Ezayà 34
34
Wo la ɖokòjo na dùkɔ̃wo kpata: Edɔ̀m be ètodɔ̃dɔ̃
1Dùkɔ̃wo, mì dɔ̃ va ne mìa sè.
Mìa dùkɔ̃wo, mì ɖo èto!
Ànyigbã kudo ènu kèwo lè e jia kpata ne sè!
Xixea mè be ènuɖoɖowo ne sè!
2Tɔhonɔ̀ be jìbi be àdã sitè ɖo dùkɔ̃wo ji.
E le bijì do woabe àhùakɔ̃.
E ɖo e be yèa crɔ̃ wo eye e ɖè wo do àsi.
3Wo la lɔ woabe ŋutilã kukuwo kɔ̀ ŋùgbe.
Woabe àmèkpòtiwo la ɖè àya
eye woabe èhũ la srà to ètowo ji.
4Jiŋùkusi be wètriviwo kpata la kãkã gudu-gudu.
Eye jiŋùkusi la ŋlɔ̀ sìgbè àba nène.
Èji be ènuwo kpata la hlɛ̃ sìgbè àmàkpawo nène,
sìgbè vɛ̃ àlo vòti be àmàkpa nène.
5Tɔhonɔ̀ be èwuia pò èhũ ɖèɖe lè èji hũi.
Èwuia jè Edɔ̀mviwo ji,
dùkɔ̃ kè be ɖè do àsi ne woa crɔ̃ gbidia.
6Tɔhonɔ̀ be èwuia pò èhũ kpɛ̃nyè, kudo àmì ɖèɖe.
E wɔ̀ sìgbè àlɛ̃wo kudo gbɔgbɔɛwo be èhũ nène,
sìgbè àgbòwo be àyìkuwo ŋuti be àmì nène.
Lè Edɔ̀m be èdù gã Bosrà mè
ye Tɔhonɔ̀ jrà vɔsa wɔ̀wɔa ɖo lè.
Èhlɔ̃dãdã gã ɖe ye lè Edɔ̀m-nyigbã ji.
7Zè ɖèkaa, ètòwo, ènyì-suwo kudo ènyìwo jè ànyi.
Èhũ mu ànyigbã eye àmì ci èkɔa ji.
8E nyi èhlɔ̃ biɔbiɔ be ŋùkèkè na Tɔhonɔ̀.
Edɔ̀m be àkɔ̃ŋùta na Mawu so Ziɔ̀n ŋuti be èpè ye.
9Edɔ̀m be ètɔ̀ sàsrawo la trɔ zũ àŋɔ̀ koɖùta be ètɔ̀,
yebe èkɔa la trɔ zũ wèmi hɛ̀hɛ̀.
Ànyigbã la nɔ̀ sìgbè àŋɔ̀ koɖùta kè le bìa nène.
10Mu la ci gbèɖe lè èzã àlo kedè ò.
Àzìzɔ la nɔ tù lè funu tɛ̀gbɛ̀.
Ànyigbã la trɔ zũ zògbè kaka yì
eye àmè ɖekpe mu la gbà to funu gbèɖe ò.
11Àzexe kudo fãvĩhũtowo la nɔ̀ e ji.
Àkpàfiɔ̃ kudo àvàkòwo la ɖo nɔ̀pe ɖo funu.
Tɔhonɔ̀ la crɔ̃ èdùa.
Eye e la ci puplu sìgbè lekè
be nɔ̀ sã lè xixea be gɔ̃mèjèje a nène.
12Cãmìwo mu la gbà nɔ̀ ànyi
kaka la va ɖo èfìɔ ò.
Wo la crɔ̃ keŋu-keŋu.
13Àŋùjawo ye la miɔ̃ ɖo yebe fìɔsawo mè.
Yebe àgbògbòwo la ɖɔ kudo àŋɔ̀ti gbàkudo àŋɔ̀kawo.
Funu la nyi nɔ̀pe na ègbevũ ku tatabòliwo.
14Ègbesewo la dogò blèkpɔ̃ɛwo
eye gbɔgbɔɛwo cã la sò nɔ̀pe ɖo funu.
Lìlitò kè nyi èzã be gbɔ̃gbɔ̃ vuɛ̃-nɔa,
la kpɔ jɛ̃gbɔ̃pe lè funu.
15Funu ye èdã la ɖo nɔ̀pe ɖo.
E la ɖo àzì, la cɔ̃ e ji kaka
ɖo èvi-pòpo hùenu lè funu.
Nène a ke àkãgãwo cã la bɔ̀ ɖodu yeŋu.
16Mì kãkã Tɔhonɔ̀ be xoma mè, mì la kpɔ wo gblɔ̃ be:
“Èlã kèawo dòmètɔ ɖe mu la hùedo ò.
Ɖo Tɔhonɔ̀ ŋutɔ ye ɖè ègbèa,
eye yebe gbɔ̃gbɔ̃a ye bɔ̀ wo.
17Ye ŋutɔ ye cã àmè sia àmè be ɖoɖo na ɛ̀.
Yebe àlɔ̀ ye dà èkà na woabe
nɔ̀pe vòvòvòwo lè ànyigbã ji.
Wo la nɔ̀ funu sɔ yì mà-vɔ.
Tɛ̀gbɛ̀dò wo la nɔ̀ funu so jìjimè yì jìjimè.
Mina Bible © Bible Society of Togo, 2014.