Ezayà 44
44
1Vɔ̀ fifìa, ɖoto Yakɔb be àxuedo, àpe sumɔ̃vi,
Izràɛl dùkɔ̃ kè mù cã a.
2Nène a ye Tɔhonɔ̀ kè wɔ̀ wò,
kè wò lè ènɔ̀ wò be àdɔ̀mè
eye e le do wò àlɔ̀a, gblɔ̃ be:
Mù gbà vɔ̃ ò, sumɔ̃vi nyè Yakɔb,
èwò kè si mù xɔ̀ àmè fùflu lèa, ye mù cã.
3Ɖo nyàwo, mù la ɖùɖù èsì kɔ̀ ɖo
ànyigbã kè mu gbà nù èsì kpɔ òa ji,
èsì sàsra ɖo ànyigbã pupuia ji.
Mù la ɖùɖù àpe Gbɔ̃gbɔ̃ ɖo jìjimè wòa ji,
sìtu ɖo àpo tɔgbe-tɔ̀gbè yɔviwo ji.
4Wo la mìɔ̃ vɔ̀vlɔ̀ sìgbè ègbe nène,
sìgbè àti kèwo mìɔ̃ ɖo ètɔ̀ toa nène.
5Ɖèka la gblɔ̃ be: “Tɔhonɔ̀ tɔ̀ wò ye mù nyi”.
Èvègɔ̃a la gblɔ̃ be: “Yakɔb be xòmètɔ ye mù nyi”.
Àmè bu la ŋlɔ̀ ɖo yebe àbɔ ŋuti be: “Mù nyi Tɔhonɔ̀ tɔ̀”
eye e la gblɔ̃ be woa yɔ yè be “Izràɛl.”
Mawu bu mu gbà lè tovò na Tɔhonɔ̀ ò
6Tɔhonɔ̀, Izràɛl be èfìɔ ŋusɛ̃kpatatɔ
kè xɔ̀ ɛ̀ plèa, gblɔ̃ be:
“Mù nyi gɔ̃mèjèje kudo vɔ̀vɔnua.
Tovò lè ŋuti nyèa, Mawu ɖekpe mu gbà lè ò.
7Àmè kɛ ye lè sìgbè ènyè nène ò?
Ne kè ènu, ne bèa ɖè ègbè
eye bèa ɖè ènyà gɔ̃mè na mù.
Ne gblɔ̃ ènyà kèwo jɔ̀ so
kaka àgbètɔxòmè be jɔ̀jɔmè,
ɛ̃ɛ ne gblɔ̃ ènu kèwo la ɖɛ vaa, na mù.
8Mì mu gbà hũhũ ò dùkɔ̃ nyè,
mì mu gbà vɔ̃ ò.
Mù gblɔ̃ ɛ̀ na mì xoxo jè ŋùkɔ̀,
mù ɖè è fiɔ mì sã.
Mì nyi àpe ɖaseɖùtɔwo.
Mawu ɖe lè tovò lè ŋuti nyèa?
Gbèɖe, àkpã sɛ̃sɛ̃ ɖekpe
mu gbà lè to ŋuti nyè ò.”
9Àmè kèwo jɔ̀nà vòduwo be
èbocɔɛviwo mu nyi ènu ɖekpe ò.
Woabe àtikpàkpawo mu ɖo àsì xɔ̀xɔ ɖe ò.
Eye wo nyi woa ŋutɔ be ɖaseɖùtɔ
kèwo mu le kpɔ ènu ɖekpe ò.
Àtikpàkpa kèawo nyi woabe ŋùkpɛ̃nu,
wo mu nya ènu ɖekpe ò.
10Woa jɔ̀ vòdu, woa wɔ̀ àtikpàkpa
kèwo mu ɖè àlè ɖe òa,
nyi sùkunɔ̀-dɔ wɔ̀wɔ.
11Kpɔɖa woabe hũsìviwo kpata ɖɔ kudo ŋùkpɛ̃.
