Ezayà 41
41
Mawu le do ŋusɛ̃ yebe dùkɔ̃a
1Mìa ètɔ̀dòmèkɔ̃ɛ̃wo,
mì bɔ̀ ènu kpoo lè àpe ŋùkɔ̀
ne ŋusɛ̃ yeye ne gɛ̃ jè dùkɔ̃wo dòmè.
Eye wo ne dɔ̃ va ne woa pò nupo.
Mì na mia yì kòjo mè ne mia kpɔ.
2Àmè kɛ na ye kòjoɖotɔ sitè lè èwèzɛ̃pe ò?
E le do àfɔ̀ yebe àfɔ̀dowo mè, le ɖù dùkɔ̃wo ji,
e le na èfìɔwo le jè ànyi lè ŋùkɔ̀ na ɛ̀.
Yebe èwuia le flì àmèwo sìgbè hũhũ nène,
yebe àŋùtia le nyà wo do ègbe sìgbè
àya kè kplɔ̀ èbè yìnàa nène.
3Àmè kèa ɖè wo ɖo ènu,
nyà wo àfɔsi-àfɔsi
kè mu ɖo àfɔ̀ ànyigbã ŋutɔ cã ò.
4Àmè kɛ ye ɖo e eye e gbà wɔ̀ ekèa ò?
Àmè kè ɖo ènuwo so gɔ̃mè jèjea ye.
Ènyè Tɔhonɔ̀ ye. Mù nyi cucugbã
eye mù gbà lè kòɖòo.
Ènyè ye nyi Tɔhonɔ̀.
5Ètɔ̀dòmèkɔ̃ɛwo kpɔ ɛ̀ eye wo tɔ vɔ̃vɔ̃,
ànyigbã be nukpòpe kèwo
le ŋùku ɖo e ŋutia,
tètè gogo, è le hũhũ tìtìtì.
6Àmè sia àmè le do àlɔ̀ nɔ̀via le gblɔ̃ be:
“Likè goŋu!”
7Àtikpàtɔ le do ŋusɛ̃ gosìmitì.
Àlɔ̀nudɔwɔ̀tɔ kè do ègà èzò mè le pò è kpàbàa,
le do ŋusɛ̃ èzògbɛ̀dɛ.
E le gblɔ̃ so e ŋuti be: “E nyɔ!”
Eye kudo àɖàŋù wo jɔ̀ àtikpàkpaa
sɔ plɛ̃gò sɔ le è ɖotè.
8Vɔ̀ èwò, Izràɛl àpe sumɔ̃vi,
èwò ye nyi dùkɔ̃ kè mù cã a, Yakɔb,
wò nyi xlɔ̃ nyè be jìjimèvi.
9Èwò kè mù le so kaka ànyigbã be nukpòpewoa,
èwò kè mù yɔ so yebe lipòwo nu kea,
èwò kè mù gblɔ̃ na be: “Wò nyi sumɔ̃vi nyèa,
mù cã wò eye nyè mu gbe wò ò”.
10Mù gbà vɔ̃ ò, ɖo mù lè ku wò.
Mù gbà ci jojojoe ò, ɖo mù nyi àpo Mawu.
Mù le do wò ŋusɛ̃, ɛ̃ɛ mù kpe ɖo ŋuti wò
eye mù hlùɛ̃ wò ku àpe àbɔ sɛ̃ŋu kè nana jiɖùɖua.
11Àmè kèwo le do àdɔ̀mèze ɖo ŋuti wòa,
la ɖù ŋùkpɛ̃. Àmè kèwo le wɔ̀ àjrè
kudo wòa, la crɔ̃ eye wo la ku.
12Wò la ji àmè kèwo le wɔ̀ àvũ kudo wòa,
vɔ̀ wò mu la kpɔ wo ò.
Àmè kèwo sɔ àhùa ɖo ŋuti wòa,
la crɔ̃ vɔ̀ keŋu-keŋu.
13Ɖo ènyè Tɔhonɔ̀ ye nyi àpo Mawu.
Mù le àpo ɖùsi-lɔa
eye mù le gblɔ̃ na wò be:
“Mù gbà vɔ̃ ò, mù la do wò àlɔ̀.”
14Mù gbà vɔ̃ ò, Yakɔb be dùkɔ̃, àvlɔkui,
èwò Izràɛl be àmè gbɔjɔ kè kpɔ̀tɔ̀a.
Tɔhonɔ̀ gblɔ̃ be: Ènyè ye la do wò àlɔ̀,
Izràɛl be àɖèsã ye hlùɛ̃ wò gã.
15Mù la trɔ wò sɔ wɔ̀ dɔwɔ̀nu yeye,
èkpogbãnu kè ŋuti àɖuwo la nɔ̀.
Wò la gbã ètowo, la tùkù wo.
Wò la trɔ wo ku èkpowo wɔ̀ èkɔ gbalo.
