo yebe dùkɔ̃a ŋuti
22Tɔhonɔ̀ gblɔ̃ be: “Yakɔb,
ào, mu nyi ènyè ye wò fãyɔ ò,
ɖo àpe ènu tìkɔ̀ na wò, Izràɛl.
23Co wò mu hɛ̃ àlɛ̃wo va na mù
lè vɔsa fiɔ̃fiɔ̃ wɔ̀wɔ mè ò.
Wò mu na mù gogo lè vɔsa kèawo mè ò.
Vɔ̀ nyè mu sɔ wò wɔ̀ kluvi, le biɔ wò ènu nana ò.
Eye nyè mu ɖè èfũ na wò lè èzò tɔ lifi wɔ̀wɔ mè ò.
24Wò mu zã àpo èci sɔ plè
àmì huɛ̃huɛ̃ na mù ò.
Wò mu na mù vɔsa-lãwo
be àmì kaka e tìkɔ̀ na mù ò.
Vɔ̀ àpo àgɔ̀jèjewo sɔ mù wɔ̀ èkluvi.
Àpo èvuɛ̃wo na ènu tìkɔ̀ na mù.
25Co ènyè ye le sɔ àpo àgɔ̀jèjewo
kè wò sìgbè àlekè mù jro a nène.
Eye nyè mu la gbà le wo ɖo sùsu mè ò.
26Ɖoŋùku ènyà kè wò sɔ ɖo ŋuti
nyèa ji na mù ne mia yì kòjo mè.
Wò ŋutɔ gblɔ̃ ènyàa,
ne bèa ɖè àpo ènyà jɔ̀jɔɛa fiɔ.
27Xoxoa, tɔgbe wòa jè ànyi,
eye àpo ènyà xɔ̀gblɔ̃tɔwo
cã sitè ɖo ŋuti nyè.
28Ekèa ye wɔ̀ be mù ɖìgbɔ àpo
àgbònùglawo, xɔ̀ woabe àcɛ̀wo.
Mù ɖè Yakɔb be àxuedo a do àsi,
eye mù ɖè Izràɛl do àsi
na kɛ̃tɔwo be woa dovlo è.
Mina Bible © Bible Society of Togo, 2014.