Eye àgbètɔwo ye lina vòduwo kudo èbocɔɛawo.
Wo ne bɔ̀ wo eye woa kpata be àfɔ̀wo ne sɔ̀gbè!
Vɔ̃vɔ̃ la jè woa ji eye èŋù la kpɛ̃ wo ŋutɔ.
12Èzò-gbɛ̀dɛ kè sò ègà yìbɔ,
ɖo èzò mè kaka be bìa hɛ̀a,
la do hãmà na ɛ̀.
Yebe àbɔ be ŋusɛ̃ ye e la sɔ do hãmà na ɛ̀
sɔ na ɛ̀ nɔ̀nɔmè kè jro èa.
Vɔ̀ ne àdɔ̀ le wù ìa,
ŋusɛ̃ ŋua mu la gbà nɔ̀ e si ò.
Ne mu nù èsì òa, e la gbɔjɔ.
13Àtikpàtɔ la jije yebe àtia kudo jijeka
eye e la tè èflì ɖo e ŋuti sɔ na ɛ̀ jèsìdo
na ènu kè e le ji la taa,
eye e la ɖè èpɛ ɖo àtia ji na yebe kpàkpa.
E lìnà ɛ̀ gbà plɔna e ŋuti ne bèa zìɔ̃.
Àtikpàtɔa kpànà àtia ɖo àgbètɔ be nɔ̀nɔmè nu,
e gbà nana ɛ̀ ŋusù be jɔ̀jɔmè
ne bèa kpɔ nɔ̀pe lè mawuxɔa mè.
14Wo na wo sò sedàtiwo.
Eye wo ɖè èjèti sɛ̃sɛ̃wo ɖovò.
Wo ji àti gãgãwo be èmɔ̃ ne woa trì kpe è,
vɔ̀ èjisi jàja ye nana be sĩnà.
15Àti ye nana ànakè kè wo sɔ dona èzòa.
Àmè ɖewo zãna ɛ̀ sɔ ɖona èsì zòzo.
Wo sɔ dona èzò kè ji wo ɖànà ènu lèa.
Wo gbà sɔna ɛ̀, kpànà vòdu
àlo èbocɔɛ kèwo wo sumɔnaa.
Wo sɔ jɔ̀nà àtikpàkpa kè wo yì jènà èɖɛ̀ na a.
16Wo sɔna àtia be àkpa ɖèka sɔ dona èzò.
Wo la sɔ mè èlã eye wo la tɛ èkplɔ̃ sɔ ɖùnu, ɖɔpò.
Wo gbà sɔna ɛ̀ dona èzò ɖo xɔ̀mè sɔ lena zòzo, gblɔ̃nà be:
“Àti kèa nyɔ ŋutɔ, e bìnà nyuɛ̃ ɖe!”
17Àtia be àkpa èvègɔ̃a ye wo sɔ wɔ̀nà vòdu, àtikpàkpa.
Eye wo jènà èklò ɖo ŋùkɔ̀ na ɛ̀ sɔ sumɔ na ɛ̀.
Wo fãnàkue na ɛ̀ gblɔ̃ be:
“Èwò ye nyi Mawu nyè, hlùɛ̃ mù gã!”
18Àmè kèawo mu nya ènu ɖekpe ò
eye wo mu sè ènu ɖekpe gɔ̃mè ò
Nyàwoa, woabe ŋùkuviwo ji cɔ̃
kaka wo mu le kpɔ ènu ò;
woabe sùsuwo titɔ ne
woa teŋu ŋɔjè ènuwo mè.
19Àmè ɖekpe mu bù èta mè
sɔ do è jèsìdo kaka la sè e gɔ̃mè
ne bèa teŋu kè ènu gblɔ̃ be:
“Mù sɔ àtia be àkpa ɖèka do èzò,
mù ɖà ènu kudo yebe àkawo
eye mù mè èlã cã, sɔ ɖù.
Àkpa èvègɔ̃a, ènu gbegble mù la sɔ wɔ̀a?