16Wò la fu wo eye àya la kplɔ̀ wo yì.
Àya kè sɔa, la kãkã wo pòxla.
Vɔ̀ wò ya, wò la do jìjɔɛ be àpa ɖo Tɔhonɔ̀ ŋuti.
Wò la kpɔ jìjɔɛ ɖo Izràɛl be àɖèsãa ŋuti.
Zògbè la trɔ zũ ànyigbã nyuɛ̃
17Ènuwɔ̀donɔ̀wo kudo wɔ̀amènɔ̀wo
le ji èsì eye wo mu kpɔ ò.
Sìkɔ le tì woabe àɖewo.
Ènyè Izràɛl be Mawu a, mù la tɔ̀ na wo
eye nyè mu la ɖèkɔ̀ lè woa ŋuti kpɔ ò.
18Mù la na èsì la srà lè èto mà-ɖo àtiwo ji,
èsì la nɔ̀ bàlìwo mè.
Mù la trɔ zògbè sɔ wɔ̀ tɔ̀gba,
eye ànyigbã pupuia la trɔ èsìdo.
19Mù la do àti vòvòvòwo ɖo zògbè ji,
wuwlui kudo gãgãwo#41.19 sedàti, àtiɣe kudo àmìti.
Lè ànyigbã kè mè èsì mu lè òa,
mù la do àti hamè-hamè ɖo funu#41.19 àtisu kudo flawàtiwo ɖodu.
20Ne àmèwo kpɔa,
woa nya be Tɔhonɔ̀ ye wɔ̀ ènu kèawo,
be Izràɛl be àɖèsãa ye ɖo wo.
Wo la le ŋùku ɖo e ŋuti sɔ sè e gɔ̃mè.
Àjè mawuwo mu ɖo ŋusɛ̃ ɖe ò
21Tɔhonɔ̀, Yakɔb be èfìɔa gblɔ̃ be
mìa dùkɔ̃ buwo be mawuwo
mì va gblɔ̃ mìabe ènyàa,
mì va ɖù mìabe ɖàsea.
22Mì dɔ̃ va ne mìa va gblɔ̃
ènu kè la va jɔ̀ a.
Leke ènua jɔ̀ va yì ò?
Mì gblɔ̃ ɛ̀ na mi ne mia bù e ŋuti kpɔ.
Àlo mì kã èsɔ̀ kè gbãnàa be àseŋu na mi
ne mia nya ènu kè la va jɔ̀ a.
23Ɛ̃ɛ, mì gblɔ̃ ènu kè la ɖɛ vaa na mi.
Eŋuã mi la nya be mì nyi mawuwo.
Yɔ! Mì wɔ̀ ènu nyuɛ̃ àlo ènu bàɖà kudo mi,
mì wɔ̀ ènu ɖe jro! Nène a mi la kpɔ ɛ̀
eye mi la na mì bùbu tɔ̀hɛ.
24Vɔ̀a, mì mu nyi ènu ɖekpe ò.
Ènu kè mì nyia, mu ɖo àsì xòmè ɖekpe ò.
Àmè kè cã mìa nyɔŋu na mi.
25Mù na àmè ɖe to so èvègo gbãnà,
eye e va ɖo;
e sè wo yɔ yebe nyikɔ so kaka èwèzɛ̃pe ke;
e la fãnyà ŋùkɔ̀nɔ̀tɔwo sìgbè lekè wo fãnyànà bàbaa nène,
sìgbè lekè èzemètɔ fãnyànà bàba kudo yebe àfɔ̀wo nène.
26Àmè kɛ ɖè ènyà kèa gblɔ̃ sãa so gɔ̃mèjèje, ne mia nya ɛ̀ ò?
Àmè kɛ ye sìa mi ɖɛ sãa, ne mia gblɔ̃ be: “Nyàwo ye ò?”
Gbèɖe, àmè ɖekpe mu gblɔ̃ ɛ̀ sã ò, àmè ɖekpe mu kè ènu ò,
àmè ɖe mu sè ènyà ɖekpe so mìa nu ò.
27Ènyè Tɔhonɔ̀ ye gblɔ̃ jè ŋùkɔ̀ lè Yèruzàlɛm.
Nyàwo, mù dɔ̃ àmèdɔ̃dɔ̃ ɖoɖa Ziɔ̀n
ne bèa sɔ àŋɛ̀ nyuɛ̃ ɖe yì.
28Mù ɖè ŋùku eye kpɔɖa
àmè ɖèka tètè mu lè ò,
lè woa dòmèa ètopòɖotɔ ɖèka mu lè ò.
Mu nyi nène òa, mù kè biɔ wo
ne woa ɖè àɖàŋù na mù.
29Wo mu nyi ènu ɖekpe ò,
wo mu le wɔ̀ ènu ɖekpe ò.
Woabe èkpe tatawo nyi ènu gbalo, àya ɖèɖe.
Mina Bible © Bible Society of Togo, 2014.