Ezayà 42
42
Tɔhonɔ̀ ɖè yebe sumɔ̃via fiɔ (Èhàlo 1)
1Kpɔɖa, àpe sumɔ̃vi kè
mù le ɖotèa ye nyi ekèa.
E ye mù cã lè jìjɔɛ mè.
Mù sɔ gbɔ̃gbɔ̃ nyèa dà ɖo e ji.
E la kplɔ̀ dùkɔ̃wo lè jìjɔɛ mè.
2Mu la do àpa ò, eye mu la kɔ ègbè yì ji cã ò.
Mu la na wo la sè yebe ègbè lè èmɔ̃ to cã ò.
3Mu la ŋɛ̃ àplati kè xaa ò
eye mu la ci kãligbɛ̃ be èkà kè le tù àzìzɔa ò.
Tutu ye e la na kòjoɖoɖo, la sò àxue.
4Mu la gbɔjɔ àlo la va trɔ lè ènu ɖe yomè
kaka ye jɔ̀jɔɛ la sò àxue ɖo ànyigbã ji ò.
Eye ètɔ̀dòmèkɔ̃ɛ̃wo la nɔ̀tè kpɔ yebe èseawo.
5Tɔhonɔ̀ Mawu ɖo jiŋùkusi eye e vlũ ì.
E wɔ̀ ànyigbã gbàjà kudo èkusɛ̃sɛ̃ kèwo kpata lè e jia.
E na àgbè dùkɔ̃ kèwo kpata lè e jia.
E gbɔ̃nà ɖo ènu sia ènu kè lè e jia mè.
E gblɔ̃ na yebe sumɔ̃via be:
6“Ènyè Tɔhonɔ̀ ye yɔ wò lè ɖoɖo nyuɛ̃tɔ̀a mè.
Mù la le àpo àlɔ̀tinu, ènyè ye wɔ̀ wò.
Mù la to ji wò sɔ ɖùzò kudo dùkɔ̃a.
Wò nyi dùkɔ̃wo be kɔ̀kɔ̀ɛ lè ànyigbã ji.
7Wò la hũ ŋùkuviwo na ŋùkugbãgbãnɔ̀wo.
Wò la ɖè ègà àmè kèwo lè vìvìti mèa, to lè gàmè.
8Ènyè ye nyi Tɔhonɔ̀ kè wo yɔna.
Nyè mu la sɔ gogo nyè na àmè bu ò,
eye nyè mu la na kàfù kafu nyèa
la yì vòdu be àtikpàkpawo gbɔ ò.
9Kpɔɖa, ènyà cucugbãtɔ̀wo va e mè vɔ̀
eye mù le ɖè ègbèfã yeye
buwo gbɔ̀xue wo la va jɔ̀.
Mù na ne mìa sè wo.”
Kàfù kafu be èhà na Tɔhonɔ̀
10Mì jì èhà yeye na Tɔhonɔ̀.
Mì jì kafu-ha na ɛ̀
so kaka ànyigbã be nukpòpewo,
mì àmè kèwo le to àpù be èsì gã jia
kudo ènu kèwo lè ètɔ̀dòmèkɔ̃ɛ̃wo jia.
11Ne zògbè kudo yebe èdùwo
ne kɔ ègbè yì ji, Kedàr be kɔpewo,
àmè kèwo sò àxue ɖo àkpã mèa,
mì do jìjɔɛ be àpa.
Mì sò àyo ku àbòbo lelele so ètowo ji.
12Wo ne na gogo Tɔhonɔ̀,
wo ne ɖè yebe kàfu-ha fiɔ
lè ètɔ̀dòmèkɔ̃ɛ̃wo ji.
13Tɔhonɔ̀ la to va sìgbè kãlìsu nène.
Yebe lɔ̃lɔ̃ be nuhuã na e sitè
sìgbè àhùawɔ̀tɔ gã nène.
E do àhùapa sɛ̃sɛ̃, eye e kpe àkɔ ku
yebe kɛ̃tɔwo sìgbè kãlìsu nène.