Mù la jè èɖɛ̀ na àti kè wo kpàa?”
20Ào, àmè kèawo le tɛ ɖo
ènu kè nyi àfi ɖèɖe kpòa ŋuti.
Wo blènà woa ɖokoe
eye wo ɖènà sùsu bàɖàwo.
Wo mu la teŋu hlùɛ̃ woabe àgbè gã ò.
Ɖekpe mu lè kè la gblɔ̃ be:
“Ènu kè lè àlɔ̀ mè na mù a, nyi vòdu
àmè flùnu gbalo ye!”
21Yakɔb be àxuedo, ɖo ŋùku ekèa ji;
Izràɛl, wò nyi àpe sumɔ̃vi.
Mù wɔ̀ wò ne wòa nɔ sumɔ mù.
Izràɛl dùkɔ̃, nyè mu la ŋlɔ̀be wò kpɔ ò.
22Mù tutu àpo àglajèjewo jo sìgbè lilikpo nène,
àpo àgɔ̀jèjewo jo sìgbè lilikpo ɣewo nène.
Trɔ gbɔ̀ va gbɔ nyè, ɖo mù xɔ̀ wò plè.
23Mì do jìjɔɛ be àpa lelele,
jiŋùkusiwo, ɖo Tɔhonɔ̀ lè yebe èdɔ ji.
Mìa ànyigbã ji be ègũwo, mì ɖè ègbè.
Mìa ètowo kudo àve mè be àtisuwo kpata,
mì do jìjɔɛ be àpa,
ɖo Tɔhonɔ̀ hlùɛ̃ yebe dùkɔ̃a.
E ɖè yebe gogoa fiɔ lè Izràɛl.
Mawu ɖè èfìɔ Sìrus fiɔ: Dùkɔ̃wo kpata la sɛ̃ Tɔhonɔ̀
24Tɔhonɔ̀ nyi àpo hlùɛ̃tɔ, Izràɛl.
E ye wɔ̀ wò so kaka ènɔ̀ wò be àdɔ̀ mè ke.
E gblɔ̃ be: “Mù nyi Tɔhonɔ̀.
Ènyè ye wɔ̀ ènu kèwo kpata lèa.
Ènyè ɖèka pɛɛ ye vlũ jiŋùkusi,
mù kèkè ànyigbã àlɔ̀do ɖe mà xɔ̀ so àgbètɔ gbɔ.
25Fifìa, mù xɔ̀ ŋusɛ̃ lè èsɔ̀mèkpɔtɔwo be ènyà si.
Mù na ènukãtɔwo le gblɔ̃ ènyà mà-ɖotawo.
Mù miɔ̃ ènu na ènunyatɔwo
eye mù ɖèfiɔ be woabe ènunya nyi ènu gbalo.
26Sumɔvi nyèwo be èdɔ kpò mù le wɔ̀
eye mù na àmèdɔ̃dɔ̃ nyèwo
be àŋɛ̀wo le kpɔ e mè vava.
Mù gblɔ̃ so Yèruzàlɛm be:
“Àmèwo la gbà trɔ va sò nɔ̀pe ɖo funua,
wo la trɔ tù yebe èglìwo.”
Mù gblɔ̃ so Yudà be èdùwo ŋuti be:
“Wo la trɔ tù wo!”
27Mù ɖè ègbè na àpù wɔ̀ ègũa be:
“Pu kpakpla, ne ètɔ̀ sàsra ɖekpe
mu gbà va ɖo èwò mè ke ò.”
28Mù gblɔ̃ so Sìrus ŋuti be:
“E nyi dùkɔ̃ nyèa be àlɛ̃kplɔ̀tɔ.
E la na ènu kèwo mù jro a
kpata la kpɔ e mè vava.
E la na ègbè be woa trɔtù Yèruzàlɛm,
ne woa gbìgbɔ̀ trɔtù mawuxɔa.”
Mina Bible © Bible Society of Togo, 2014.