Ezayà 3
3
Tìtɔ̀titɔ gã ɖe gɛ̃ ɖo Yèruzàlɛm
1Tɔhonɔ̀ Mawu Ŋusɛ̃kpatatɔ
la ɖè nuɖùɖu kudo èsì be èmɔ̃nuwo
kpata jo lè Yèruzàlɛm ku Yudà be fìɔdua mè.
E la tu àlɔ̀dowo kpata be èmɔ̃nu na wo:
2Ŋusùtia ku gbãdãgbã,
kòjoɖotɔ ku gblɔ̃ɖɛtɔ,
ènukãtɔ ku àmèsĩsĩa;
3àhùaga ku àgbònùgla,
ètopòɖotɔ ku kpajijewɔ̀tɔ, kudo àzetɔ.
4Tɔhonɔ̀ gblɔ̃ be: “Mù la sɔ
ɖèvi vifɛ̃wo ɖo èga ɖo woa nu
ne woa kplɔ̀ wo kudo woabe àyè gɛdɛwo.”
5Àmèwo la wɔ̀ èlãnu kudo woa nɔ̀nɔwo
eye wo la do àbì woa ɖokoewo ŋuti.
Vifɛ̃wo la do àyà na àmèsĩsĩwo
eye àmèkpòwo cã la do àyà na hùɛ̃yiwo.
6Àmè ɖe la kù ɖo nɔ̀via ŋuti
lè woa tɔ xòmè gblɔ̃ na ɛ̀ be:
“Wò gbà ɖo àwù nyuɛ̃wo.
Eŋuã, nyi miabe kplɔ̀tɔ eye wòa le ŋùku ɖo
ènu gbegble kèawo ŋuti!”
7Eye àmè ɖèa la ɖo e ŋuti gblɔ̃ be:
“Nyè mu la teŋu wɔ̀ ènu ɖekpe na mì ò.
Nuɖùɖu àlo àwù dodo ɖe mu lè àsi nyè ò.
Mì mu la teŋu sɔ mù èga ɖo mìa nu ò.”
8Yèruzàlɛm ɖiɖi eye Yudà be fìɔdua klɛ̃ ènu.
Wo sitè ɖo Tɔhonɔ̀ be ŋusɛ̃a ŋuti
lè wɔ̀na ku ènupo pòpowo mè.
9Wo dona vòvòtoto àmèwo dòmè,
eye ekèa donahùɛ do wo.
Woabe nuvuɛ̃wo lè gàglàgbè
sìgbè Sodɔ̀mtɔwo tɔ̀ ke nène.
Wo sɔ kãna àdã.
Bàbà, wo le do gbledo
be àgbã na woa ɖokoewo.
10Mì teŋu gblɔ̃ be àmè kèwo
sènàgbè na Mawu a, nyi sìtumewo.
Wo la ɖù woabe wɔ̀na be àlè.
11Vɔ̀a, gbledo kɛ ye la nyi na àmè bàɖàwo!
Ɖo wo la wɔ̀ kudo wo ɖo woabe wɔ̀na ŋuti,
12Tɔhonɔ̀ gblɔ̃ be: “Dùkɔ̃ nyè!
Àmè kèwo le ɖiki wòa, lè sìgbè ɖèviwo nène,
eye nyɔ̃nùmewo ye le kplɔ̀ wò.
Dùkɔ̃ nyè, àpo kplɔ̀tɔwo le blè wò.
Wo kplɔ̀ wò le yì cɔ̃crɔ̃ mè.”
Kplɔ̀tɔwo be kòjoɖoɖo
13Tɔhonɔ̀ sɔ̀gbè la ɖo kòjo.
E sitè gbà la ɖo kòjo kudo dùkɔ̃wo.
14E la sãma yebe dùkɔ̃a be àgbònùglawo
kudo woabe ègawo lè kòjo mè be:
“Mìawo ye crɔ̃ vɛ̃-gble nyèa. Mì lɔ ènu
kèwo mì fĩ lè wɔ̀amènɔ̀wo sia ɖɔ mìabe àxuewo.
15Nukɛ ŋuti ye mì le ɖiki dùkɔ̃ nyèa ɖo
eye mì le wɔ̀ ènu dakà kudo wɔ̀amènɔ̀wo ò?”
Tɔhonɔ̀ ŋusɛ̃ kpatatɔa ye gblɔ̃ ɛ̀!
Tɔhonɔ̀ sɔ ènyà ɖo Yèruzàlɛm nyɔ̃nùwo ŋuti
16Tɔhonɔ̀ gblɔ̃ be: “Kè e nyi be
Ziɔ̀n be nyɔ̃nùwo jènà woa ɖokoe nu
eye ne wo va le yìa, wo ɖona èkɔ̀
gbà nɔ ɖo àzìã ŋùku, sɔ nɔ dɔ̃ àmèwo ne woa kpɔ woa;
eye wo dona àyroloe àfɔ̀ ne bèa nɔ ɖègbè
lè àfɔ̀ na wo ne wo zɔ̃ va le yìa.”
17Eŋuã, Tɔhonɔ̀ la na woabe ètawo la jè àkpà
eye woabe ŋùgowo la ci gàglàgbè.
18Gbè ŋua gbèa, Tɔhonɔ̀ la ɖè woabe àcɔɖonuawo jo: àyroloe, kɔ̀mèwlɔ kudo sìkanu kè ɖo wètrifɛ̃fɛ̃ be nɔ̀nɔmèa; 19èkɔ̀ jònuwo, àlɔ̀tinugawo, bicɔf-kɔlà be àvɔvi; 20dukùwo, àfɔ̀wlɔviwo, gojiblaka-totrowo, tilàwo kudo àtiblɛwo; 21àlɔ̀gàvi ku ŋɔ̀timè gàvi; 22àwù yeyewo kudo àwù vlàyàwo, dukùwo, kɔ̀mèɖonuwo, àlɔ̀mè-kpɛtɛwo; 23àpùpuiwo, flãlã be àwù èjitɔ̀wo, kɔ̀mèɖonu kudo àtrɛvi gã bla ètawo.
24Ènu nyìnyɔ̀ be hɔ̃hũɛ
ye la ɖɔ̀lì anùwɛtrɛ̀ be huɛ̃huɛ̃a.
Èkà ɖe ye la ɖɔ̀lì ègojiblanu,
wo la plɔ èta lè àcɔ be èɖà pòpo tèpe,
ècɔvɔwo ye la nɔ̀ àwù ye yèwo tèpe,
eye ŋùkpɛ̃ la ɖɔ̀lì àcɔɖoɖo.
Yèruzàlɛm be àhòsìwo
25Yèruzàlɛm, àpo ŋusùwo la crɔ̃ lè èwui nu.
Àpo àhùakɔ̃a la ku ci àhùa.
26Eye èdùa kpata la làmɔɛ̃ eye wo la lòfũ.
Sìgbè nyɔ̃nù kè bu ènu sia ènu nènea,
e la ɖiɖi nɔ̀ ànyigbã nɔ pu àsi ènu.
Mina Bible © Bible Society of Togo, 2014.