Ezayà 35
35
Mawu la ta èmɔ̃ yeye to zògbè ji
1Zògbè ku ànyigbã pupuiwo, mì kpɔ jìjɔɛ.
Ànyigbã pupuia ne jɔ̀jì eye bèa to àmà gbà pò èse.
2Ne ɖɔ ku ègbemè be sepòpowo.
Ànyigbã ne kpɔ jìjɔɛ eye bèa do jìjɔɛ
ku jiɖùɖu be àpa.
Tɔhonɔ̀ la na wò la ɖo nyiɖìɖi
sìgbè Libàn be ètowo nène.
E la ɖo àcɔ na wò sìgbè Karmèl
be èto ku Sarɔ̀n be gbàjà ji nène.
Nène a, wo la kpɔ Tɔhonɔ̀ be gogo,
miabe Mawu a be àcɔ ɖoɖo.
3Mì trɔ do ŋusɛ̃ àlɔ̀ gbɔjɔwo
eye mì na èklò kèwo le hũhũ sãawo ne woa sɛ̃ŋu.
4Mì gblɔ̃ na àmè kèwo ci jàjàjàa be:
“Mì gbɔ̃jìɖɛ, mì mu gbà vɔ̃ ò.
Mìabe Mawu ye kè.
E la va biɔhlɔ̃ na mì
eye e la ɖo e tèpe na mìabe kɛ̃tɔwo.
Ye ŋutɔ ye la va hlùɛ̃ mì gã.”
5Nène a, ŋùkugbãgbãnɔ̀wo be ŋùku la gbà kpɔ ènu nyuɛ̃ ɖe,
ètokunɔ̀wo be èto la gbà sè ènu.
6Nène a, kpòtɛ̃nɔ̀wo la tìkpo sìgbè èzĩ nène
eye àmumuiwo la kè ènu sɔ gblɔ̃ woabe jìjɔɛ-nyawo.
Èsì la wo gbòo lè zògbè ji,
ètɔ̀wo la srà to ànyigbã pupuia ji.
7Èkɔ xɔ̀zòa la trɔ zũ tɔ̀gba,
eye ànyigbã kè mu gbà kpɔ èsì kpɔ òa,
la trɔ zũ èsìdowo be tèpe.
Fikè ègbevũwo cɔ̃na àkɔ ɖo sãa,
ye keti ku èkowo la mìɔ̃ ɖo.
8Wo la do èmɔ̃ to funu kè wo la yɔ be: “Èmɔ ɖè ɖo èvòa”.
Àmè mà-kɔ̀ mà-kɔ ɖe mu la to funu ò.
E la nɔ̀ ànyi na Tɔhonɔ̀ be dùkɔ̃a.
Sùkunɔ̀ ɖekpe mu la bu èmɔ̃ to funu ò.
9Wo mu la kpɔ jãŋùta ɖekpe le e ji
kaka jè èlã wɔ̀adã ɖe ji ò.
Ɖekpe ŋutɔ cã mu la va ò.
Ne gloa, àmè kèwo Tɔhonɔ̀
la na vòvoa wo kpò ye.
10Àmè kèwo Tɔhonɔ̀ la tu èkàwo ye la trɔ gbɔ̀.
Wo la gbɔ̀ va Ziɔ̀n lè jìjɔɛ gã ɖe mè.
Nyɔna mà gũ ɖe la kɔ̀ woabe ŋùkumè.
Eye jìjɔɛ mànyagblɔ̃ ɖe ye la kplɔ̀ woa do,
ɖo èhiãjèje ku àyàɖùɖuwo nu la ci lè woa dòmè.
Mina Bible © Bible Society of Togo, 2014.