Tɔhonɔ̀ bɔ̀nu kpoo le kpɔ ènu
14So kaka gà ɖe mè ye
mù bɔ̀ ènu kpoo le kpɔ ènu,
nyè mu le gblɔ̃ ènyà ɖekpe ò,
mù le ɖokoe nyè.
Fifìa mù la do àpa.
Mù le ŋɛ̃ sìgbè nyɔ̃nù kè le le èkua nène,
eye gbɔ̃gbɔ̃ cipò na mù, ènu tìkɔ̀ na mù.
15Mù la gùdù èto kudo ètokɔ̃ɛwo
gbàkudo ègbe do àmà kèwo lè woa jia.
Mù la na wo la pu yùkpà.
Mù la na èsì la pu lè tãkuwo mè
eye ètɔ̀wo la pu, trɔ zũ ànyigbã pupui ɖèɖe.
16Mù la kplɔ̀ ŋùvìnɔ̀wo to èmɔ̃ kè wo mu nya òa ji.
Mù la na wo la zɔ̃ to èmɔ̃ kè ji wo mu to kpɔ òa, ji.
Mù la trɔ vìvìti cicri sɔ wɔ̀ kɛ̃klɛ̃ lè ŋùkɔ̀ na wo.
Eye mù la jɔ̀ èmɔ̃ gɔ̃glɔ̃wo na wo.
Ènu kèawo ye mù la wɔ̀ eye nyè mu la gble èɖe ɖɛ ò.
17Àmè kèwo le kã ɖo vòduwo jia,
gblɔ̃ na woabe legbawo be
“Mìawo ye nyi miabe mawuwo”.
Àmè kèawo la yì ŋùgbe
eye wo la ɖù ŋùkpɛ̃.
Dùkɔ̃ kè èkɔ̀ lìa na a: Hlùɛ̃gã be àjɔ̀gbè fìãfiã
18Mìa ètokunɔ̀wo, mì ɖoto;
mìa ŋùvìnɔ̀wo, mì ɖèkɔ̀ kpɔ.
19Àmè kè èto ku na, àlo
ŋùku gbã na a, nyi àpe sumɔ̃vi.
Ɛ̃ɛ, àmè kɛ èto ku na, àlo
ŋùku gbã na sìgbè dùkɔ̃ nyèa nène ò?
20Wò kpɔ ènu fuu be dò vɔ̀,
wò mu mɔ̀nu jè ɖekpe ŋuti ò.
Wò kènà èto co, wo mu sènà ènu ɖekpe ò.
21To yebe ènyà mè sòso jɔ̀jɔɛa mè ye
Tɔhonɔ̀ jro la ɖè zè nène ye
yebe èsea lòlò gbà nyɔ ɖoa fiɔ.
22Vɔ̀ mì nyi dùkɔ̃ kè be ènuwo ye wo hlà eye wo lɔ joa.
Wo yì wla wo ɖo àxuewo mè, lè gàkpawo mè keŋu.
Wo ɖè wo do àsi, ne àmè ɖe mu gbà xɔ̀ na wo ò.
Nène a ye àmè ɖekpe mu gblɔ̃ be:
“Mì jo wo ɖɛ ò!”
23Àmè kɛ ye lè mìa dòmè le ŋùku ɖo ènu kèa ŋuti ò?
Àmè kɛ la sè ò? Àmè kɛ teŋu sè e mè fifì ò?
24Àmè kɛ ye ɖè Izràɛl,
Yakɔb be èdùa do àsi na àmè kèwo
hlà yebe ènuwo gbà lɔ wo yì ò?
Tɔhonɔ̀ Mawu kè ji mi jè àgɔ̀ lèa ye!
Mi gbe yebe èmɔ̃ ji toto
eye mi ɖèkɔ̀ lè yebe èsea ŋuti.
25Eye Tɔhonɔ̀ ɖùɖù yebe àdɔ̀mèzea be àdã
kudo àhùa be èhlɔ̃dãnuwo ɖo e ji.
E na èzò le bì ènu trɔ do wo gòdò,
vɔ̀, dùkɔ̃a mu sè ènu ɖekpe gɔ̃mè ò.
Èzò fiɔ̃ wo koɖi koɖi co,
wo mu sɔ ɛ̀ veveɖe ò.
Mina Bible © Bible Society of Togo, 2014.